«Հայկական վերածնունդը»՝ նույն ինքը` ՕԵԿ-ը, ՀՀԿ-ից նեղացածների հանգրվան

Վարչապետի, կառավարության տնտեսական բլոկի նախարարների ամբողջական փոփոխությունը եւ Սյունիքի նախկին մարզպետ Սուրիկ Խաչատրյանի «առողջական պատճառներով» հանկարծակի հրաժարականը վկայում են այն մասին, որ իշխող Հանրապետական կուսակցությունը լուրջ ռեբրենդինգի փուլում է:

Խորհրդարանական ընտրություններից առաջ ՀՀԿ-ն գոնե հանրության համար տեսանելի մակարդակում ազատվում է վիճելի հեղինակություն ու կասկածելի անցյալ ունեցող մարդկանցից: Միեւնույն ժամանակ, սակայն, իրական (ինստիտուցիոնալ) քայլեր չի ձեռնարկում այդ մարդկանց քաղաքականությունից հեռու պահելու համար:

Բիզնեսը քաղաքականությունից տարանջատելը հեշտ գործ չէ: Այս բարդ ուղին անցել են շատ պետություններ, ինչը բավական երկար ժամանակ է պահանջում: Նման գործընթացն ուղղակի «հորս արեւ» երդումներով ու խոստումներով չէ, որ կատարվում է: Նախ, կայացվում է քաղաքական որոշում, ապա ստեղծվում են մեխանիզմներ, ոչ ֆորմալ, «ախպերական» հարաբերությունների դաշտում պետության բացակայության վերացման նպատակով: Հենց այս հարցում հայրենի իշխանությունները կաղում են երկու ոտքով: Դրա համար դեռ տարիներ առաջ արդյունաբերողների համաժողովին Սերժ Սարգսյանը հայտարարեց բիզնեսը քաղաքականությունից տարանջատելու հրամայականի մասին, սակայն այդ գործընթացի արդյունքները, մեղմ ասած, շատ կասկածելի են: Այն ճոճանակի նման միշտ այս ու այն կողմ էր գնում:

Տիգրան Սարգսյանի կառավարության ժամանակ օլիգարխիային գործադիրում փոխարինեցին «պրոֆեսիոնալները»: 2008 թ. մարտի 1-2-ի ողբերգական դեպքերից հետո երկրում լուրջ քաղաքական ճգնաժամ էր: Դրան գումարվել էր համաշխարհային ֆինանսա-տնտեսական ճգնաժամը: Եկավ ուսյալ-կրթյալ տեխնոկրատ կառավարություն, խոսեց ռեֆորմների մասին, եւ երկրի արտաքին պարտքը կրկնապատկեց: Այնուհետեւ կատարվեց ՀՀԿ-ի օլիգարխիայի ու «հին գվարդիայի» առաջնորդի՝ Հովիկ Աբրահամյանի երազանքը: Նա դարձավ վարչապետ: Առաջին դիրքերում հայտնվեց նորից օլիգարխիան՝ հարց լուծող տղաները: Ճոճանակը հետ ճոճվեց: Այնուհետեւ ղարաբաղյան քառօրյա պատերազմական իրադարձություններից ու «Սասնա ծռեր» զինված խմբի գործողություններից հետո, երբ ՀՀ-ում բոլորը հասկացան քաղաքական համակարգի նկատմամբ զրոյական վստահության եւ դրան զուգորդվող արմատական տրամադրությունների տարածման հնարավոր վտանգավոր հետեւանքները, կրկին քաղաքական դաշտ մտան «պրոֆեսիոնալները»:

Փորձը ցույց է տալիս, սակայն, որ նման քայլերը ոչ այդքան իրական փոփոխությունների մասին հանրությանն ուղղված ազդանշաններ են, որքան ճգնաժամային իրավիճակում իշխանությանն ապահովագրող յուրօրինակ «անվտանգության բարձիկ»: Հենց այդ պատճառով էլ չեն ստեղծվում ինստիտուցիոնալ մեխանիզմներ ոչ ֆորմալ քաղաքական ու տնտեսական հարաբերություններին վերջ դնելու համար: Ուստի, հանրային քաղաքականությունից դուրս մղված ՀՀԿ-ական քրեաօլիգարխիան քաղաքականություն մուտք գործելու նոր խողովակներ է փնտրելու: ՏԻՄ ընտրությունները ցույց տվեցին, որ իշխող կուսակցության ռեբրենդինգից «նեղացածների» համար Գյումրիում եւ Վանաձորում հանգրվան հանդիսացավ ժամանակին ռեբրենդինգ արված ՕԵԿ-ը, այժմ արդեն՝ «Հայկական վերածնունդ» կուսակցությունը:

Վանաձորում ՀՎԿ ցուցակը գլխավորում էր հենց ժամանակին ՀՀԿ-ին բազմիցս աջակցություն ցուցաբերած մարդ: Իսկ Գյումրիում Վարդան Ղուկասյանի ու ՀՎԿ-ի համագործակցության մասին մամուլը տեղեկացրել էր բազմիցս: ՕԵԿ-ը իշխանամերձ օլիգարխիայի հանգրվան դառնալու բազմամյա փորձ ունի: Այն փաստացի «սպոյլեր» կուսակցություն է, որը տարբեր տեխնոլոգիաների ու մեխանիզմների շնորհիվ ընտրությունից ընտրություն ապացուցում է իր կենսունակությունը: Թեպետ շատ գործիչներ այդ կուսակցության յուրաքանչյուր անհաջողությունից հետո խոսում են վերջինիս մահվան կամ վերացման մասին:

Կովկասի ինստիտուտի փորձագետ, քաղաքագետ Հրանտ Միքայելյանը մեզ հետ զրույցում ասաց, որ թեպետ կարծում է, թե Հայաստանի քաղաքական համակարգն ընթանում է բիզնեսից «ապահարզան» տալու ճանապարհով, սակայն վստահ է, որ հեղափոխական փոփոխություններ այս ճանապարհին չեն լինի: «Նման փոփոխություններ անելու համար նախ պետք է ստեղծել մեխանիզմներ, որ այդ մարդիկ մնան միայն տնտեսական դաշտում, զգան իրենց այնտեղ անվտանգ ու մուտք դեպի քաղաքականություն կամ քաղաքական տանիքներ չորոնեն: Նման բան Հայաստանում տեղի չի ունենում կամ տեղի է ունենում շատ դանդաղ: Ուստի դեռ նախադրյալներ չկան ներիշխանական հեղափոխական գործընթացների մասին խոսելու համար»,- կարծում է նա:

Միեւնույն ժամանակ իշխանությունը եւս շահագրգռված չէ խոշոր տնտեսական խաղացողներից ձերբազատվելու հարցում, քանի որ նրանք, նշում է փորձագետը, հարկ եղած դեպքում կարող են ինքնուրույնություն ցուցաբերել ու աջակցել այս կամ այն կուսակցությանը: «Ուստի, այս գործընթացի կառավարելիությունն ապահովելը իշխանության համար կարեւոր է, որը հնարավոր է անել մի կողմից խորհրդարանական ընտրությունների ժամանակ օլիգարխիայի մի մասին տեղավորելով ռեյտինգային համակարգի մեջ, իսկ մյուս մասին՝ կառավարելի ուժի միջոցով պահել տեսադաշտում: Այդ ուժը կարող է լինել «Հայկական վերածնունդը»,- չի բացառում մեր զրուցակիցը:

Այնուամենայնիվ, Միքայելյանը վստահ է, որ մեծ բիզնեսի ներկայացուցիչները հաջորդ խորհրդարանում կլինեն ավելի քիչ, քան` այս: «Այս գործընթացը նոր չի սկսվել եւ այն փոփոխական հաջողություններով ընթանում է առաջ: Մյուս կողմից, ռեյտինգային համակարգ ներդնելով, ՀՀԿ-ն նախկինում մեծամասնական ընտրակարգով ընտրվող եւ տեղական մակարդակում իրենց իշխան զգացող օլիգարխներին տեղավորում է կուսակցական պարադիգմայի մեջ եւ ամբողջությամբ ենթարկում կուսակցության խաղի կանոններին: Այսինքն, նրանց կախվածությունը կուսակցությունից մեծանալու է», - եզրափակեց Հրանտ Միքայելյանը:

Տպել
4040 դիտում

«Սպորտային սերունդ» ծրագրի հաղթող դպրոցները համալրվում են նոր մարզագույքով

Ժամկետային զինծառայողների հարազատները Կառավարության դիմաց էին՝ կոորդինացնելու հետագա անելիքները

71 տարեկան եմ․ այսքան ժամանակ տեսել եք, որ մի անգամ քաղաքականության մեջ լինեմ․ Աշոտ Ղազարյան

Ջալալ Հարությունյանը առաջիկա 2-3 օրվա ընթացքում դուրս կգրվի հիվանդանոցից

Ոստիկանները նախազգուշական կրակոցներ էին արձակել և բերման ենթարկել դիմակավորված անձանց

Պետք է իրատեսական ծրագրեր իրականացնել ռազմարդյունաբերության ոլորտում. վարչապետը՝ ռազմարդյունաբերության կոմիտեի նիստում

Դաշնամուրը փոխարինվեց զենքով. BBC-ի անդրադարձը անհետ կորած 22-ամյա Սողոմոնին (տեսանյութ)

Ասկերանի երկու համայնքի տարածքներում տեղի կունենա չպայթած ռումբերի, այլ զինատեսակների ականազերծում

Հրդեհ Երևանի Մինաս Ավետիսյան փողոցում. հայտարարվել է բարդության «1-Բիս» կանչ

Մեզ հարիր ու թույլատրելի չեն հայության տարանջատման և ներքին թշնամանքի հրահրման ճղճիմ փորձերը. ԱՀ ՄԻՊ

Իվետա Մուկուչյանն իր մրցանակը նվիրել է ռազմի դաշտում իրենց կյանքը զոհած հերոս զինվորներին (տեսանյութ)

Թողարկվել է 3 նոր նամականիշ՝ նվիրված «Պատմամշակութային հուշարձաններ. Հայաստանի պատմամշակութային հուշարձաններ» թեմային

Արդեն առկա են «Աստղագիտության դպրոցական կրթության ցանց»-ի նյութերի հայերեն տարբերակները

Հայաստան-Արցախ միջպետական մայրուղու որոշ հատվածներ դժվարանցանելի են

Վրաստանում ժամը 21:00-ից հետո տեղաշարժն ամբողջությամբ արգելվում է

Որոշ տարածաշրջաններում մերկասառույց է, մի շարք շրջաններում ձյուն է տեղում. ՏԿԵՆ-ը՝ ճանապարհների մասին

Ոչնչացրել են թշնամական ուժերի տանկեր, կրակի տակ տարհանել վիրավոր զինծառայողներին. մերօրյա հերոսներ

Դեկտեմբեր ամսվա կենսաթոշակների վճարման գործընթացը կսկսվի դեկտեմբերի 2-ից

Պատերազմի ավարտից հետո Լեռնային Ղարաբաղ է վերադարձել ավելի քան 23 հազար փախստական

Հաստատվել է կորոնավիրուսային հիվանդության 356 նոր դեպք. գրանցվել է 22 մահ