Հլը սրան տարեք ստեղից. Նեմեց Ռուբո

18/08/2015 schedule10:16

 

ՀՖՖ նախագահ, ԱԺ նախկին պատգամավոր Ռուբեն Հայրապետյանի թիկնազորը շաբաթ օրը երեկոյան ծեծի էր ենթարկել գործարար, «Էյր Արմենիա» ընկերություն 51 տոկոսի բաժնետեր Արսեն Ավետիսյանին: Ավետիսյանի կինը՝ Իզաբելլա Մելքումյանը, երեկ «ՀԺ» թղթակցին հայտնել է, որ իր ամուսնուն ծեծել եւ առեւանգել են անձամբ Ռուբեն Հայրապետյանի հրահանգով: Դեպքը տեղի է ունեցել Ռուբեն Հայրապետյանին պատկանող «Հարսնաքար» հյուրանոցային համալիրի հարեւանությամբ՝ ֆուտբոլի ակադեմիայի բացօթյա լողավազանի սրճարանում, բազմաթիվ մարդկանց աչքի առջեւ: Արսեն Ավետիսյանը գտնվում է Հերացու անվան թիվ 1 հիվանդանոցային համալիրում: Հիվանդանոցի մամուլի խոսնակ Ալեքսանդրա Հարությունյանը «ՀԺ»-ին փոխանցել է, որ գործարարը գնվում է դիմածնոտային վիրաբուժության բաժանմունքում, ունի քթոսկրի կոտրվածք՝ թեթեւ տեղաշարժով, ազդրերի եւ թիակի շրջանում՝ սալջարդ, վիճակը կայուն բավարար է: Դեպքի առթիվ, սակայն, քրեական գործ չի հարուցվել: Ոստիկանությունից մեր թղթակցին հայտնել են, որ կատարվում է հետաքննություն:  

 

«Այ քեզ բա՛ն: Հիսուն անգամ ասել եմ`ես ժուռնալիստի հետ հեռախոսով չեմ շփվում»,- երեկ ասաց ՀՖՖ նախագահ Ռուբեն Հայրապետյանն ու անջատեց հեռախոսը, երբ ցանկանում էինք հարցնել, թե ինչու են իր թիկնազորի անդամները ծեծի ենթարկել եւ առեւանգել գործարար Արսեն Ավետիսյանին:

«Էյր Արմենիա» ընկերության 51 տոկոսի բաժնետեր եւ տնօրեն Արսեն Ավետիսյանի կինը՝ Իզաբելա Մելքումյանը, մեզ հետ զրույցում պատմեց, որ «Էյր Արմենիան» պարտք է եղել ոմն Գառնիկ Պապիկյանին պատկանող «Ալլա ինթերնեշնլ» ընկերությանը, որը գրանցված է Արաբական Միացյալ Էմիրություններում: Պապիկյանը դիմել է Ռուբեն Հայրապետյանին, որպեսզի վերջինս ստանա պարտքը: Օգոստոսի 15-ին Ավետիսյանին ժամադրել են ֆուտբոլի ակադեմիայի լողավազանի սրճարանում, որտեղ էլ ծեծի են ենթարկել եւ, ըստ Իզաբելա Մելքումյանի, զենքի ճնշման տակ առեւանգել:

- Տիկին Իզաբելա, ձեր ամուսնուն ո՞վ է զանգել, ժամադրել:

- Առաջին անգամ, երբ հանդիպումը տեղի է ունեցել 1 ամիս առաջ, ժամադրել է Գառնիկ Պապիկյանը: Եկել, ասել է` արի մի հատ գնանք, Նեմեցի հետ հանդիպենք, իրեն եմ փոխանցել պարտքը: Գնացել, հանդիպել են, որից հետո պայմանավորվել են օգոստոսի 15-ին նորից հանդիպել, բայց արդեն ամուսինս եղել է մենակ, Ռուբեն Հայրապետյանը եղել է զորքով:

- Առաջին հանդիպմանը երեւի ժամկե՞տ է ուզել ձեր ամուսինը, որպեսզի պարտքը մարի:

- Ոչ, ամուսինս առաջին անգամն էլ չի ընդունել, որ այդ պարտքը Ռուբեն Հայրապետյանինն է, ասել է՝ ես քեզ պարտք չեմ, պարտքը «Ալլա ինթերնեշնլինն» է: Մեր ընկերության պարտքի հետ Հայրապետյանը ոչ մի առնչություն չունի:

- Իսկ ինչպե՞ս է այդ պարտքը գոյացել:

- Ինքնաթիռի վարձակալությունից. մեր ընկերությունը «Բոինգ» է վարձակալել Գառնիկ Պապիկյանին պատկանող «Ալլա ինթերնեշնլից»: Որոշ ժամանակ հետո սկսվել են ֆինանսական դժվարություններ, ու պարտք է գոյացել, որը թղթով գրված է՝ հստակ, այսինքն, ոչ ոք չի հրաժարվում այդ պարտքից, ոչ մի նման խնդիր չի եղել:

- Որքա՞ն գումարի է մասին է խոսքը:

- Չգիտեմ, տեղյակ չեմ:

- Ռուբեն Հայրապետյանն անձամբ ներկա՞ է եղել միջադեպին:

- Իհարկե, ինքն է առաջինը թեւից քաշել, որպեսզի տանեն ամուսնուս: Նստած են եղել Ռուբեն Հայրապետյանն ու ամուսինս: Երբ ամուսինս ասել է` ես քեզ պարտք չեմ, ես պարտք եմ այս ընկերությանը, Հայրապետյանը բարկացել է, ձեռքից քաշել է, ասել է` հլը սրան տարեք ստեղից, որ տանեն ուրիշ, ինչ-որ փակ տեղ, այդ պահին ամուսինս ասել է` ձեռքս թող, ու 7- 8 հոգով հարձակվել են, սկսել են ծեծել ամուսնուս: Երբ ծեծուջարդը սկսվել է, լողավազանում գտնվող մարդիկ շփոթված փախել են՝ տարածքից հեռացնելով երեխաներին: Այսինքն, դեպքը բազմաթիվ մարդիկ են տեսել, բայց, իհարկե, ոչ ոք ցուցմունք չի տա:

- Ռուբեն Հայրապետյանն է՞լ է խփել, թե՞ մենակ քաշել է թեւից:

- Չէ, նա չի խփել, դրա համար ինքը ունի բազմաթիվ անձինք, որոնք մի հրամանով կատարում են այդ ամենը: Ծեծելուց հետո ամուսնուս քարշ են տվել, չգիտեմ ուր են տարել՝ այդ տարածքում, որտեղ էլի բազմաթիվ մարդիկ են եղել` թիկնապահներ, ընկերներ, Հայրապետյանն ասել է` մինչեւ չգրես, որ ինձ ես պարտք, այստեղից դուրս չես գա: Ինձ ամուսնուս եղբայրը զանգեց, ասաց` շատ վատ է վիճակը: Ես գիտեի, որ ինքը պիտի գնա հանդիպման, բայց ոչ ոք չէր մտածում, որ կարող է նման ձեւով ավարտվի: Ինքը մենակ գնացել է՝ տղամարդը տղամարդու հետ խոսելու: Ես միանգամից զանգել եմ լրատվամիջոցներին, ոստիկանություն, ու կոնկրետ չգիտեմ որ լրատվամիջոցի կողմից զանգ է եղել այդ մարդկանց, որից հետո ամուսնուս հանդեպ վերաբերմունքը փոխվել է: Ասել են` հեռախոսը վերցրու, զանգի կնոջդ, ասա` էս ի՞նչ շուխուռ է արել, թող ստոպ տա այս ամեն ինչին, ամուսինս զանգեց ինձ, բայց ես միանգամից հասկացա, որ այն չէ, միայն հարցրել եմ` Արսեն, կարողանո՞ւմ ես այդտեղից դուրս գաս, ասաց` չէ: Ու դրանից հետո ես ավելի բուռն ձեւով եմ շարունակել բոլորին ասել, տարածել: Հետո նրան ինչ-որ մեքենայով իջեցրել են շրջակայքում, գնացել:

- Քանի՞ ժամ է նրանց մոտ մնացել:

- Դժվարանում եմ կոնկրետ ասել, ընդհանուր առմամբ, ենթադրում եմ, որ մի 2 ժամ է տեւել ամբողջը: Ամուսնուս եղբայրները, քեռու տղաներն են վերցրել, տարել հիվանդանոց:

- Ռուբեն Հայրապետյանենք չե՞ն փորձե՞լ դեպքից հետո հաշտվել, զանգ կամ այց չի եղել:

- Եկեք ես չպատասխանեմ այդ հարցին:

- Իսկ Գառնիկ Պապիկյանն ի՞նչ շրջանակներից է, նրա հովանավորն ո՞վ է:

- Ես չգիտեմ: Ինքս տեղյակ չեմ: Ենթադրում եմ, որ չկա:

- Այս ընթացքում սպառնալիքներ ստացե՞լ եք:

- Չգիտեմ, սպառնալիք է, թե` ոչ, առաջին հանդիպմանը Հայրապետյանն ասել է` քեզ պետք է լավ նայենք, թե չէ քեզ որ մի բան լինի, երեխեքդ են փակելու էդ փողը: Իմ ամուսինը գործարար է, այդ աշխարհի հետ ընդհանրապես շփում չի ունեցել ու մեկ էլ... իմ մտքով չէր անցնում, որ նման բան կարող է լինել: Փոքրիկ երեխաներ ունենք, սարսափի մեջ եմ:

- Ձեր ամուսինն արդեն ցուցմունք տվե՞լ է:

- Նա ի վիճակի չէ ցուցմունք տալու, քիթը կոտրած է, քայլել չի կարողանում, բժիշկներն ասել են, որ քայլել չի կարելի, լարվել չի կարելի, խնդրել է, որ այսօր հանգստանա, ես եմ ցուցմունք տվել, ինչ գիտեմ՝ ամեն ինչ պատմել եմ: 

- «Էյր Արմենիան» կառավարության աշխատակազմի ղեկավար, նախարար Դավիթ Հարությունյանի անվան հետ էր կապվում: Հիմա է՞լ կա այդ կապը:

-  Անձամբ Դավիթ Հարությունյանը ոչ մի կապ չի ունեցել: Նրա եղբայրը՝ Վահան Հարությունյանն է եղել մյուս սեփականատերը, բայց որոշ ժամանակ առաջ դուրս է եկել: Հիմա 51 տոկոսը պատկանում է Արսեն Ավետիսյանին, 49 տոկոսը՝ «Իսթ պրոսպեկտ» հիմնադրամին:

Արսեն Ավետիսյանի կինը երեկ բաց նամակով դիմել է Սերժ Սարգսյանին, ԱԱԾ տնօրեն Գորիկ Հակոբյանին, ոստիկանապետ Վլադիմիր Գասպարյանին եւ ՀՀ գլխավոր դատախազ Գեւորգ Կոստանյանին: «Մեծարգո պարոն Նախագահ, ելնելով ամուսնուս՝ Արսեն Վարդգեսի Ավետիսյանի նկատմամբ 15.08.2015թ. իրականացված ֆիզիկական բռնության հանգամանքից, եւ հաշվի առնելով, որ որոշ անձինք ի դեմս Ռուբեն Հայրապետյանի՝ դաժանաբար ծեծի են ենթարկել, իսկ այնուհետեւ առեւանգել եւ զրկել ազատությունից իր կամքին հակառակ մոտ երկու ժամ, որի ընթացքում շուրջ քառասուն զինված անձանց ներկայությամբ Ռ. Հայրապետյանը ճնշում է գործադրել՝ պահանջելով ստորագրել մի գրություն, որ իբր ամուսինս Ռ. Հայրապետյանին գումար է պարտք: Սպառնացել են, որ առանց այդ թուղթը ստորագրելու ազատ չեն արձակի: Միայն որոշ լրատվամիջոցների զանգից հետո ազատ են արձակել: Դիմել եմ իրավապահ մարմիններին, սակայն մտահոգված եմ ամուսնուս, ով այժմ գտնվում է Հերացու թիվ 1 հիվանդանոցում եւ մեր ընտանիքի անդամների անվտանգությամբ: Հաշվի առնելով Ձեր անձը, Ձեր խստապահանջությունը նմանատիպ դեպքերի նկատմամբ՝ խնդրում եմ Ձեզ ապահովել ամուսնուս եւ մեր ընտանիքի անդամների անվտանգությունը»,- մասնավորապես ասված է նամակում:

Տպել
3317 դիտում

Զովունիում մեքենան դուրս է եկել հանդիպակաց երթևեկելի գոտի և մխրճվել դեղատան մեջ. վիրավորներ կան

Այս պահին փակ են Վարդենյաց լեռնանցքը, Արագածոտնի և Գեղարքունիքի գյուղամիջյան ճանապարհներ

«Առնո Բաբաջանյան» համերգասրահի փոխտնօրենի նկատմամբ քրեական հետապնդումը դադարեցվել է

Մաշինի դուռը բացվեց ու Փաշինյանն իջավ․ բոլնիսցիները՝ վարչապետի անակնկալ այցի մասին

Մենք կշարունակենք պայքարը, որպեսզի ԻԳԻԼ-ը չբարձրացնի իր գարշելի գլուխը. ԱՄՆ փոխնախագահ

Երեխան ընդունվել է վերջույթների կաթվածով. «Սուրբ Աստվածամայր» Բ/Կ-ն պարզաբանում է փոքրիկի մահը

Գրիպի դեմ պատվաստվողները շատացել են. «Մուրացանում» պատվաստանյութն արագորեն սպառվել է

Մաղթում եմ Ձեզ հաջողություն Ձեր կարեւոր պարտականությունների կատարման գործում. Յագլանդ

ՎՏԲ-Հայաստան Բանկը հայտարարում է Swift դրամային փոխանցումների վերաբերյալ ակցիա՝ նոր հաճախորդների համար

Արման Թաթոյանը Նիդերլանդների դեսպանի հետ քննարկել է Պաշտպանի զեկույցը

Բելգիայի Թագավորության վարչապետ Շառլ Միշելը շնորհավորական ուղերձ է հղել Նիկոլ Փաշինյանին

Ոստիկանության միայն մեկ ստորաբաժանման ծառայության շնորհիվ պետբյուջե է վերադարձվել ավելի քան 708 մլն դրամ

Փրկարարները դուրս են բերել ավտոմեքենան արգելափակումից

Սևանի թերակղզուց դեպի Դիլիջանի թունել ճանապարհահատվածում բուք է

Գրիպով հոսպիտալացվածների 95 տոկոսը երեխաներ են. խուսափելու լավագույն միջոցը պատվաստումն է

ՀՀ և Ադրբեջանի ԱԳ ղեկավարները անդրադարձել են խաղաղ գործընթացին, նաև՝ ժողովուրդների խաղաղությանը

Երեւանի քաղաքապետարանի թեժ գծի համարը փոխվում է, կլինի նաեւ ձայնային հաղորդագրության հնարավորություն

Գյուղատնտեսական տարին պետք է դարձնել մաքսիմալ կանխատեսելի. Նիկոլ Փաշինյան (լուսանկարներ)

Բարեկամավան գյուղում ականի պայթյունից տուժած կա

Ադրբեջանցիները կրկին փորձել են խեղաթյուրել Իրանի բարձրաստիճան պաշտոնյայի հայտարարությունը. փորձագետ