Սպառնում էին, որ Կարեն Գրիգորյանի համար աշխատեմ. Էջմիածնի ավագանու առեւանգված թեկնածու

Քաղաքապետի 1 եւ ավագանու 2 ծեծված թեկնածուների մեկուսացված լինելու պայմաններում սեպտեմբերի 18-ին Էջմիածնում տեղի ունեցան համայնքապետի ընտրություններ: Հենց այսպիսի մթնոլորտում էլ մարդիկ իրենց ձայնը եւս 4 տարով «տվեցին» գեներալ Մանվել Գրիգորյանի որդուն՝ քաղաքապետի թեկնածու Կարեն Գրիգորյանին:

Հիշեցնենք, որ ընտրություններից 2 օր առաջ Էջմիածնում միջադեպ էր տեղի ունեցել, որի հետեւանքով քաղաքապետի թեկնածու Արթուր Թումանյանը եւ եւս մեկ անձ տեղափոխվել էին հիվանդանոց:

Ըստ քաղաքապետի թեկնածու Արթուր Թումանյանի պատմածի՝ ամեն ինչ տեղի է ունեցել այն բանից հետո, երբ իրեն տեղեկացրել են, որ ավագանու թեկնածու, իր ընկեր Կիրակոս Բաժակյանին առեւանգել են եւ գազալցակայաններից մեկում ծեծի են ենթարկում:

Այսօր մեզ հետ զրույցում Բաժակյանը պատմեց, որ դեմքով ճանաչում է իրեն առեւանգողներից եւ ծեծի ենթարկողներից մեկին՝ նա Էջմիածնի գործող քաղաքապետ Կարեն Գրիգորյանի ազգականն է: Բաժակյանն ասաց նաեւ, որ ծեծի ենթարկելուց բացի իրեն սպառնացել են՝ պահանջելով չսատարել Թումանյանին, հեռանալ քաղաքից, իսկ եթե ուզում է ավագանու անդամ դառնալ՝ սատարել Կարեն Գրիգորյանին:

- Պարոն Բաժակյան, մենք տեղեկացանք, որ այսօր քննչական գործողության էիք մասնակցում: Ի՞նչ գործողություն էր իրականացվում:

- Ես մանրամասներ չեմ կարող պատմել, քանի որ նախաքննություն է ընթանում, կարող եմ ասել միայն, որ գնացել էի այն վայրը, որտեղ տեղի էր ունեցել իմ ծեծը:

- Կպատմե՞ք սեպտեմբերի 16-ի միջադեպի մասին: Ինչպե՞ս տեղի ունեցավ ամեն ինչ:

 - Գնացել էի գազալցակայան՝ մեքենաս լիցքավորելու: Տուն վերադառնալիս՝ ճանապարհին կայանեցի: Մոտ 2 րոպե հետո եկան ինչ-որ մարդիկ, սկսեցին սպառնալ, ծեծի ենթարկել, այնուհետեւ իրենց հետ տարան ինչ-որ ամայի տարածք:

- Ովքե՞ր էին նրանք:

- Թե ովքեր էին չգիտեմ, դեմքով եմ ճանաչում...Նրանցից մեկը Գրիգորյանների ազգականն էր:

- Հետո ի՞նչ տեղի ունեցավ ամայի տարածքում, որտեղ ձեզ տարան:

- Այնտեղ ծեծի ենթարկեցին, սպառնալիքներ էին հնչեցնում:

- Ի՞նչ էին սպառնում:

- Ասում էին տանս տեղը գիտեն, ուրիշ բաներ էլ կարող են անել:

- Իսկ ի՞նչ էին ուզում, ո՞րն էր իրենց պահանջը:

- Հարցնում էին՝ քանի ընտրող ունենք, ովքե՞ր են: Իրենք ուզում էին, որ ես քաղաքապետի թեկնածու Արթուր Թումանյանի հետ չաշխատեմ, թեկնածությունս հանեմ, իսկ եթե ուզում եմ ավագանի դառնալ՝ իրենց հետ աշխատեմ: Սպառնում էին, որ հակառակ դեպքում հեռանամ քաղաքից: Ու քանի որ ես մենակ էի, հնարավորություն չունեի զանգելու, օգնություն կանչելու, համաձայնեցի նրանց պահանջների հետ, որպեսզի վերադառնամ տուն:

- Հիմա ձեզ լա՞վ եք զգում, ի՞նչ վնասվածքներ ունեք:

- Դիմել եմ բժշկի, ստուգվել եմ, վաղը նորից եմ ստուգվելու, որից հետո բուժում կնշանակվի: Կոտրվածք չունեմ, բայց սալջարդեր ունեմ եւ երիկամիս հետ խնդիր կա:

- Ոտքո՞վ հարվածել են:

- Այո:

Բաժակյանի առեւանգման եւ ծեծի վերաբերյալ մեկնաբանություն խնդրեցինք Կարեն Գրիգորյանի մամուլի խոսնակ Վարդան Վարդանյանից. «Ինձ թվում է՝ իրենց հերթական սուտն է, բայց քանի որ նախաքննություն է ընթանում՝ նախաքննական մարմինից հարցրեք: Ես նման տեղեկություն չունեմ»,- ասաց Վարդանյանը:

Հիշեցնենք, որ ՀՀ գլխավոր դատախազության հատկապես կարևոր գործերով քննության վարչությունում հարուցվել է քրեական գործ ՀՀ քրեական օրենսգրքի 131-րդ հոդվածի 2-րդ մասի 1-ին կետով և 149-րդ հոդվածի 2-րդ մասի 3-րդ և 5-րդ կետերով նախատեսված հանցագործությունների հատկանիշներով՝ մի խումբ անձանց կողմից նախնական համաձայնությամբ բռնություն գործադրելու և դրա սպառնալիքի միջոցով ավագանու թեկնածուին առևանգելու և վերջինիս ընտրական իրավունքների իրականացմանը խոչընդոտելու առերևույթ հանցագործությունների դեպքերի առթիվ:

 Հարուցված քրեական գործն ուղարկվել է ՀՀ հատուկ քննչական ծառայություն՝ նախաքննություն կատարելու համար: Միաժամանակ հանձնարարվել է անհապաղ ձեռնարկել անհրաժեշտ օպերատիվ-հետախուզական և քրեադատավարական միջոցներ՝ ուղղված հնարավորինս սեղմ ժամկետում հանցանք կատարած անձանց և հանցագործության բոլոր հանգամանքների բացահայտմանը: