Արարատյան դաշտի ակուլաները

22/03/2014 schedule15:15

Մեր թերթի նախորդ համարում գրել ենք, որ Արարատյան դաշտում գործող ձկնաբուծական տնտեսությունների կողմից անխնա ջրառի արդյունքում Արարատյան արտեզյան ավազանը ամբողջությամբ ցամաքելու եզրին է: Բանն այն է, որ կան շատ խոշոր տնտեսություններ, որոնք շատ մեծ ջրօգտագործում են իրականացնում, որոնց թիկունքում սեփականատիրոջ կարգավիճակով կանգնած են հանրությանը ոչ անհայտ դեմքեր:

Ըստ որոշ խոսակցությունների, եւ այդ մասին խոսում են իրազեկ շրջանակներում, ամենախոշոր ձկնաբուծարանների սեփականատերը ԱԺ պատգամավոր Սամվել Ալեքսանյանն է՝ «Ալեքս Գրիգ» ընկերությունով, որը ձուկ է մատակարարում իրեն պատկանող «Երեւան սիթի» սուպերմարկետների ցանցին եւ ոչ միայն: Մասիսի տարածաշրջանում Ալեքսանյանը ձկնաբուծության «արքա» է: Նա մոտ 10 հա տարածք զբաղեցնող տնտեսություն ունի Արարատի մարզի Սիս համայնքում:   

Ամիսներ առաջ բնապահպանության նախարարությունը լուծարեց մի քանի հայտնիների ձկնաբուծարանների ապօրինի խորքային հորերը: Խոսքը «Մխչյան ֆիշ», «Ալեքս Գրիգ», «Էկո ֆիշ», «Էմի ֆիշ» եւ «Ռոյալ պարադիս» ընկերությունների մասին է: «Մխչյան Ֆիշ»-ը պատկանում է ԱԺ նախագահ Հովիկ Աբրահամյանի ընտանիքին եւ գրանցված է Աբրահամյանների ծննդավայր Մխչյան գյուղում: Այս ընկերությունը մեր երկիր ձկան կեր ներկրող ամենախոշոր ընկերություններից մեկն է:

Ձկնարտադրությամբ զբաղվող մեկ այլ ընկերություն նույնպես պատկանում է Աբրահամյան ընտանիքին: Խոսքը «Մխչյան ֆիշ ֆուդ» ընկերության մասին է, որի հիմնադիրը, ըստ էլեկտրոնային ռեգիստրի կայքի, ԱԺ նախագահի եղբայր Հենրիկ Աբրահամյանն է:

«Էկո ֆիշ» եւ «Էմի ֆիշ» ընկերությունները բնապահպանները կապում են ԲՀԿ առաջնորդ Գագիկ Ծառուկյանի անվան հետ: Այս մասին հրապարակում է եղել նաեւ 168.am կայքում: «Ռոյալ Պարադիս» ՍՊԸ-ն, կրկին ըստ մամուլի տեղեկությունների, Հովտաշատ համայնքի ղեկավար Հովիկ Թադեւոսյանինն է: Սակայն եթե հաշվի առնենք, որ Թադեւոսյանը ԲՀԿ անդամ է, «Էկոֆիշ թրեյդ» հիմնադիրներից, չի բացառվում, որ «Ռոյալ Պարադիս» ձկնաբուծարանը նույնպես իրականում պատկանում է Ծառուկյանին: Ըստ լուրերի, վերջինս Արարատի մարզի Սայաթ-Նովա գյուղում իր խնամի Հովիկ Աբրահամյանի հետ համատեղ ձկնաբուծարան է հիմնել: Տեղեկություններ կան, որ նրանք համատեղ ձկնաբուծարաններ ունեն նաեւ Զորակ համայնքում: Սա, ըստ բնապահպանների ունեցած տեղեկությունների, Մասիսի տարածաշրջանի ամենամեծ ձկնաբուծարանն է:

Արարատի մարզի Նորամարգ գյուղում 8 խորքային հոր է շահագործում «Սպիտակ դելֆին» ընկերությունը, որը պատկանում է Երեւանի Շամպայն գինիների գործարանի սեփականատեր Հրայր Հակոբյանին: Ընդամենը 3-4 տարի առաջ հանրապետության խոշոր ջրօգտագործողներից մեկը ԱԺ ԲՀԿ խմբակցության նախկին պատգամավոր Գոհար Ենոքյանին պատկանող «Բեգաս ֆիշ» ընկերությունն էր: Այն չի գործում այլեւս, մեր ենթադրությամբ՝ նոր խոշորների հետ մրցակցությանը չդիմանալու արդյունքում: 

«Հետք» պարբերականը դեռ 2010-11 թվականներին գրել է այն մասին, որ Արարատի մարզում 5 խորքային  ձկնաբուծարան ունի ԱԺ ՕԵԿ խմբակցության նախկին պատգամավոր, Երեւանի ավագանու «Բարեւ Երեւան» խմբակցության անդամ Գագիկ Բաղդասարյանի եղբայր Արթուր Բաղդասարյանը: Նրա տնտեսությունում 5 խորքային հոր կա: Պարբերականը ժամանակին գրել է, որ Արմավիրի մարզում ջրօգտագործող խոշոր ընկերություն ունի նաեւ Ձկնաբույծների միության նախկին նախագահ Արկադի Գեւորգյանը: Նրան պատկանող «Ակվատեխավտոմատիկա» ընկերությունը Գայում օգտագործում է 9 հոր: Գեւորգյանը 7 հորատանցք է օգտագործում նաեւ Արաքս գյուղում, եւս 3-ը՝ Արարատի մարզի Սիս գյուղում: Սակայն ինչպես մեզ հետ զրույցում հայտնեց Սիսի գյուղապետ Արմեն Եղյանը, Գեւորգյանն այս համայնքի իր ձկնաբուծարանը փակել է եւ այլեւս չի օգտագործում: Եղյանը հաստատեց, որ Սիսում ձկնաբուծարաններ ունի նաեւ Սամվել Ալեքսանյանը:

Մեր դիտարկումները ցույց են տալիս, որ «խոշորները» չեն բավարարվել սեփական բիզնես հիմնելով, որոշակի «փայ»-ից օգտվելու հնարավորություն են տվել նաեւ իրենց ծառայություն մատուցած կուսակցական ընկերներին, փոքրումիջին չինովնիկներին: Այսպես, Հայանիստի նախկին համայնքապետ Գուրգեն Մարտիրոսյանը, այդ գյուղում 14 ավազան ունի: Ի դեպ, 24 տարի գյուղապետ աշխատած Մարտիրոսյանի ձկնաբուծարանի գործունեության արդյունքում է նաեւ, որ նրա հարազատ համայնքն այսօր առանց ոռոգման է մնացել: Դա քիչ է, Մարտիրոսյանն իր բիզնեսում ներգրավել էր նաեւ իր մերձավորներից մեկին՝ ոստիկանության կազմակերպված հանցավորության դեմ պայքարի գլխավոր վարչության բաժիններից մեկի արդեն նախկին ղեկավար Գագիկ Բադալյանին: Վերջինս էլ առանձին ջրավազաններ ուներ: Հայանիստի գյուղապետ Բալաբեկ Սարկիսյանը մեզ հայտնեց, որ Բադալյանն իր ձկնաբուծարանները լուծարել է, բայց նախկին գյուղապետ Գուրգեն Մարտիրոսյանը շարունակում է բիզնես գործունեությունը մոտ 0,5 հեկտար տարածքում: Նախկին ու ներկա ձկնաբուծարանների աշխատանքը հանգեցրել է նրան, ըստ Սարկիսյանի, որ այսօր համայնքի մոտ 390 հա այգիներից 900-ը մնացել են առանց ոռոգման:

Իրավիճակն Արարատյան դաշտում փրկելու նպատակով կառավարությունը առաջարկում է Սեւանա լճից բացթողնման տարեկան չափաքանակը 170 միլիոն խմ-ից դարձնել 240 միլիոն խմ, այսինքն՝ լճից լրացուցիչ 70 միլիոն խմ ջուր բացթողնել, Արարատյան դաշտի ավելի քան 30 ջրազրկված համայնքների այգիների ոռոգման համար: Բնապահպանական կազմակերպությունները դեմ են այս նախագծին: Նրանց մի մասը պնդում է, որ օլիգարխների ձկնային բիզնեսի պատճառով Հայաստանի քաղցրահամ ջրերի ռազմավարական պաշարից չպետք է ավելորդ ջուր օգտագործվի: Նախօրեին նախագիծը քննարկվում էր ԱԺ գյուղատնտեսության եւ բնապահպանության հարցերի հանձնաժողովում: Ներկաների թվում էին Արմավիրի մարզպետ Աշոտ Ղահրամանյանը եւ բնապահպանության նախարար Արամ Հարությունյանը: Նրանք մեզ հետ զրույցում խուսափեցին Արարատյան դաշտում ձկնաբուծությամբ զբաղվող հայտնիների անունները նշել: Երբ զրուցում էինք մարզպետի հետ, նրա հետ ԱԺ եկած գյուղապետերը կողքից մի հետաքրքիր դիտարկում արեցին. «Արմավիրում ինքնաշատրվանող հորեր չեն մնացել, որ ձկնաբուծարան էլ լինի»: Իսկ Աշոտ Ղահրամանյանը նշեց. «Ոչ մի պատգամավոր մեր մարզում չունի ձկնաբուծարան: Հիմնական ձկնաբուծությունը կատարվում է Մասիսի տարածաշրջանում (Արարատի մարզում է - Գ. Ա. )»: Մարզպետը ասաց, որ բնապահպանության նախարարությանը իրավիճակի համար պատասխանատու է համարում: Բնապահպանության նախարարը մեր հարցին՝ պաշտոնապես նշել, թե հանրությանը հայտնի խոշոր գործարարներից, պատգամավորներից ովքեր են ձկնաբուծական բիզնեսով զբաղվում Արարատյան ավազանում, այլ կերպ արձագանքեց. «Մեզ չի հետաքրքրում, թե ովքեր են»: Մեր հարցին՝ իսկ միգուցե Արարատյան արտեզյան ավազանում իրավիճակն աղետալի է դարձել, քանի որ բնապահպանության նախարարությունը ոմանց ճնշումներին անսալով չափից դուրս ջրօգտագործման թույլտվությո՞ւն է հատկացրել, նախարարը պատասխանեց. «Չկան մարդիկ, որ մեզ վրա կարող են ազդել: Ես անձերի անուններով չեմ առաջնորդվում: Մենք պատժում ենք կազմակերպություններին, անկախ նրանից, թե դա ումն է»: Փաստն այն է, որ բնապահպանության նախարարի սարսափազդու պատիժների պատճառով Արարատյան դաշտի արտեզյան ավազանը կանգնած է աղետի եզրին:

Տպել
3137 դիտում

Փոխվարչապետ Տիգրան Ավինյանը մասնակցել է հայ-վրացական իրավական համագործակցության երրորդ ֆորումին

Հրազդանի բժշկական կենտրոնում հրդեհային անվտանգության կանոնների մի շարք թերություններ և խախտումներ են հայտնաբերվել

Վերահաստատում եմ իմ ակտիվ մասնակցությունն ընտրապայքարին, Արցախում ֆեյքային գզվռտոց չի լինելու. Արցախի ԱԳ նախարար

Գողացված բանկային քարտով կանխիկացման փորձ է արվել (տեսանյութ)

Թուրքիայում ստեղծվել է «1915.gov.tr» կայքը՝ Հայոց ցեղասպանության պնդումների դեմ պայքարելու համար

Սարհատ Պետրոսյանի հայտարարություններից հետո նախապատրաստված նյութերով քրգործի հարուցումը մերժվել է

Ճիշտն ասած՝ ինձ խաբեցին. Թլիկում պարտված միակ թեկնածու

Սահմանապահ գյուղերում 2020-ից ամեն ծնվող երեխայի համար 1000 դոլար կտրվի, ևս 100 հազ. դրամ՝ ամսական

Եթե հանկարծ նկատեք, որ բարեւների առումով ժուժկալ եմ դարձել, չմտածեք, թե մեծամտացել եմ․ Փաշինյան

ՀՀ վարչապետն ու բարձրաստիճան պաշտոնյաները ծաղիկ են խոնարհել Ծիծեռնակաբերդում (լուսանկարներ)

Գյումրի քաղաքում մասնակի փլուզվել է տան պատը. տուժածներ չկան

Արտակարգ դեպք Երևանում. Շենգավիթում որդին կասկածվում է մոր նկատմամբ բենզինով սպանության փորձ կատարելու մեջ

Դեկտեմբերի 10-ին հեռարձակման թվային ցանցում կկատարվեն պրոֆիլակտիկ աշխատանքներ

Ոմանք կոռուպցիայի դեմ պայքարը պատկերացնում են՝ համերգ հեռուստադիտողի հայտով․ վարչապետը՝ Սերժ Սարգսյանի մեղադրանքի մասին

Ռոբերտ Քոչարյանի պաշտպանները բողոքարկել են Աննա Դանիբեկյանի՝ ինքնաբացարկի միջնորդությունը մերժելու որոշումը

ԱԺ-ն ամբողջությամբ ընդունեց վարորդների համար բալային համակարգի ներդրման մասին օրինագիծը

ԱԺ-ն ամբողջությամբ ընդունեց նոր ուղղություններով չվերթով մեկնող անձանց օդի տուրքից ազատելու նախագիծը

Վաղը Երևանի և Արարատի մարզի որոշ հասցեներում ջրամատակարարումը 24 ժամով կդադարեցվի

Ալաշկերտի համայնքապետ է վերընտրվել ՊԵԿ փոխնախագահի հայրը

ԱԺ-ն առաջին ընթերցմամբ ընդունեց զինծառայությունից նաեւ 5 տարի անց հաշմանդամության կարգ տալու մասին օրինագիծը