Օպտիմալացվել է 5 ԾԻԳ, 17 ՊՈԱԿ, լուծարվել՝ 1 ՓԲԸ. Կարեն Կարապետյանի հանձնարարականի հետքերով

ՀՀ կառավարության՝ 2016 թ. սեպտեմբերի 29-ին տեղի ունեցած նիստում վարչապետ Կարեն Կարապետյանը հանձնարարել էր գործադիր իշխանության բոլոր մարմիններին՝ վերանայել իրենց կառավարման ոլորտում գտնվող պետական ոչ առեւտրային կազմակերպությունների (ՊՈԱԿ) ու ծրագրերի իրականացման գրասենյակների (ԾԻԳ) գործունեության նպատակահարմարությունը եւ ներկայացնել առաջարկություն դրանց թվաքանակի կրճատման եւ օպտիմալացման վերաբերյալ:

Ինչպես հայտնի է, տարիներ շարունակ պետական կառավարման ոլորտում գործող այս կառույցները լուրջ ֆինանսական ծանրաբեռնվածություն են առաջացնում բյուջեի վրա։

ՀՀ կառավարության տեղեկատվության եւ հասարակայնության հետ կապերի վարչությունից խնդրել էինք տեղեկացնել, թե այս ընթացքում քանի ԾԻԳ եւ ՊՈԱԿ է կրճատվել կամ օպտիմալացվել, քանիսը կան, որ ընթացքում են:

Ի պատասխան մեր հարցմանը Կառավարությունից հայտնել են, որ մինչ օրս ՀՀ կառավարության որոշումներով կրճատվել եւ օպտիմալացվել են 5 ԾԻԳ, 17 ՊՈԱԿ, միավորման ձեւով վերակազմակերպվել է 2 ՓԲԸ, լուծարվել է 1 ՓԲԸ: Քննարկման փուլում են որոշ ՊՈԱԿ-ների ու ԾԻԳ-երի կրճատման և օպտիմալացման վերաբերյալ ՀՀ կառավարության որոշումների նախագծերը:

Հարցին, թե ԾԻԳ-երի եւ ՊՈԱԿ-ների աշխատակազմերի հետ ի՞նչ է տեղի ունենում դրանց օպտիմալացումից հետո՝ Կառավարությունից պատասխանել են, որ կրճատման և օպտիմալացման արդյունքում որոշ դեպքերում ԾԻԳ-երի և ՊՈԱԿ-ների աշխատակազմերի գործառույթները վերապահվում են համապատասխան պետական կառավարման մարմնի աշխատակազմին. ԾԻԳ-երի ու ՊՈԱԿ-ների աշխատակիցների մի մասը կրճատվում է, իսկ մյուս մասն աշխատանքի է անցնում համապատասխան պետական գերատեսչության աշխատակազմում:

Հարցին, թե այս գործընթացի հետեւանքով քանի՞ մարդ է ազատվել աշխատանքից, քանի՞սն են անցել այլ աշխատանքի՝ Կառավարությունից հստակ պատասխան չեն տվել՝ դա հիմնավորելով այսպես.

«ՊՈԱԿ-ների եւ ԾԻԳ-երի կրճատումն ու օպտիմալացումը դեռեւս ընթացքի մեջ գտնվող գործընթաց է: Բացի այդ, ԾԻԳ-երը միջազգային համաձայնագրերով, պայմանագրերով ձեւավորված պետական հիմնարկներ են եւ պայմանավորված միջազգային կազմակերպությունների հետ բանակցությունների, համաձայնագրերում փոփոխություններ կատարելու անհրաժեշտությամբ ու պայմանագրերով նախատեսված աշխատանքների կատարման ժամկետի ավարտմամբ՝ դրանց կրճատման վերաբերյալ ՀՀ կառավարության որոշումների իրագործումը պահանջում է որոշակի բանակցային ժամանակահատված: Նշված հանգամանքներով պայմանավորված՝ այս պահի դրությամբ կրճատվող աշխատակիցների հստակ թվաքանակի վերաբերյալ տեղեկատվություն դեռեւս տրամադրել չենք կարող: Գործընթացի ավարտից հետո պատրաստ ենք Ձեզ կոնկրետ տեղեկատվություն տրամադրել»:   

Հաշվի առնելով, որ այս թիվը դեռ չի հստակեցվում՝ դժվար է ասել, թե որքանով է արդյունավետ ընդհանրապես իրականացվող գործընթացը: Որովհետեւ թվի հրապարակումից հետո հնարավոր է պարզվի, որ իրականում ԾԻԳ-երի ու ՊՈԱԿ-նբերի աշխատակիցները կամ նրանց մեծ մասը աշխատանք են ստացել որեւէ գերատեսչությունում:

Ստորեւ ներկայացնում ենք արդեն իսկ կրճատված եւ օպտիմալացված ԾԻԳ-երի ու ՊՈԱԿ-ների անունները, որ տրամադրել է ՀՀ կառավարության տեղեկատվության եւ հասարակայնության հետ կապերի վարչությունը.

ՀՀ արտակարգ իրավիճակների նախարարության «Արտակարգ իրավիճակների բնագավառում ԾԻԳ», ՀՀ մշակույթի նախարարության «Մշակութային ԾԻԳ», ՀՀ սպորտի եւ երիտասարդության հարցերի նախարարության «Սպորտի եւ երիտասարդական ԾԻԳ», ՀՀ քաղաքաշինության նախարարության «Քաղաքաշինական ԾԻԳ», ՀՀ էներգետիկ ենթակառուցվածքների եւ բնական պաշարների նախարարության Ջրային տնտեսության պետական կոմիտեի «Արփա-Սևան» թունելի վերականգնման  ԾԻԳ» պետական հիմնարկներ, ՀՀ ֆինանսների նախարարության «Գնագոյացման վերլուծական ինֆորմացիոն կենտրոն»,  ՀՀ սպորտի և երիտասարդության նախարարության «Հրանտ Շահինյանի անվան մարմնամարզության օլիմպիական մանկապատանեկան մարզադպրոց»:

Ինչպես նաեւ «Գեղարվեստական մարմնամարզության եւ ակրոբատիկայի օլիմպիական մանկապատանեկան մարզադպրոց», «Աթլետիկայի օլիմպիական մանկապատանեկան N 1 մարզադպրոց», «Աթլետիկայի օլիմպիական մանկապատանեկան N 2 մարզադպրոց», «Գառնիի Ռազմիկ Կարապետյանի անվան մենապայքարային մարզաձևերի օլիմպիական մանկապատանեկան մարզադպրոց», «Ջրվեժի մենապայքարային մարզաձեւերի մանկապատանեկան մարզադպրոց», ՀՀ արդարադատության նախարարության «Իրավախախտում կատարած անձանց վերականգնողական կենտրոն», «ՀՀ արդարադատության նախարարության իրավաբանական ինստիտուտ», ՀՀ մշակույթի նախարարության «Հայաստանի ազգային գրադարան», «Հայաստանի ազգային գրապալատ», «Երաժշտագիտական գրադարան», «Կոմիտասի թանգարան-ինստիտուտ», «Հայաստանի ազգային պատկերասրահ», «Ցուցահանդեսային կենտրոն», «Ագարակ» պատմամշակութային արգելոց», «Պատմամշակութային արգելոց թանգարանների և պատմական միջավայրի պահպանության ծառայություն»: