Իրանում հաջորդ ամիս նախագահական ընտրություններ են. Ռոհանին չկա թեկնածուների թվում

Իրանում հաջորդ ամիս նախագահական ընտրություններ են սպասվում:

Երկրում արդեն սկսվել է նախագահի պաշտոնի համար պայքարը. Իրանի ներքին գործերի նախարարությունը հրապարակել է նախագահի թեկնածուների պաշտոնական ցուցակը:

Իրանական Tasnim գործակալությունը գրում է, որ սկզբնապես 592 մարդ է ցանկացել դուրս գալ նախագահի պաշտոնի համար պայքարի, սակայն դիմորդներից 7 հիմնական թեկնածուներ են մնացել միայն: Նշվում է, որ հիմնական պայքարը կընթանա 3 թեկնածուների  միջև, որոնց թվում են դատական իշխանության ղեկավար Իբրահիմ Ռաիսին, նախկին փոխնախագահ Մոհսեն Մեհրալիզադեն և Կենտրոնական բանկի կառավարիչ Աբդոլնասեր Հեմաթին:

Բացի նրանցից, ընտրություններին կմասնակցեն նաև Քաղաքական նպատակահարմարության խորհրդի քարտուղար Մոհսեն Ռեզայը, Ազգային անվտանգության գերագույն խորհրդում Գերագույն առաջնորդի ներկայացուցիչ Սաիդ Զալիլին, Իրանի Մեջլիսի (խորհրդարանի) հետազոտական կենտրոնի ղեկավար Ալիռեզա Զաքանին և խորհրդարանի անդամ Ամիրհոսեյն Կազիզադե-Հաշեմին:

Շրջանառվում է նաև Իրանի նախկին նախագահ Մահմուդ Ահմադինեժադի հավանական թեկնածության հարցը, որը ղեկավարում էր կառավարությունը 2005-ից 2013 թվականներին,ինչպես նաև Թեհրանի քաղաքային խորհրդի նախագահ Մոհսեն Հաշեմի Ռաֆսանջանին:

Iranizator տելեգրամ-ալիքը հայտնում է, որ խորհրդարանի նախկին խոսնակ Ալի Լարիջանիի թեկնածության դիմումն ընտրական հանձնաժողովի կողմից մերժվել է, ինչը անսպասելի էր: Նա կարող էր դառնալ ամենաընդունելի թեկնածուն ինչպես «ռեֆորմիստների», այնպես էլ «չափավորների» խմբակցության համար: Հիմա նրանք պետք է միավորվեն մեկ այլ գործչի շուրջ:

Այս բոլոր անձանց թեկնածությունները դեռևս նախնական են: Բոլոր թեկնածուների վերջնական ցանկը հրապարակվելու է մայիսի 28-ին: Mehr գործակալությունը ՝ հղում անելով երկրի ՆԳ նախարարությանը գրում է, որ նրանք պետք է հաստատվեն նաև Իրանի սահմանադրական խորհրդի անդամների կողմից:

Նշվում է, որ հենց մայիսի 28-ից էլ թեկնածուներին թույլատրվում է քարոզչություն իրականացնել, որը կտևի մինչեւ հունիսի 16-ը: Ընտրարշավը կարգելվի հունիսի 17-ին և ընտրությունների օրը՝ հունիսի 18-ին:

Իսլամական հանրապետության օրենքների համաձայն, գրանցվելուց հետո ընտրական մրցապայքարին մասնակցել ցանկացողները պետք է հաստատվեն Իրանի Սահմանադրության խորհրդի կողմից: Թեկնածուների ցուցակում ընդգրկելու համար դիմումները կընդունվեն մինչև մայիսի 15-ը:

Երկրի կառավարության ներկայիս ղեկավար Հասան Ռոհանին չի կարող մասնակցել ընտրարշավին, քանի որ պաշտոնավարում է երկրորդ ժամկետն անընդմեջ: Ընտրությունների օրը կընտրվեն նաև Փորձագետների խորհրդի և քաղաքային խորհուրդների անդամներ ամբողջ հանրապետությունում:

Իրանի Սահմանադրության համաձայն, իշխանության ղեկավարի պաշտոնի համար թեկնածուն պետք է լինի առնվազն 40 տարեկան և 75 տարեկանից ոչ բարձր: Ապագա նախագահը պետք է ունենա առնվազն 4 տարվա կառավարման փորձ, չունենա քրեական անցյալ և ունենա առնվազն գիտությունների մագիստրոսի կոչում: Կառավարության գործող ղեկավար Հասան Ռոհանին չի կարող առաջադրվել, քանի որ պաշտոնավարում է արդեն 8 տարի՝ երկրորդ չորս տարին անընդմեջ:

Իրանում սկսված նախընտրական արշավում, մինչ վերջերս, պահպանվում էր ինտրիգը, թե արդյո՞ք դատական իշխանության ղեկավար Իբրահիմ Ռաիսին կառաջադրեր իր թեկնածությունը: Երկրում այս հայտնի քաղաքական գործիչն արդեն առաջադրվել էր 2017-ին, սակայն ընտրություններում պարտվել գործող նախագահ Ռոհանիին ՝ քվեարկության արդյունքում գրավելով երկրորդ տեղը: Գրանցման վերջին օրը Ռաիսին, այնուամենայնիվ, առաջադրվել է որպես անկախ թեկնածու և միևնույն ժամանակ ուղերձ հղել ժողովրդին: Քաղաքական գործիչը խոստացել է, որ ընտրվելու դեպքում որպես նախագահ պայքարելու է կոռուպցիայի և աղքատության դեմ, ինչպես նաև պաշտպանելու է Իրանի քաղաքացիների իրավունքները:

Տեղական դիտորդների կարծիքով ՝ Իրանի դատական համակարգի ղեկավարը հաղթելու ամենամեծ շանսերն ունի: Ապրիլի 29-ին իրանական «Ֆարս» լրատվական գործակալության կողմից հրապարակված սոցիոլոգիական հարցման տվյալների համաձայն ՝ հարցվածների 42% -ը պատրաստ է քվեարկել Ռաիսիի օգտին: Ռաիսին իր ներկայիս պաշտոնում հանրաճանաչ դարձավ երկրում կոռուպցիայի դեմ պայքարի իր սկսած լայնածավալ արշավի շնորհիվ: Բացի այդ, նա նախաձեռնել է ընտանեկան բռնությունից կանանց իրավունքները պաշտպանող օրենսդրության մշակում: 

Հունիսի 18-ին նախագահական ընտրությունները Իրանում անցկացվելու են տասներեքերորդ անգամ: Երկրի գործադիր իշխանության ապագա ղեկավարին անհրաժեշտ կլինի հավաքել ձայների 50% -ից ավելին: Եթե թեկնածուներից ոչ մեկին չհաջողվի, ապա տեղի կունենա քվեարկության երկրորդ փուլ: ԻԻՀ ընտրական շտաբի տվյալների համաձայն, ավելի քան 59,3 միլիոն իրանցիներ կկարողանան մասնակցել ընտրություններին: