Սեյրան Օհանյանի ֆալշստարտը

29/05/2015 schedule12:56

Պաշտպանության նախարար Սեյրան Օհանյանի կինը՝ «Զինվորական բժիշկների հայկական ասոցիացիա» հասարակական կազմակերպության նախագահ Ռուզաննա Խաչատրյանը, ով հայտնվել է մեծ սկանդալի կենտրոնում, երեկ, լսելով, որ իրեն լրագրող է զանգում, անջատեց հեռախոսը:

Հետո էլի անջատեց: Հետո էլ՝ լրիվ անհասանելի դարձավ: Այսօր նրա փաստաբան Կարեն Մեժլումյանը պատրաստվում է հանդես գալ մամուլի ասուլիսով: Երեկ մեզ հետ զրույցում նա հաստատեց տեղեկությունները, որ Սեյրան Օհանյանի կինը դատի է տվել «Հրապարակին» եւ պատրաստվում է դատի տալ «Հայկական ժամ» անունով լրատվամիջոցին՝ իր պատիվն ու արժանապատվությունը պաշտպանելու պահանջով: Ռուզաննա Խաչատրյանի փաստաբանը հայտարարում է, որ «Հրապարակը» տեղեկություն է տարածել այն մասին, թե իբր Ռուզաննա Խաչատրյանը տարիներ առաջ վարել է իր մտերիմ ընկերոջ մեքենան եւ ջախջախել այն՝ դառնալով վերջինիս մահվան պատճառը, եւ փորձ չի արել նման տեղեկություն տարածելուց առաջ դրա իսկությունը ճշտել Ռ.Խաչատրյանից: Իսկ երբ վերջինս, ըստ փաստաբանի, նշված կեղծ եւ զրպարտող տեղեկատվությունը հերքելու մասին պատասխան է ուղարկել «Հրապարակին», լրատվամիջոցը ոչ թե հերքել է այն կամ պատասխանը հրապարակել, այլ հղում անելով «Հայկական ժամին»՝ եւս մի նյութ հրապարակել, որտեղ տեղադրված է ողբերգական մահով մահացած Հովիկ Հայրապետյանի լուսանկարը եւ որտեղ Ռ.Խաչատրյանը մեղադրվում է նրանում, որ ինքն է վարել այն ավտոմեքենան, որի վթարից 2002 թվականին մահացել է հայտնի գործարարը: Պաշտպանության նախարարի կնոջ փաստաբանը մեզ ուղարկեց հանգուցյալ Հայրապետյանի ընտանիքի հայտարարությունը, որում, մասնավորապես, ասվում է. «Որոշ համացանցային լրատվամիջոցներ վերջերս ստահոդ եւ կեղծ տեղեկատվություն են սպրդում ՀՀ պաշտպանության նախարար Սեյրան Օհանյանի եւ նրա տիկնոջ՝ Ռուզաննա Խաչատրյանի վերաբերյալ: Այդ կեղծիքները հատկապես տարածվում են hzham կայքում, որը սահմանազանցելով բարոյականության բոլոր նորմերը՝ փորձում է մեր ընտանիքի հանգուցյալ հոր՝ Հովիկ Հայրապետյանի ողբերգական մահը կապել Ռուզաննա Խաչատրյանի անվան հետ այն դեպքում, երբ նա որեւէ առնչություն չունի այդ դեպքի հետ»: Նկատենք, որ Ռ.Խաչատրյանի անվան շուրջ աղմուկը սկսվեց նրա կողմից վերջին շրջանում դրսեւորվող ակտիվությունից (հարցազրույցներ, հանրային միջոցառումների մասնակցություն, լուսանկարների հրապարակում սոցիալական ցանցերում եւ այլն),  ինչպես նաեւ Հանրային հեռուստատեսությամբ հեռարձակված «Գործից դուրս» Սեյրան Օհանյանի հետ PR մեծ հաղորդումից հետո: Լրատվամիջոցները արձանագրեցին, որ Սերժ Սարգսյանի «ժառանգորդ» օպերացիան սկսված է. Սեյրան Օհանյանը համարվում է 2018 թվականի նախագահական ընտրություններում իշխանական ամենահավանական թեկնածուն: Իսկ «Հայկական ժամ» անունով էլեկտրոնային լրատվամիջոցը թիրախավորեց Օհանյանին ու նրա տիկնոջը՝ ակնարկներ անելով վերջինիս եւ հանգուցյալ գործարարի հարաբերությունների, Ռուզաննա Խաչատրյանի թանկարժեք գնումների եւ այլնի մասին: Քաղաքական կուլիսներում կարծիքներ են հնչում, թե այդ ամենը կապված է իշխանության ներսում «ժառանգորդի» «տիտղոսին» արժանանալու պայքարի հետ: Տեւական ժամանակ իշխանության ներսում նման պայքար էր ընթանում մի քանի անձերի միջեւ: Շրջանառվում էին գործող վարչապետ Հովիկ Աբրահամյանի, նախկին վարչապետ Տիգրան Սարգսյանի, ՍԴ նախագահ Գագիկ Հարությունյանի, Մեծ Բրիտանիայում ՀՀ դեսպան, նախկին վարչապետ Արմեն Սարգսյանի եւ Սեյրան Օհանյանի անունները: Ի վերջո, ըստ տեղեկությունների, Սերժ Սարգսյանի ընտրությունը կանգ առավ Սեյրան Օհանյանի վրա: Երեկ, երբ Ռուզաննա Խաչատրյանի փաստաբանին հարցրեցինք՝ ձեր կարծիքով, այն ամենը, ինչ հիմա կատարվում է Ռուզաննա Խաչատրյանի շուրջ, որեւէ կապ ունի՞ այն խոսակցությունների ու տեղեկությունների հետ, որ Սեյրան Օհանյանը դառնալու է Սերժ Սարգսյանի ժառանգորդը, այսինքն՝ քաղաքական տարր դուք իրականում այդտեղ տեսնո՞ւմ եք, թե ոչ՝ փաստաբանը պատասխանեց. «Ես քաղաքական հարցերի չեմ պատասխանելու: Իսկ իրավական հարցերին կպատասխանեմ միայն վաղը»: Հանրապետականները եւս խուսափում են սույն հարցի պատասխանից: ԱԺ ՀՀԿ խմբակցության ղեկավար Վահրամ Բաղդասարյանը իշխանության ներսում ժառանգորդ դառնալու պայքարի եւ Օհանյանի ու նրա կնոջ շուրջ ծավալված սկանդալի վերաբերյալ ընդամենը ասաց. «Ես կանանց հարցերով չեմ զբաղվում, իսկ Սեյրան Օհանյանն իր տեղում է եւ ճիշտ աշխատում է, ես այդքանը կարող եմ ասել»: 

Ինքը՝ Սեյրան Օհանյանը, նախօրեին դիմել է ՀՀ գլխավոր դատախազ Գեւորգ Կոստանյանին, նշել, թե իր կնոջ մասնակցությամբ վթարի, Ֆրանսիայում հիվանդանոց, թանկարժեք մուշտակ ձեռք բերելու եւ մյուս լուրերը սուտ են, ապատեղեկատվություն, նպատակ ունեն զրպարտելու իրեն եւ իր ընտանիքին, խնդրել է պարզել տեղեկությունների իսկությունը, իսկ եթե պարզվի, որ դրանք սուտ են, ճշտել դրանք տարածողի ինքնությունը եւ պատասխանատվության ենթարկել: Երեկ էլ Սարդարապատում, պատասխանելով news.am-ի հարցին, ասել է. «Իրականությունն այնպիսին է, որ ես երբեւիցե այդպիսի հերյուրանքների, բացահայտ ստերի պայմաններում սադրանքի չեմ ենթարկվում: Ես ամեն ինչ հասկանում եմ, եւ բոլոր գործողությունները պետք է լինեն օրինականության դաշտում, օրենքի շրջանակում»:

Թե ինչպե՞ս կավարտվի այս սկանդալը՝ թերեւս, դեռ վաղ է եզրակացնել: Բայց այն, որ «ժառանգորդ» օպերացիան անհաջող հուն է մտել, թերեւս՝ ակնհայտ է:

Տպել
10411 դիտում

Մեր բժշկագիտական թիմի ներուժն ու ներդրումը պետք է չանտեսվեր. «Նորք» ԻԿՀ-ից բաց նամակ ՀՀ նախագահին և վարչապետին

Քննարկվել են հեղինակային իրավունքի ոլորտում առկա խնդիրները եւ դրանք լուծելու ուղիները

Դավիթ Բաբայանը վարակվել է կորոնավիրուսով ու խնդրանքով դիմել իր հետ շփված անձանց

Սուրեն Պապիկյանը ԱԷՄԳ գլխավոր տնօրենի հետ քննարկել է Հայաստանի ատոմային էներգետիկայի բնագավառի զարգացման հարցեր

«Խաժակյանի պատմության հետ ինքներդ կարող եք համեմատություն անել». քաղաքապետի վարորդի հաստիքն ազատ է

roadpolice.am. վարորդական վկայականի հետ կապված գործողությունների համար պետք է հերթագրվել այս կայքի միջոցով (տեսանյութ)

Մարտական հերթապահության մեկնող անձնակազմի հետ անցկացվել է կրակային պատրաստության պարապմունք

Գեբելսյան սո՞ւտ է, որ ԲՀԿ-ն կարող է իշխանություն փոխել․ քաղաքական ուժերի արձագանքը ՀՀ՝ մինչեւ 2050-ի ռազմավավարությանը

Առաջին անգամ ՀՀ ՄԻՊ-ն ու ԵԽ-ն ծրագիր են իրականացնում Եվրոպայի խորհրդի տարածքում

Իսրայելի ռազմարդյունաբերական ընկերությունը 155 միլիոն դոլար է փոխանցել ադրբեջանական 2 օֆշորային ընկերությունների

Արսեն Թորոսյանը Չինաստանի դեսպանի հետ քննարկել է ՀՀ առողջապահական համակարգը նոր սարքավորումներով հագեցնելու հեռանկարները

Հրազդանում խաչքարն ընկել է 52-ամյա տղամարդու վրա. վերջինս տեղում մահացել է

Մանուել Պետրոսյանը՝ «Երևանի գավաթ» մրցաշարի հաղթող

Երևանում և մարզերում ՃՈ-ն հատուկ պահպանվող տարածք է տեղափոխել 247 տրանսպորտային միջոց (տեսանյութ)

Կայացել է Հայ-ամերիկյան ռազմավարական երկխոսության նիստի խորհրդակցությունների բազմաոլորտ համագործակցության մասին նիստը

Վանեցյանը, Ծառուկյանը, Մինասյանը պատրա՞ստ են աշխատել վարչապետ. Կարեն Սիմոնյան (տեսանյութ)

Արսեն Թորոսյանը հեռախոսազրույց է ունեցել ՌԴ դաշնային ծառայության ղեկավար Աննա Պոպովայի հետ

Արմավիրի Չերեմուշկա թաղամասում քաղաքացին սպառնում է ինքնասպան լինել

Մեկնարկել են Քարվաճառ տանող մոտ 17 կմ երկարությամբ ճանապարհի ասֆալտապատման աշխատանքները

Գոռ Երիցյանն ու Նարեկ Աբգարյանը կմարզվեն Մայք Թայսոնի մարզչի մոտ