Հետպատերազմյան շրջանի սոցիալական ճգնաժամը մեծ մասամբ հաղթահարված է. Նարեկ Մկրտչյանն այցելել է Գյումրի

Աղքատության ու գործազրկության բարձր շեմով պայմանավորված՝ Շիրակի մարզը հանրապետությունում ամենախոցելին է: Շիրակի մարզպետ Նազելի Բաղդասարյանը, այս երկու հիմնական գործոնները ներկայացնելով ՀՀ աշխատանքի և սոցիալական հարցերի նախարար Նարեկ Մկրտչյանին, ողջունեց նրա այցը Գյումրի:

«Մեզ համար կարևոր է այդ խնդիրների մեղմացմանը միտված ցանկացած ծրագրի իրականացումը։ Պատրաստ ենք համագործակցության, և ես՝ որպես մարզպետ, հաստատում եմ համատեղ աշխատանքի պատրաստակամությունս։ Ինքս կարևորում եմ համագործակցությունը և՛ տարածքային կառավարման, և՛ տեղական ինքնակառավարման մարմինների մակարդակում, որովհետև փոխգործակցության արդյունքում կկարողանանք հասցեական օգնություն տրամադրել խոցելի խմբերին ու մարդկանց։ Կառավարության որդեգրած սկզբունքներն են սոցիալական բնագավառում աշխատել՝ կարևորելով թափանցիկությունը, մատչելիությունն ու հասանելիությունը»,- ասաց մարզպետը։

Նարեկ Մկրտչյանն էլ վստահեցրեց՝ ամեն ինչ արվելու է առկա խնդիրների լուծման ուղղությամբ: Քննարկման առանցքում, ի թիվս այլ հարցերի, կարևորվեցին հատկապես պատերազմի հետևանքով հաշմանդամություն ստացած զինծառայողների կրթության և աշխատանք գտնելու հնարավորությունները:

Ըստ Մկրտչյանինի՝ հետպատերազմյան շրջանի սոցիալական ճգնաժամը մեծ մասամբ հաղթահարված է, բայց կան մարտահրավերներ, որոնց դեռ պետք է անդրադառնալ՝ պայմանավորված պատերազմի մասնակից տղաների կայուն զբաղվածության, վերապատրաստման տարբեր ծրագրերի իրականացմամբ:

«Ունենք տարբեր ծրագեր պատերազմի մասնակից ավելի քան 500 զինվորի համար: Հիմա քննարկում ենք Շիրակի մարզից հնարավոր շահառուներ ներգրավելու, ինչպես նաև միասնական սոցիալական ծառայության տարածքային կենտրոնների, մարզպետարան ՏԻ մարմինների հետ համագործակցություն սահմանելու, նաև միջազգային գործընկերների հետ հնարավոր համահամագործակցության տարբերակները:

Օրինակ՝ ֆրանսիական մի քանի ընկերությունների հետ ունենք համագործակցություն, որոնք առցանց են մատուցում ծառայությունը և կարող ենք այստեղ Շիրակից շահառուներ ունենալ: Կան ընթացքի մեջ գտնվող ծրագրեր: Գյումրու տեխնոլոգիական կենտրոնի հետ համագործակցության արդյունքում ավելի քան 100 զինծառայողների կրթության, վերապատրաստման ծրագիր ենք իրականացնում»,- նշեց նախարարը:

Արդյո՞ք վերապատրաստված և կրթություն ստացած հաշմանդամություն ունեցող տղաները կկարողանան աշխատանք գտնել: Նախարարը վստահ ասաց՝ այո, պատերազմից հետո մտածողություն և վերաբերմունք է փոխվել:

«Պատերազմից հետո մասնավորապես պատասխանատվության զգացումը պատերազմական գործողություններին մասնակցած և իրենց առողջությունը վնասած տղաների նկատմամբ ավելի է մեծացել հասարակության շրջանում:

Ունենք բազմաթիվ առաջարկներ մասնավոր ընկերությունների կողմից, որոնք որ պատրաստակամ են իրենց ընկերություններում ընդունել, կրթել, վերապատրաստել և աշխատանքի տեղավորել նրանց:

Մենք՝ որպես Կառավարություն, հնարավորություններ ենք ընձեռում հարմար պայմաններ ստեղծել հաշմանդամություն ունեցողներին աշխատանքի ընդունողների համար: Պետությունը փոխհատուցում է մեկ տարի մինչև 100.000 եկամտահարկի գումար և գումար է տրամադրում գործատուին՝ աշխատավայրի հարմարեցման համար»,- մանրամասնեց Նարեկ Մկրտչյանը:

Շիրակի մարզպետի հետ հանդիպման ընթացքում քննարկվեց նաև վերակազմավորման արդյունքում արդեն ձևավորված միասնական սոցիալական ծառայությունների գործունեության ոլորտին ու աշխատանքի արդյունավետությանը վերաբերող հարցեր։ Համաձայնություն ձեռք բերվեց, որ ՀՀ աշխատանքի և սոցիալական հարցերի նախարարության կողմից միջոցներ կուղղվեն Շիրակի մարզ՝ առավել խոցելի խմբերի կարիքները թեթևացնելու նպատակով:

Սամսոն Մատինյան