Վանաձորը կաթվածահար է. տեխնիկա չկա, ձյունը մաքրում են «կովշը» վրան ամրացրած ԶԻԼ-ով

Վերջին օրերին Հայաստանում տեղացած առատ ձյունը կաթվածահար է արել Լոռու մարզի Վանաձոր քաղաքի կյանքը: Համացանցում տեղադրված նկարները վկայում են, որ քաղաքում ձյան մաքրման աշխատանքները, մեղմ ասած, լավ չեն կատարվել: Ավելին՝ մեզ հետ զրույցում «Լոռի» հեռուստաընկերության գլխավոր խմբագիր Նարինե Ավետիսյանը տեղեկացրեց, որ այսօր առավոտյան քաղաքի պոլիկլինիկայում աշխատող որոշ բուժաշխատողներից տեղեկացել է, որ աշխատանքի չեն կարողանում հասնել:

«Պատկերացրեք հիվանդների, հաշմանդամ մարդկանց վիճակը: Այսինքն, եթե նախընտրական խոստումների ժամանակ խոսում էին այն մասին, որ քաղաքի ծայրամասերն անուշադրության են մատնված, պետք է ամեն ինչ անել քաղաքը հավասարաչափ զարգացնելու համար, ապա այսօր ծայրամասերի հանդեպ ուշադրությունը քաղաքացիների համար երազանք է դարձել, նույնիսկ կենտրոնը չի մաքրվում»,- դժգոհեց Ավետիսյանը:

Ձյան մաքրումն իրականացնում է Վանաձորի սանմաքրման ընկերությունը, որն այդ իրավունքը ձեռք է բերում մրցույթով: Ավետիսյանի վստահեցմամբ՝ ընկերությունն ընդամենը երկու մեքենա ունի, որոնք ձյան մաքրման համար չեն:

«ԶԻԼ մեքենայի վրա մաքրելու սարք են ամրացրել, ձյունը մաքրում են: Բայց դա իրականում ոչ թե մաքրում է ձյունը, այլ սեղմում ու պնդացնում: Բա այդ ընկերությունը մրցույթի է մասնակցել ու շահել: Ինչի՞ հիման վրա է մրցույթ շահել, որ ձյուն մաքրող մեքենա չունի: Ո՞նց կարելի է մրցույթ շահել՝ չունենալով տեխնիկա»,- հարց է բարձրացնում Ավետիսյանը՝ ընդգծելով, որ այս պահի դրությամբ Վանաձորն ամբողջությամբ ձյունով եւ սառույցով պատված է, իսկ որոշ թաղամասեր կան, որտեղ երթուղայինը չի հասնում, ուղեւորներին իջեցնում է:

Վերջինս ահազանգում է, որ մինչեւ 90-ականների վերջը Վանաձորը տեխնիկա է ունեցել, որը չկա: «Մամիկոն Ասլանյանը դիմում է ժողովրդին՝ ասելով, որ պատրաստ է անձնական միջոցներից վճարել, տեխնիկա վարձակալել: Հասկանո՞ւմ եք՝ սա հանրապետության երրորդ քաղաքի համար աղետ է. նրա նախընտրական խոստումները բոլորովին չեն համապատասխանում իր այս խեղճության հետ: Հոկտեմբերի 10-ից քաղաքապետ է, չգիտե՞ր, որ ձմեռ է գալու: Կամ Անդրանիկ Հարությունյանի օրոք (մինչեւ 1999 թվականը) քաղաքն ունեցել է տեխնիկա, բա ո՞ւր է: Փաստն այն է, որ հիմա գոյություն չունի»,- ասում է Նարինե Ավետիսյանը՝ կասկած հայտնելով, որ նախկին քաղաքապետ Սամվել Դարբինյանն այն օտարել է ու իրենով արել:

Դարբինյանը հերքում է այդ կասկածները՝ պնդելով, որ Վանաձորը երբեւէ չի ունեցել նման տեխնիկա. «Քաղաքապետարանն, ընդհանրապես, ձյուն մաքրող մեքենա չի ունեցել, այդ աշխատանքը կատարել են տարբեր հիմնարկություններ՝ մրցույթով շահել եւ կատարել են: Ոչ ձյունմաքրիչ է եղել, ոչ էլ որեւէ մեկը այն օտարել է: Ձյան մաքրումը կատարել է մի կազմակերպություն, որն էսօր էլ նույն գործը կատարում է: Այնպես որ նման բան չկա ու չի էլ կարող լինել»,- վստահեցրեց նա:

Մամիկոն Ասլանյանը եւս կտրականապես հերքեց, որ քաղաքը նման մեքենաներ է ունեցել. «Ես չեմ տեսել Վանաձորում ձյուն մաքրող տեխնիկա, որ հիմա էլ օտարված լինի»,- ասաց նա: Հարցին, թե արդյո՞ք նախատեսում է ձեռքբերել՝ Ասլանյանը պատասխանեց. «Իհարկե, ես հիմա տարբեր ծրագրերի հետ բանակցությունների մեջ եմ, տարբեր կազմակերպությունների միջոցով աշխատում եմ, ուղղակի արագ լուծվող հարց չի»:

Խոսելով ներկայումս կատարվող աշխատանքների որակի մասին՝ Ասլանյանը նշեց, որ այս պահին քաղաքը մաքրում են եւ ինքը հետեւում է այդ աշխատանքներին: «Նախ, աննախադեպ է ձյան առատությունը Վանաձորի համար, երկրորդ՝ սառնամանիք է: Այն ընկերությունը, որ իրականացնում է մաքրման աշխատանքները՝ ունի երկու ձյուն մաքրելու համար հարմարեցված մեքենա, որոնց հզորությունը բավարար չէ էդ որակի ու մասշտաբի աշխատանք կատարելու համար: Իրենք կարող են թաց ձյուն մաքրել միայն: Չնայած դրան, աշխատում ենք, որ հիմնական գործող երթուղիները եւ մարդկանց տեղաշարժը կարողանանք ապահովել: Լոռու ճանշինից ծանր տեխնիկա ենք բերել, մաքրում ենք»: