«Սասնա ծռեր» շարժումը ազգային-ազատագրական պայքար է սկսում. կլինեն բողոքի ակցիաներ

«Սասնա ծռեր» շարժման քաղաքական խորհուրդը երկու շաբաթ առաջ հրապարակեց ճանապարհային քարտեզ, որով ամրագրվեց շարժման նպատակներն ու ռազմավարությունը: Armtimes.com-ն այդ նպատակներին հասնելուն միտված քայլերի մասին զրուցեց շարժման քաղաքական խորհրդի անդամ Ալեք Ենիգոմշյանի հետ:

-Պարոն Ենիգոմշյան, ճանապարհային քարտեզում նշված խնդիրներն իրականացնելու ուղղությամբ մինչ այս պահը ի՞նչ քայլեր են կատարվել եւ ի՞նչ քայլեր են նախատեսված իրականացնել:

-Խնդիրները ճանապարհային քարտեզում գրված են եւ դրանք իրականացնելու համար առաջարկվող խնդիրները, որոնք պետք է լուծվեն, նույնպես նշված են: Այնտեղ առաջին հերթին ազգային-ազատագրական շարժման ձեւավորումն է, խոսքը ինքնիշխանության հաստատման եւ ապագաղութացման մասին է, զուգահեռաբար ներքին արմատական փոփոխությունների մասին: Իհարկե, չեմ խոսում Արցախի վերամիրավորման մասին, որովհետեւ այդ երկուսը՝ արտաքինն ու ներքինը, շատ սերտորեն փոխկապակցված են: Այնտեղ բանաձեւված է ազգային-ազատագրական շարժման կայացում, ծավալում, առաջնորդող խմբի ձեւավորում ճանապարհային քարտեզում նշված նպատակների եւ խնդիրների իրականացման շուրջ, այդ հենքի վրա կազմակերպվածություն եւ գաղափարական ու նյութատեխնիկական, քարոզչական, իրավապաշտպան եւ բազում այլ ուղղություներով: Այսինքն՝ կազմակերպվածության կայացում այդ գաղափարախոսության եւ նպատակների շուրջ եւ արդեն շարժման կողմից լոկալ եւ զանգվածային գործողություններ, քաղաքացիական անհնազանդության, հետեւաբար հերթականությունն այդպիսին է:

-Շարժման ձեւավորումից, ծավալումից եւ կայացումից հետո, ըստ ճանապարհային քարտեզի, նաեւ պետք է շարժումը ցանցային համակարգով ձեւավորվի Հայաստանում եւ արտերկրում: Ի՞նչ է արվել եւ արվում այս ուղղությամբ:

-Այնտեղ, որ խնդիրները մեկը մյուսի հետեւից նշված են, շատ հստակ, միանշանակորեն խրոնոլոգիական չեն, բայց մեծ հաշվով խրոնոլոգաիական են: Այսինքն՝ այդ ցանցայինը միշտ էլ եղել է, այսօր էլ կա, բայց այդ ցանցայինն ավելի զգալի եւ շեշտակի կերպով կլինի արդեն կազմակերպվածության վերջնական կայացումից հետո: Որքան շարժումն առանձին վերցրած, աջակիցներով հստակորեն կայացած է, այդ ցանցայինի աշխատանքը կսկսի ավելի իրական դառնալ: Հետեւաբար այնտեղ հերթականության եւ հաջորդականության խնդիր կա:

-Ազգային-ազատագրական շարժում բառի տերմինաբանությունը զուտ այլ ընկալում ունի: Օրինակ՝ ազգային-ազատագրական շարժումը Հայաստանում եւ հայ ժողովրդի մոտ եղել է օտար ուժերի դեմ: Ձեր պատկերացրած ազգային-ազատագրական շարժումն իր բովանդակությամբ ինչպիսի՞ն պետք է լինի:

-Երբ ես ասացի ազգային-ազատագրական շարժման կայացում եւ ծավալում, ես անմիջապես դրանից հետո ասացի, որ դա այդպես է կոչվում, որովհետեւ հիմնական նպատակներից մեկը Հայաստանի ապագաղութացումն է եւ ինքնիշխանության հաստատումը: Գաղութացված է Հայաստանը: Իհարկե, 19-րդ դարի, 20-րդ դարի սկզբների գաղութացումը մի բան է, 20-րդ դարի վերջի եւ 21-րդ դարի գաղութացումը կոչվում է նեոգաղութացում, որովհետեւ գաղութացնող ուժերն ուղղակի իրենց բանակներով եւ վարչակազմով չէ, որ իրականացնում են այդ գաղութացնող պետության քաղաքականությունը, այլ տեղի ուժերի միջոցով են դա անում: Չնայած Հայաստանում մենք ունենք ռուսական կայազորի ներկայություն, մեր խորհրդային սահմաններից դուրս սահմանները Իրանի եւ Թուրքիայի հետ ռուսական սահմանապահ ուժերի կողմից են հսկվում: Մենք ասել ենք նաեւ, որ ներկա վարչապետի նշանակումը, Հայաստանի այդ անուղղակի կառավարումը, քայլ էր անուղղակի կառավարումից դեպի ուղղակի կառավարման, որքան էլ նոր նշանակված վարչապետը ազգությամբ հայ է, ՀՀ քաղաքացի է: Այդ բոլոր խնդիրների լուծման խնդիրը կա: Ոչ թե վարչապետի խնդիր կա, այլ այդ նեոգաղութացումից ազատվելու, արտաքին քաղաքականությունը ինքնուրույն դարձնելու հարցն է:

-Առաջիկայում զանգվածային միջոցառումներ, հանրահավաքներ, երթեր, ակցիաներ նախատեսվա՞ծ են:

-Բնականաբար, լինելու են եւ ճանապարհային քարտեզի հանրայնացման ուղղությամբ կլինեն միջոցառումներ, կլինեն ուղղակի պայքարի, այսինքն՝ գետնի վրա պայքարի միջոցառումներ հանրահավաքների տեսքով կամ պահանջների իրականացման համար նախատեսվող միջոցառումների տեսքով: Բնականաբար, առկա է, եւ միշտ էլ կլինի (մինչեւ Հայաստանում քաղբանտարկյալներ չլինեն) քաղբանտարկյալների ազատ արձակումը, կլինի պայքար, պահանջ, նրանց ազատ արձակման ուղղությամբ եւ բազում այլ միջոցառումներ կլինեն: