Ամառային 31-րդ Օլիմպիական խաղեր. Ովքեր են մեկնել Ռիո

Թեեւ Ռիո դե Ժանեյրոյում կայանալիք ամառային Օլիմպիական խաղերի հանդիսավոր բացման արարողությանը կայանալու է վաղը, բայց երեկ արդեն մեկնարկել է կանանց ֆուտբոլի մրցաշարը, իսկ այսօր էլ կայանալու են տղամարդկանց ֆուտբոլի մրցաշարի մի քանի հանդիպումներ: Օլիմպիական խաղերի համար ռեկորդային՝ 207 երկրներ են հայտ ներկայացրել մասնակցելու «Ռիո 2016»-ին, ընդ որում ՄՕԿ-ի դրոշի տակ հանդես է գալու նաեւ «փախստականների հավաքականը»: Այս տարվա սկզբին ՄՕԿ-ը հատուկ որոշում ընդունեց, համաձայն որի՝ բարձր մարզական արդյունքներ ունեցող մարզիկները, որոնք ունեն նաեւ ՄԱԿ-ի կողմից շնորհված փախստականի կարգավիճակ, կարող են հանդես գալ Օլիմպիական խաղերում: Ներկա պահին Հարավային Սուդանի, Կոնգոյի, Եթովպիայի, Սիրիայի 10 մարզիկներ են ընդգրկված «փախստականների հավաքականում»:

1-ին անգամ Հարավային Ամերիկայում անցկացվող ամառային 31-րդ Օլիմպիական խաղերում ընդհանուր առմամբ խաղարկվելու են մեդալների 306 հավաքածու: 207 երկրների 11 հազար 384 մարզիկներ մրցելու են 33 մարզաձեւերում: 112 տարվա ընդմիջումից հետո Օլիմպիական խաղերի ծրագիր է «վերադարձել» գոլֆը եւ հենց այս մարզաձեւի հետ է կապված «Ռիո 2016»-ի սկանդալներից մեկը: Աշխարհի ուժեղագույն գոլֆիստներից մեկը՝ երկար ժամանակ համաշխարհային վարկանիշային աղյուսակը գլխավորող իռլանդացի Ռորի Մակիլրոյը հրաժարվել է մասնակցել Օլիմպիական խաղերին: «Նայելու են Օլիմպիական խաղերը հեռուստացույցով: Նայելու եմ առավել կարեւոր մրցումները՝ ատլետիկա, լող: Իսկ գոլֆի մրցաշարը ինձ չի հետաքրքրում»,- հայտարարել է Մակիլրոյը՝ ավելացնելով նաեւ, թե վախենում է Բրազիլիայում առկա «Զիկա» վիրուսից: Հասկանալի, որ այլ մրցաշարերում ահռելի գումարներ վաստակող մարզիկների մեծ մասի համար մրցանակային հիմնադրամ չունեցող Օլիմպիական խաղերի չեմպիոնի կոչումը երկրորդական է, եւ նրանք հրաժարվել են մասնակցությունից ուղղակիորեն չնշելով բուն պատճառները:

Մակիլրոյի օրինակին են հետեւել ֆիլիպինցի լեգենդար բռնցքամարտիկ Մանի Պակյաոն, խճուղային հեծանվավազքի ժամանակակից գլխավոր աստղերից մեկը՝ կոլումբիացի Նաիրո Կինտանան, մարաթոնյան վազքի աշխարհի ռեկորդակիր, քենիացի Դենիս Կինետոն եւ այլն: «Ռիո 2016»-ին վնասվածքների պատճառով չեն մասնակցի նաեւ լեգենդար թենիսիստ, շվեյցարացի Ռոջեր Ֆեդերերը, ամերիկացի բասկետբոլիստ, մրցաշրջանի ընթացքում 2 անգամ «ամենաարժեքավորը» ճանաչված Սթիվեն Քերին, ամերիկացի ատլետ, Օլիմպիական չեմպիոն, աշխարհի եռակի չեմպիոն Կարմելիտա Ջետերը եւ ուրիշներ: Բայց «Ռիո 2016»-ը բաց թողնող նման տիտղոսակիր մարզիկների շարքում առանձնանում է կանադացի ձիարշավորդ Իան Միլերը: 69 - ամյա այս մարզիկը 1972 թվականից սկսած մասնակցել է 10 Օլիմպիական խաղերի՝ բացառությամբ, հարգելի պատճառով, Մոսկվայում 1980 թվականին կայացածի (կապիտալիստական երկրները բոյկոտի ենթարկեցին ՍՍՀՄ-ում կազմակերպված Օլիմպիական խաղերը): Օլիմպիական խաղերին մասնակցելու քանակով Միլերը բացարձակ ռեկորդակիր է, եւ միգուցե այլեւս ոչ մի մարզիկի չհաջողվի 10 անգամ մասնակցել Օլիմպիական խաղերի: Ընդ որում, Միլերը Օլիմպիական  խաղերում իր առաջին մեդալը նվաճել է միայն 2008 թվականին, այն էլ՝ թիմային մրցաշարում (արծաթ): Միլերը պատրաստվում էր նաեւ մասնակցել իր համար թվով 11-րդ Օլիմպիական խաղերին, սակայն վերջին պահին ստիպված էր հրաժարվել իր ձիու վնասվածքի պատճառով: Ահա այսպես, «Ռիո 2016»-ը զրկվեց նաեւ Օլիմպիական խաղերի համար լեգենդ դարձած Իան Միլերի ներկայությունից:

Համաշխարհային ճանաչում ունեցած մի քանի տասնյակ մարզիկներ էլ որոշել են մասնակցել «Ռիո 2016»-ին եւ հատկապես հետաքրքիր պայքար է սպասվում թենիսի տղամարդկանց մրցաշարում: Աշխարհի ուժեղագույն թենիսիստ, վերջին ժամանակներս գրեթե անպարտելի սերբ Նովակ Ջոկովիչը կազմ ու պատրաստ է նվաճելու իր համար առայժմ անհասանելի միակ տիտղոսը՝ Օլիմպիական խաղերի չեմպիոնի կոչումը: Ջոկովիչի մրցակիցների թվում են աշխարհի առաջատար թենիսիստներ, 2012 թվականի Օլիմպիական խաղերի չեմպիոն, բրիտանացի Էնդի Մարեյը, եւ 2008 թվականի Օլիմպիական խաղերի չեմպիոն, իսպանացի Ռաֆայել Նադալը: Վերջինս, ընդ որում, նախապես հայտարարել էր, թե «Ռիո 2016»-ում մասնակցելու է միայն զուգախաղերի մրցաշարին, սակայն երեկ Օլիմպիական խաղերի պաշտոնական կայքով տեղեկություն տարածվեց, որ Նադալը մասնակցելու է նաեւ անհատական մրցաշարին:

Եվ վերջում մի լուրի մասին, որը ուղղակիորեն կապված է Հայաստանի հետ: «Ռիո 2016»-ի կայքը հրապարակել է բոլոր երկրների հայտավորված մարզիկների անունները: Ինչպես հայտնի է, Հայաստանը Օլիմպիական խաղերում պետք է ներկայացնեին 33 մարզիկներ, սակայն պաշտոնական կայքում բացակայում է հեռացատկորդ Գոռ Ներկարարյանի անունը, եւ Հայաստանի մարզիկների թիվը նշված է 32: Երեկ այս մասին չկարողացանք պարզաբանումներ ստանալ ՀԱՕԿ-ից, Հայաստանի ատլետիկայի ֆեդերացիայից: Մեր հարցերին պատասխանեցին, թե բոլոր պատասխանատուները մեկնել են Բրազիլիա: