Ինչ կլինի, եթե ընդդիմությունը գա իշխանության. մանրամասնում է Էդգար Առաքելյանը

Քաղաքագետ Էդգար Առաքելյանն այն համոզմանն է, որ այն, ինչ տեղի է ունենում այսօր Հայաստանում, գործողություններ են ՀՀ պետականության դեմ:

Այս մասին նա ասում է «Հայկական ժամանակ»-ի հետ զրույցում՝ անդրադառնալով ընդդիմության՝ վերջին օրերին նախաձեռնած հանրահավաքներին և անհնազանդության ակցիաներին:

«Վարչապետի հայտարարության շեշտադրումը շատ ճիշտ էր, որ մարդիկ, ովքեր նույնիսկ իրենց հրապարակային հայտարարություններում կասկածի տակ են դրել ՀՀ անկախությունն ու ինքնիշխանությունը, ովքեր Հայաստանը երազում են Թաթարստանի կարգավիճակով՝ Ռոբերտ Քոչարյանը և Ռուբեն Վարդանյանը, այսօր գլխավորում են այս ակցիաները»,- նկատում է նա:

Ըստ Առաքելյանի՝ իսկ այն, ինչ տեղի ունեցավ Լեռնային Ղարաբաղում, նույնպես ուղղված է Հայաստանի դեմ:

«Անհայտ է, որ, սկսած 2020 թվականից, այս քաղաքական խումբը փորձում է արցախյան հարցն օգտագործել, Հայաստան եկած արցախցիների էմոցիաներն օգտագործել, որ մարդկանց դուրս բերեն փողոց: Բայց ես չեմ կարծում, որ կկարողանան հանրային մեծ աջակցություն ապահովել, քանի որ մարդիկ հասկանում են, թե ինչ է տեղի ունենում: Մարդիկ հասկանում են, որ Ռոբերտ Քոչարյանը, Սերժ Սարգսյանը, Ռուբեն Վարդանյանը կոնկրետ նախագծով եկել են Հայաստան: Ինչպես նմանատիպ լոզունգներով գնացին, Արցախում հեղաշրջում իրականացրին և ընդամենը 10 օր հետո Եվլախում հանձնեցին Արցախը, նույն տրամաբանությամբ ուզում են գալ Հայաստանում իշխանության, և համոզված եմ, որ անմիջապես հաջորդ օրը միգուցե ոչ Եվլախում, բայց Գյանջայում հաստատ հանձնեն Հայաստանը»,- ասում է քաղաքագետն ու մանրամասնում, թե ինչպես են վերջիններս պատրաստվում դա անել.

«Կտան Մեղրիի միջանցքը, դա կբարդեն ներկայիս իշխանությունների վրա, իսկ Հայաստանի մնացած մասը, ինչպես Ռոբերտ Քոչարյանը հարցազրույցներից մեկում ասել է՝ «Պետք է հլա տեսնենք՝ Հայաստանը ռեսուրսներ ունի՞ անկախ և ինքնիշխան մնալու», կհայտարարեն, որ Հայաստանը ի վիճակի չէ և չի կարող ինքնիշխան լինել և որոշում կկայացնեն երկիրը դարձնել ՌԴ ծայրագավառներից մեկը և վերջնականապես կփակեն Հայաստանի պետականության էջը: Իսկ իրենք այստեղ որպես կադիրովներ՝ գավառապետներ, կգան ու կիշխեն ժողովրդին, վերջնականապես կստրկացնեն, կլուծարեն հայկական զինված ուժերը, ինչպես դա արեցին Արցախում, իսկ մեր երիտասարդներին կուղարկեն զոհվելու հանուն Ռուսաստանի»:

Էդգար Առաքելյանի խոսքով՝ մենք պետք է դուրս գանք ՌԴ-ի ստեղծած և այնտեղ Հայաստանին քարշ տված մի քանի համակարգերից: Վերջինս ասում է՝ վարչապետը այդ մասին, իհարկե, նշեց, բայց, ըստ նրա, գործողությունների ժամանակն է, և որպես առաջին քայլ պետք է դուրս գալ ՀԱՊԿ-ից. «Վարչապետն էլ նշեց, որ այն անվտանգային համակարգը՝ ճարտարապետությունը, որ կար, այլևս չի գործում, և անհրաժեշտ են նորերը ստեղծել, իսկ այդ ճանապարհին ժամանակն է, որ չաշխատող համակարգից դուրս գանք»:

Հարցին, թե մենք ունե՞նք այլընտրանք, զրուցակիցն արձագանքում է. «Իհարկե, ունենք: Ժամանակին մեզ համոզում էին, որ եթե ՌԴ-ն մեզ զենք չտա, էլ ով է տալու, կամ գումար չունենք զենք առնելու: Պարզվեց, որ կարող ենք գումար ունենալ և կարող ենք այլընտրանք գտնել: Օրինակ՝ Հնդկաստանի օրինակը, վերջին ժամանակներս Չեխիայի հետ ռազմական տեխնիկական ոլորտի համաձայնագիր ստորագրվեց, կարող են հնարավորություններ լինել Իրանի հետ, Հունաստանի հետ նման համաձայնագիր ստորագրվեց, Ֆրանսիայի հետ գործընթացներ կան: Այսինքն՝ հայկական հասարակության մեջ ներմուծված այդ արհեստական անելանելիության զգացողությունը Հայաստանին ու նրա հասարակությանը միակ փրկչի կերպարով հանդես եկող ՌԴ-ի հոգեբանական գրոհն է: Այս մեծ աշխարհում այլընտրանքներ միշտ կան, և հետևաբար պետք է այդ այլընտրանքները փնտրել և գտնել»:

Քաղաքագետը հիշում է՝ 2021 թվականի սկզբին՝ ուկրաինական պատերազմը սկսվելուց մի տարի առաջ, Հայաստանը մի քանի հարյուր միլիոն գումար էր վճարել զենք ձեռք բերելու համար, բայց ՌԴ-ն ոչինչ չի տվել, և մենք կարող ենք հիմնավոր կասկած ունենալ, որ ՌԴ-ն ոչ միայն չի օգնում մեզ՝ ապահովելու մեր անվտանգությունը, այլ, ընդհակառակը, մեր հակառակորդների հետ փոխկապակցված աշխատում է ընդդեմ Հայաստանի տարածքային ամբողջականության և անվտանգության. «Սրանք ակնհայտ փաստեր են, որոնք քննադատության չեն դիմանում: Իսկ իրենք կարող են իրենց դաշնակցային պարտականությունները չկատարելու ցանկացած պատրվակ գտնել, ընդհուպ եթե ոչ մի բան չգտնեն, Երևանում ջերմաստիճանը կարող է բարձր լինել, և իրենք չկարողանան պաշտպանել մեր անվտանգությունը, մենք աբսուրդին հասնող մեկնաբանություններ կարող ենք լսել»:

Ինչ վերաբերում է Հռոմի ստատուտի վավերացմանը, որին ՌԴ-ն այդքան ջղաձգորեն է վերաբերվում, քաղաքագետն ասում է, որ այստեղ նույնպես ՌԴ-ն անկեղծ չէ Հայաստանի նկատմամբ:

«Հայաստանն այդ գործընթացը սկսել էր ավելի վաղ, քան ՌԴ նախագահին միջազգային դատարանի կողմից կալանավորման սանկցիա տվեցին, այստեղ ՌԴ-ն պաշտպանում է իր գործընկեր և դաշնակից Ալիևին: ՌԴ-ն լավ է հասկանում, որ իրենց կողմից պաշտպանված և խրախուսված Ալիևը Արցախում հանցագործություններ է կատարել՝ ուղղված մարդկության դեմ, Արցախում այսօր էլ ցեղասպանություն է կատարվում, բռնի արտաքսում է տեղի ունենում մարդկանց, ովքեր հազարամյակներով ապրել են իրենց հողի վրա: Հիմա ՌԴ-ն ուզում է իրենց դաշնակցին փրկել, քողարկել Ալիևի հանցագործությունները, որպեսզի նա էլ ՌԴ նախագահի կարգավիճակում չհայտնվի»,- ասում է Առաքելյանն ու հավելում, որ ողջունում է և կոչ անում հնարավորինս շուտ վավերացնել այն. «Քանի որ դա նույնպես անվտանգային բաղադրիչ է ՀՀ-ի համար. Ալիևը պետք է հասկանա, որ պատժվելու է միջազգային մակարդակով, իզգոյ է դառնալու իր կատարած հանցագործությունների համար»:

Հերմինե Կարապետյան