«Ֆիլիպ Մորրիս» Արմենիան միացել է Ապագա հիմնադրամի «Կրթությունից աշխատանք՝ մեկ քայլ» ծրագրին

«Ապագա» բարեգործական հիմնադրամը Հայաստանի ամբողջ տարածքում շուրջ 7 տարի է՝ իրականացնում է առողջապահական, կրթական, սոցիալական և մշակութային տարբեր ծրագրեր: Նպատակը մեկն է՝ աջակցել ընտանիքներին, երիտասարդներին, անհատներին՝ ունենալու բարեկեցիկ ապագա:

Նկատենք, որ հիմնադրամը մեծ ջանքեր է գործադրում ամենակարևոր ներուժի՝ երիտասարդների համար և նրանց պահում իր ուշադրության կենտրոնում: Դրա շրջանակում էլ արդեն երկու տարի է՝ իրականացնում է «Կրթությունից աշխատանք՝ մեկ քայլ» ծրագիրը, որի նպատակն է ապահովել ուսանողներին մասնագիտական զբաղվածությամբ:

«Ապագա» բարեգործական հիմնադրամի գործադիր տնօրեն Ռոզա Սոլոմոնյանը «Հայկական ժամանակ»-ի հետ զրույցում նկատում է. «Մեր բոլորիս նպատակը մեկն է՝ մոտիվացնել ուսանողներին: Ի՞նչ է պետք դրա համար՝ կազմակերպել մասնագիտական պրակտիկա, տրամադրել տարբեր ոչ կրթական դասընթացներ և, իհարկե, ուսման վճար»:

Այս ամենը կազմակերպելու համար Հիմնադրամը Ֆինանսների նախարարության հետ համատեղ սեպտեմբերի 24-ին ստորագրեց հուշագիր, որի համաձայն՝ այս տարի «Կրթությունից աշխատանք՝ մեկ քայլ» ծրագրում ներառված 33 ուսանողից 12-ը Ֆիլիպ Մորրիս Արմենիա ընկերության աջակցության շնորհիվ արդեն իսկ ընդգրկվել է Ֆինանսների նախարարության տարբեր վարչություններ, որտեղ անցնում են իրենց մասնագիտական պրակտիկան:

«Ֆիլիպ Մորրիս» ինթերնեյշնլ ընկերության հայաստանյան գրասենյակի արտաքին կապերի կառավարիչ Վիկտորիա Պողոսյանը անկեղծացավ՝ ֆինանասների նախարարությունն իր ամենասիրելի նախարարություններից մեկն է, որովհետև բազմիցս ականատես է եղել նախարարության պրոֆեսիանալիզմին և փորձին.

«Ուրախ եմ, որ պետական սեկտորում ծրագրի իրականացման առաջին նախաձեռնությունը սկսվում է ֆինանասների նախարարությունից: Ինքս աշախատելով և՛ պետական, և՛ մասնավոր սեկտորում, ուզում եմ ուսանողներին ասել, որ պետական սեկտորում աշխատելը շատ հետաքրքիր է, և երբ ինչ-որ մի բան եք անում, դա մեծ բան է, մեծ ռեֆորմ՝ ներդրում երկրի զարգացման համար. դա շատ ոգևորիչ է ու մոտիվացնող»:

Ֆինանսների նախարարի Գլխավոր քարտուղարի տեղակալ Արայիկ Եսայանն էլ նկատում է՝ շատերին թվում է, թե պետական համակարգում աշխատանքը ձանձրալի է, ոչ այդքան գրավիչ, սակայն իրականում այդպես չէ:

«Մեծ պատիվ է աշխատել պետական համակարգում, լինել այն բարեփոխումների մասը, որ այսօր իրականանում է: Շատ հարցերի պատասխան նաև սերնդափոխության մեջ է, և ուզում ենք մեր ուսանողներին մեսիջ հեղել, որ լավ կրթությունը նաև նպաստում է պետական համակարգում փոխելու այն պատկերացումները, որոնք կան: Շատ մարդիկ, պետական համակարգ գալով, իրենց լուման են բերում, և դա օգնում է ավելի լավը դարձնել մեր կյանքը»:

Ֆինանսների նախարարության՝ Մարդկանց հետ աշխատանքների վարչության պետի պաշտոնակատար Հայկանուշ Տեր-Վարդանյանն էլ ասում է՝ Ֆինանսների նախարարությունը մեծապես կարևորում է կրթական և զարգացման միջավայրի ստեղծումը, երիտասարդների հետ համագործակցությունը, քանի որ գիտակցում է՝ երիտասարդներն են երկրի ապագան:

«Այդ առումով մենք մի շարք համագործակցության ծրագրեր ունենք, որոնցից մեկը «Ապագա» հիմնադրամի հետ է, որի հետ համագործակցության շրջանակում 12 երիտասարդ 5 ամիս շարունակ կներգրավվի նախարարության վարչությունների աշխատանքներում և կստանա գիտելիք և հմտություններ: Լավագույններին փորձելու ենք աշխատանք առաջարկել, մոտավորապես՝ եռամսյա տևողությամբ սկզբնական շրջանի համար, հետագայում, եթե ամեն ինչ բարեհաջող ընթանա, հնարավոր է՝ համագործակցությունը շարունակվի»,- հույս է հայտնում Տեր-Վարդանյանը:

Հարցին՝ իսկ ինչո՞ւ միանալ «Ապագա» հիմնադրամի ամենատարբեր ծրագրերին, հիմնադրամի գործադիր տնօրեն Ռոզա Սոլոմոնյանը պատասխանում է. «Որովհետև կառույցներ կան, որոնք տրամադրում են կրթաթոշակ, կառույցներ կան, որոնք տալիս են վարձավճար, «Ապագա» հիմնադրամը ամբողջությամբ փաթեթ է ներկայացնում և տալիս հնարավորություն՝ մեկ տեղում ստանալ այդ ամբողջ փաթեթը, վերջում՝ նաև հիմնական աշխատանք: Այսինքն՝ մենք տրամադրում ենք ուսման վարձի փոխհատուցում, ստեղծում հնարավորություն տարբեր թեմաներով թոփ մենեջերների կողմից դասընթացների մասնակցության, տրամադրում ենք նաև մասնագիտական պրակտիկա: Ովքեր կարողանում են հաջող անցնել այդ ողջ գործընթացը, ապահովում ենք հիմնական աշխատանքով: Անցյալ տարվանից 10 ուսանող ունենք, որոնք հաջողել են, անցել մասնագիտական աշխատանքի և այսօր արդեն հիմնական աշխատանք ունեն տարբեր կառույցներում»:

Ռոզա Սոլոմոնյանը նշում է, որ հիմնադրամը չէր կարող ծրագրեր իրականացնել, եթե չունենար աջակից կազմակերպություններ: Այդ իմաստով ծրագրի կայացմանը մեծ նպաստ է ունեցել «Ֆիլիպ Մորրիս» ինթերնեյշնլ ընկերությունը:

«Ֆիլիպ Մորրիս» ինթերնեյշնլ ընկերության հայաստանյան գրասենյակի արտաքին կապերի կառավարիչ Վիկտորիա Պողոսյանն էլ ուրախությամբ նշում է, որ «Ապագա» հիմնադրամի հետ «Ֆիլիպ Մորրիս»-ը տարբեր նախաձեռնությունների շուրջ աշխատել է մի քանի տարի, իսկ երբ իմացել է այս տարվա ծրագրի մասին՝ կապված կրթության ոլորտում ներդրման և արդիական լուծումների հետ, որոշել է անպայման դառնալ դրա մաս:

«Ընկերության համար կարևոր է իրականացնել ծրագրեր, որոնք աջակցում են երկրի տնտեսական զարգացմանը, իսկ այս ծրագիրը ևս տնտեսական զարգացման կոմպոնենտ է, որովհետև ինչքան նոր մասնագետներ ունենանք, ինչքան հնարավորություններ ստեղծենք ուսանողների համար՝ մուտք գործելու աշխատաշուկա, այնքան մեր տնտեսությունն ավելի կայուն ու զարգացած կլինի: Կարող եմ ասել, որ պետական սեկտորում աշխատանքը շատ կարևոր է, և շատ ուրախալի է, որ Ֆինանսների նախարարությունը միացել է ծրագրին:»,- ասում է նա:

«Կամպուս»-ը՝ Հայաստանում առաջին ուսանողական էկոհամակարգը, ևս միացել է «Ապագա» բարեգործական հիմնադրամի ծրագրին և համագործակցության շրջանակում փորձում է ծրագիրն ավելի հասանելի դարձնել ուսանողներին:

«Կամպուս»-ի համահիմնադիր Նարեկ Մարությանը նկատում է. «Համագործակցում ենք բոլոր համալսարանների հետ, որպեսզի այդ ամեն ինչը տարածենք, փորձում ենք ընդգրկել նոր գործընկերներ ու բոլոր ֆորմատներով: Ինքս, լինելով ուսանող, կարող եմ ասել, որ հնարավորություններ շատ քիչ են ընձեռվում: Ինչքան շատ լինեն նման ծրագրերը, այդքան ավելի շատ ուսանողներ կգտնեն պրակտիկայի հնարավորություն և ավելի կոմպետենտ մասնագետ կդառնան»: 

Առավել մանրամասն՝ տեսանյութում: