Մարդկանց քցել են, թքել՝ գնացել են. Ամարասի Արթուրը ճշտումներ է արել Սերժ Սարգսյանի հետ

Արթուր Ալեքսանյանը՝ ամերիկահայ գործարար Վահագն Հովնանյանի փեսան, նույն ինքը՝ Ամարասի Արթուրը, «Միասնական Հայաստան» անվանումով շարժում է սկսել, որի նպատակն է Ազգային ժողովում ստեղծել Վերին պալատ, որտեղ ընդգրկված կլինեն նաեւ սփյուռքահայերը: Երեկ մեզ հետ զրույցում Ալեքսանյանն ասաց, որ սույն հարցով խոսել է Սերժ Սարգսյանի հետ:

-  Պարոն Ալեքսանյան, ի՞նչ է ձեր նախաձեռնությունն ի վերջո, շարժում, որը հետո կարող է կուսակցությա՞ն վերածվել:

- Շարժում է մեր նախաձեռնությունը, եւ նպատակը Ազգային ժողովում սփյուռքահայերից, արցախցիներից ու հայաստանցիներից կազմված երկրորդ պալատ ունենալն է, որպեսզի սփյուռքը կարողանա մասնակից լինել Հայաստանի կյանքին, կառավարմանը: Նպատակը մեր երկիրը համահայկական դարձնելն է: Հայաստանը միայն հայաստանցիների համար չէ, ամբողջ հայության համար է: Անկախության 25 տարիների փորձը ցույց է տվել, որ ինչ-որ մասնակցություն ունեցել են, բայց դրա դիմաց որեւէ իրավունք չունեն: Հայաստանը զարգացնելու, արդարություն հաստատելու նպատակով կառավարման իրավունքի հնարավորություն ընձեռվի նաեւ սփյուռքին: Մինչեւ հիմա միայն փող ենք հավաքել, կարծում եմ, պետք է վերջ տանք դրան:

- Ձեր նախաձեռնությանը միացել են նաեւ սփյուռքում ստեղծված տարբեր շարժումնե՞ր` «Հոգեւոր Հայաստան», «Արդարություն Հայաստանում», ինչպես նաեւ Սերժ Թանկյանը, Արսինե Խանջյանը, մշակութային ու հասարակական գործիչներ Հայաստանից:

- Ոչ մեկը չի միավորվել, պարզապես տարբեր կազմակերպություններ հավանություն են տվել: Այս պահի դրությամբ մենք չենք էլ պատրաստվում միանալ որեւէ կառույցի:

- Պարոն Ալեքսանյան, դուք գիտե՞ք, որ ՀՀ Սահմանադրությամբ Վերին կամ Ստորին պալատ ստեղծելու հնարավորություն չկա:

- Սահմանադրությունը պիտի փոխել, եթե այս նախաձեռնությունն ընդունվում է հայության կողմից, ինչու պիտի Սահմանադրությունը չփոխվի: Հանուն հայրենիքի, հանուն ՀՀ անվտանգության, հանուն հայ ազգի տասը րոպե հետո էլ կարելի է հանրաքվեի մասին որոշում ընդունել: Թե չէ Սահմանադրության գերին ենք: Կյանքը զարգանում է, ամեն օր բան է փոխվում:

- Իսկ ինչո՞ւ նման նախաձեռնություն չցուցաբերեցիք մի տարի առաջ, երբ Սահմանադրական փոփոխությունների նախագիծն էր մշակվում:

- Նոր եմ երազումս տեսել, շուտ երազ տեսնեի, շուտ կնախաձեռնեի:

- Բայց իշխանությունները պետք է համաձայնեն ձեր այդ առաջարկության հետ, որ նորից Սահմանադրությունը փոխեն: Դուք ձեր այդ նախաձեռնությունը քննարկե՞լ եք նրանց հետ:

- Ես ոչ թե քննարկել եմ, այլ նամակ եմ ուղարկել պարոն նախագահին եւ ասել, որ նման նախաձեռնություն կա: Եվ ասել, թե կարող եք, օգնեք, չեք կարող, չեք ուզենա՝ մի օգնեք, ինքներս մեր ուժերով կանենք: Նախագահն ասեց՝ սկսեք, արեք ինչ որ մտածում եք: Ազատ երկիր է, ինչ ուզում եք, արեք: Ես էլ չհասկացա՝ ոչ կողմ էր, ոչ էլ դեմ: Եվ մենք շարունակում ենք քարոզել այդ գաղափարը: Կսպասենք, ԱԺ-ն ձեւավորվի, նոր ԱԺ-ում այդ հարցը բարձրացնենք:

- Հնարավո՞ր է, ձեր նախաձեռնությունը ծավալվի ու դառնա ընդդիմադիր շարժում:

- Ո՞ւմ ընդդիմադիր, դա ազգային շարժում է, իսկ մենք ոչ մեկին դեմ չենք: Հակառակը, մենք ուզում ենք համախմբել ազգը ՀՀ-ի շուրջ: Իսկ իշխանությունը երեւի մտածում է, թե մենք թույլ ենք: Մեր իշխանությունը ուժեղներին եւ փողատերերին է հարգում: Երբ տեսնի, որ մենք ուժեղացել ենք, կարծում եմ, իրենք էլ մեզ կմիանան: Նե կուդա նե ձենիտսյա ս պոդվոդնի լոդկի:

- Կարծիք կա, որ պաշտպանության նախկին նախարար Սեյրան Օհանյանն էլ կարող է միանալ ձեր շարժմանը:

- Ոչ, մենք որպես ընկերներ քննարկել ենք մեր նախաձեռնությունը: Նա պարզապես հավանություն է տվել, որ միտքը լավն է: Ընդամենը: Մենք որեւէ քաղաքական հայացքներ չունենք: Ես որեւէ կառույցի հետ չեմ քննարկել, մենք քաղաքականության մեջ չենք: Միտք է, եւ ես վստահ եմ, որ Հայաստանի փրկությունը հայ ազգի համախմբման մեջ է: Ուրիշ ինչ մոդելներ էլ մտածեն, ինչ կառավարություններ ու վարչապետներ փոխեն, որեւէ բան չի փոխվի, եթե համազգային չդառնա մեր իշխանությունը:

- Նոր վարչապետից ու կառավարությունից դրական սպասումներ կան:

- Շատ լավ, եթե մի օր վարչապետը հրավիրի այս թեմայով քննարկելու, ես նրա հետ սիրով կկիսվեմ, բայց մենք աջակցության կարիք չունենք, մենք չենք ուզում հեղափոխություն անել: Մենք ուզում ենք սերմանել ողջ հայ ժողովրդի, սփյուռքի մեջ, որ իրենք իրավունք ունեն մասնակցելու մեր երկրի ղեկավարմանը: Ես նրանց հուշում եմ, որ դուք ձեր իրավունքները մի թողեք: Մեր պետությունը փողից բացի ուրիշ բան չի ակնկալում սփյուռքից:

- Եթե ձեր նախաձեռնությունը կյանքի կոչվի, կարծում եք սփյուռքը Հայաստանում մեծ նեդրումնե՞ր կանի:

- Անշուշտ, կանի: Ես բազմաթիվ ցանկացողների ցուցակ ունեմ, որ կարող են գալ ու ներդրումներ անել: Պարզապես վստահություն չունեն: Դա է պատճառը, որ չեն անում:

- Ինչի՞ նկատմամբ վստահություն չունեն:

- Վստահություն չունեն, որ իրենց այստեղ չեն քցի: Բազմաթիվ դեպքեր են եղել, որ քցել են, մենք գիտենք:

- Ովքեր են քցել, իշխանություննե՞րը կամ նրանց հովանավորած մարդի՞կ:

- Թե իշխանությունն է քցել, թե ինչ-որ մի բյուրոկրատ, կարեւոր չէ: Հիմա մարդկանց քցել են, նրանք էլ թքել, թողել ու գնացել են: Իսկ սփյուռքից ինձ շատ մարդիկ են զանգում, նամակներ գրում, հավանություն են տալիս, եւ իրենք էլ են աղոթում, որ իրականություն դառնա մեր նախաձեռնությունը:

- Դուք ազդարարեցիք ձեր գաղափարի մասին, մոմ վառեցիք, աղոթեցիք, իսկ  հաջորդ քայլը ո՞րն է լինելու:

- Հաջորդ քայլը պետությանն է, նոր կառավարությանը, նոր ԱԺ-ինը: Նրանք պիտի հասկանան այս գաղափարի կարեւորությունը: Մենք կարող է ընդամենը ցույցեր անենք, պահանջենք, բողոքենք, որ չեք անում, բայց Սահմանադրությանն ու օրենքներին դեմ չենք գնա: Բայց այս Սահմանադրությունը պետք է փոխվի:

- Բայց կարծես թե իշխանությունները ձեր նախաձեռնությունն ընդունելու ցանկություն չունեն:

- Դեռ չունեն, բայց ունենալու են: