Հայաստանում տեղի կունենա HIF Yerevan 2025 միջազգային ներդրումային ֆորումը

Հունիսի 18-ին Երևանում տեղի կունենա HIF Yerevan 2025-ը, որը հյուրընկալության ոլորտի միտումների քննարկման և ներդրումային համագործակցության միջազգային առաջատար հարթակ է և նպատակ ունի խթանել Հայաստանի զբոսաշրջության և հյուրընկալության ոլորտի զարգացումը: Ֆորումը կազմակերպվել է երկխոսությունների միջոցով ներդրումների խթանման, ռազմավարական գործընկերությունների ձևավորման և կայուն զարգացմանը նպաստելու, ինչպես նաև տարածաշրջանի ու համաշխարհային հյուրընկալության քարտեզի վրա Հայաստանը՝ որպես մրցունակ ուղղություն, դիրքավորելու համար։

Ներդրումային ֆորումը կազմակերպում է «Stone Development» ընկերությունը: Մասնակցությունն անվճար է, անհրաժեշտ է նախապես գրանցվել և հաստատում ստանալ:

HIF Yerevan-ն անցկացվում է երկրորդ տարին անընդմեջ: HIF 2024-ի արդյունքում կնքվել է ներդրումային 2 պայմանագիր: HIF Yerevan 2025-ի շեշտադրումը կլինի նոր հյուրանոցային նախագծերի իրականացման, ռեզորտային անշարժ գույքի զարգացման, ռազմավարական ներդրումների ներգրավման, թվային լուծումների ներդրման և կայուն զարգացման ստանդարտների ինտեգրման վրա։

Հայաստանում հյուրընկալության ոլորտում ներդրումների հնարավորությունները կքննարկեն գործարարներ ԱՄՆ-ից, Մեծ Բրիտանիայից, Ֆրանսիայից, ԱՄԷ-ից, ՌԴ-ից, Չեխիայից, Վրաստանից, Կատարից, Ռումինիայից, Նիդերլանդներից, Բելգիայից, Շվեյցարիայից, Օմանից և այլ երկրներից՝ ներկայացնելով ոլորտի համաշխարհային առաջատար ցանցերը:

Միջոցառմանը բացման խոսքով և ելույթով հանդես կգան ՀՀ էկոնոմիկայի նախարար Գևորգ Պապոյանը, Հայաստանում ՄԱԿ-ի մշտական համակարգող Ֆրանսուազ Ժակոբը, իսկ հատուկ հյուրերի թվում են JTA International Investment-ի գործադիր տնօրեն Ամիր Ալի Սալեմի Զադեն, Տնտեսական համագործակցության և զարգացման կազմակերպության (OECD) զբոսաշրջության Կոմիտեի նախագահ Սերժիո Գերեյրոն: Նրանց ելույթները միջազգային համագործակցության համաշխարհային միտումների, ոլորտում ռազմավարական ներդրումների, երկարաժամկետ կապիտալի ներգրավման և կայուն աճի աջակցության թեմայով են։

Ֆորումին կմասնակցեն ՀՀ Զբոսաշրջության կոմիտեի, ՄԱԿ-ի Զարգացման ծրագրի հայաստանյան գրասենյակի, Համաշխարհային բանկի (WB), Միջազգային ֆինանսական կորպորացիան (IFC), Վերակառուցման և զարգացման եվրոպական բանկի (EBRD), Գերմանական միջազգային համագործակցության ընկերության (GIZ), առաջատար միջազգային գործարար ասոցիացիաների, ոլորտի առաջատար ընկերությունների ներկայացուցիչները:

Ներդրումային ֆորումի գլխավոր գործընկերներն են՝

• Ամերիաբանկ՝ ֆինանսական և տեխնոլոգիական առաջատար հաստատություն, վարկային պորտֆելով Հայաստանի խոշորագույն բանկը,
• Cushman & Wakefield՝ Հյուրանոցային խորհրդատվության առաջատար ընկերություն Կենտրոնական և Արևելյան Եվրոպայում, որն առաջարկում է ռազմավարական լուծումներ անշարժ գույքի ոլորտում,
• Myler Mountain Resort` («Մայլեռ Մաունթին Ռեզորթ») ժամանակակից լեռնադահուկային համալիրը Հայաստանում, որը զբոսաշրջության ոլորտի ամենախոշոր և երկարաժամկետ բազմափուլ ներդրումային նախագծերից է,
• TK Elevator (TKE)՝ վերելակների և շարժասանդուղքների արտադրող առաջատար գերմանական ընկերություն (նախկինում՝ ThyssenKrupp), Հայաստանում պաշտոնական և բացառիկ ներկայացուցիչ` BASSEN:

Ներդրումային ֆորումի ռազմավարական գործընկերներն են Aimbridge-ը, AIM Foundation-ը, Green Rock-ը, IDeA Foundation-ը և Stellar Hotels-ը։

HIF 25-ի մասնակիցների թվում են՝ ներկայացուցիչներ Accor, Hilton, Hyatt, IHG, Marriott, Radisson, Wyndham միջազգային հյուրանոցային ցանցերից, փորձագետներ Լոզանի հյուրանոցային մասնագիտացված դպրոցից, ինչպես նաև ներդրումային ֆոնդերի, բանկերի, ճարտարապետական, խորհրդատվական, զբոսաշրջային ընկերությունների ներկայացուցիչներ, որոնք հետաքրքրված են Հայաստանում նախագծերի իրականացմամբ։

Hospitality Investment Forum Yerevan 2025-ը կդառնա պրակտիկ հարթակ նոր նախագծերի իրականացման, բիզնես գործընկերության զարգացման և երկրի ներդրումային գրավչության ներկայացման համար։

Ֆորումի աշխատանքային լեզուն անգլերենն է, կապահովվի համաժամանակյա թարգմանություն հայերենով և ռուսերենով: