Սպորտ եվ քաղաքականություն. Հասան բուն նյութին

«Հայկական ժամանակի» հունիսի 16-ի համարում ներկայացրել էի ռուսական սպորտում բավական ազդեցիկ «Չեմպիոնատ» կայքի խմբագրի տեղակալ Եվգենի Սլյուսարենկոյի կանխատեսումները դոպինգ-սկանդալի հնարավոր զարգացումների մասին («ՀԺ», 16.06,2016թ.«Անհավատալի սցենա՞ր», http://armtimes.com/hy/read/87793): Հիշեցնեմ, որ Սլյուսարենկոն ներկայացրել էր 5 քայլից բաղկացած մի սցենար-ծրագիր, որի նպատակը Ռուսաստանին ֆուտբոլի Աշխարհի 2018 թվականի առաջնության կազմակերպման իրավունքից զրկումն է:

Համաձայն այդ ծրագրի, պարբերաբար, խթանիչներ օգտագործելու համար նախ ռուսաստանցի ատլետները պետք է զրկվեն Օլիմպիական խաղերին մասնակցելու իրավունքից, հետո հակադոպինգային համաշխարհային կազմակերպությունը կոչ է անելու խաբեությամբ զբաղվելու համար (տարիներ շարունակ կեղծվել են դոպինգ թեստերը) Ռուսաստանին, ընդհանրապես, որակազրկել, ապա մարզաձեւերի տարբեր ֆեդերացիաներ որակազրկելու են Ռուսաստանին, ՄՕԿ-ը իր հերթին զրկելու է Ռուսաստանին Օլիմպիական խաղերին մասնակցելու իրավունքից եւ վերջապես 2016 թվականի աշնանը ՖԻՖԱ-ն՝ ֆուտբոլի միջազգային ֆեդերացիան է որակազրկելու Ռուսաստանին եւ համաձայն իր կանոնադրությամբ սահմանված «որակազրկված երկրում չի կարող անցկացվել ՖԻՖԱ-ի ոչ մի մրցաշար» դրույթի՝ կզրկի Ռուսաստանին Աշխարհի 2018 թվականի առաջնության կազմակերպման իրավունքից:

Այս պահին, 1 ամիս առաջ անհավատալի համարվող այս սցենարի գրեթե 4 կետերը կատարվել են. առաջին 2-ը՝ ամբողջությամբ, 3-րդ եւ 4-րդ կետերը՝ մասնակի: Երեկ միջազգային մարզական դատարանը մերժել է ռուսաստանցի 68 ատլետների բողոքը եւ կարծես թե ավարտվել է Ռուսաստանին Օլիմպիական խաղերից ընդհանրապես զրկելու բարդ պրոցեսը: Ընդ որում, արդեն հստակ է, որ ձմեռային մարզաձեւերի մի շարք ֆեդերացիաներ չեղյալ են հայտարարել առաջիկա ձմռան ընթացքում Ռուսաստանում նախատեսված մի քանի խոշոր մրցաշարեր՝ բոբսլեյի եւ սկելետոնի աշխարհի առաջնությունը, բիաթլոնի, չմշկավազքի, դահուկացատկի աշխարհի գավաթի խաղարկության մրցումները, դահուկավազքի աշխարհի գավաթի խաղարկության եզրափակիչ փուլը եւ այլն:  

Այսօր Մոսկվայում պետք է կայանար Ռուսաստանի օլիմպիական հավաքականի Բրազիլիա՝ Օլիմպիական խաղեր ճանապարհման հանդիսավոր արարողությունը, որը, սակայն, չեղյալ է հայտարարվել: Չեղյալ է հայտարարվել նաեւ Ռուսաստանի նախագահի կողմից օլիմպիական խաղերի մասնակիցների ընդունելության ավանդական արարողությունը: Այս իրավիճակը հուշում է, որ Ռուսաստանում տեղյակ են ՄՕԿ-ի մոտալուտ վճռին եւ այն բավական կոշտ է՝ որակազրկում: Ռուսաստանը չի մասնակցելու Օլիմպիական խաղերին, ռուսաստանցի մարզիկները որոշակի ժամանակ չեն կարողանալու հանդես գալ միջազգային մրցաշարերում, Ռուսաստանում չեն կարող կազմակերպվել միջազգային մրցաշարեր եւ այլն: Հետաքրքիր է, որ ռուսական ամենամասսայական մարզական կայքերից «Սպորտ էքսպրեսի» կատարած հարցմանը՝ «պետք է՞ որակազրկել Ռուսաստանին», մասնակիցների 84 տոկոսը դրական պատասխան է տվել:

Բայց Ռուսաստանի վրա «գրոհը» շարունակվում է: Երեկ բրիտանական մի քանի պարբերականներ դիմել են ՈՒԵՖԱ-ին՝ ֆուտբոլի Եվրոպական միությանը, պահանջելով որակազրկել, եվրագավաթների խաղարկությունից հանել ռուսական թիմերին: Համաձայն համաշխարհային հակադոպինգային կազմակերպության զեկույցի, Ռուսաստանում կեղծված դոպինգ -թեստերի որոշակի մաս կապված է ֆուտբոլի հետ՝ Ռուսաստանում ֆուտբոլիստներն ընդունել են խթանիչներ եւ այն քողարկվել է պաշտոնյաների կողմից: «Ռուսաստանի սպորտի նախարար Վիտալի Մուտկոյի անունը 21 անգամ հիշատակվել է հակադոպինգային հանձնաժողովի զեկույցում: Մուտկոն նաեւ Ռուսաստանի ֆուտբոլի ֆեդերացիայի նախագահն է, եւ սա պատահական չէ: Այսօր ամբողջ աշխարհը սպասում է ՄՕԿ-ի որոշմանը, հույս ունենալով, որ ՄՕԿ-ը չի ընկրկի եւ թույլ չի տա Ռուսաստանին մասնակցել Օլիմպիական խաղերին: Սպասում ենք նաեւ ՈՒԵՖԱ-ի որոշմանը, որը կարգելի անազնիվ խաղացող ռուսական ակումբներին մասնակցել միջազգային մրցաշարերի», - գրել է «Independent»-ը:

Երեկ հայտարարությամբ է հանդես եկել նաեւ ՄՕԿ-ի նախկին փոխնախագահ, համաշխարհային հակադոպինգային կազմակերպության նախկին նախագահ Ռիչարդ Փաունդը, ով ղեկավարում էր ռուսաստանցի ատլետների կողմից խթանիչներ օգտագործելու տեղեկությունները ճշտելու համար կազմավորված հանձնաժողովը: «ՖԻՖԱ-ն պարտավոր է չեղյալ հայտարարել Ռուսաստանում Աշխարհի 2018 թվականի առաջնության եւ 2017 թվականին Կոնֆեդերացիաների գավաթի խաղարկության անցկացումը: Այն պետք է փոխանցվի մեկ այլ երկրի: Դոպինգ սկանդալների մեջ թաղված Ռուսաստանը Աշխարհի առաջնության անցկացման հարմար վայր չէ», - հայտարարել է Փաունդը եւ հիշեցրել նաեւ «Եվրո 2016»-ի ընթացքում ռուսաստանցի ֆուտբոլասերների խուլիգանական պահվածքը, ինչի հետեւանքով քիչ էր մնում Ռուսաստանին զրկեին «Եվրո 2016» -ից:

Դոպինգային սկանդալի հետեւանքով Օլիմպիական խաղերից Ռուսաստանի զրկումը կարծես ավարտական փուլում է եւ մարզաշխարհն անցել է վճռական եւ վերջնական քայլին՝ Ռուսաստանին զրկել ֆուտբոլի Աշխարհի 2018 թվականի առաջնության կազմակերպման իրավունքից: