Ծննդկանն ու երեխան մահացել են, հարազատները ծեծել են բժշկին

Կիրակի` դեկտեմբերի 25-ին, Կապանի բժշկական կենտրոնում ծննդկանի մահվան դեպք է գրանցվել: Մինչեւ ծնվելը մահացած է եղել նաեւ պտուղը:

Բժշկական կենտրոնի մանկաբարձագինեկոլոգիական բաժանմունքի վարիչ Սամվել Միկոյանից տեղեկացանք, որ 26-ամյա կինն ընդունվել է դեկտեմբերի 24-ին, ժամը 14:00-ին: Այդ ժամանակ արդեն պտուղը մահացած է եղել: «Պտղի սրտի զարկերը չենք զգացել, ուղարկել ենք, «էխոյի», էխոսկոպիստը հաստատել է մեր ախտորոշումը` 37-38 շաբաթական մահացած պտուղ»,- ասաց Սամվել Միկոյանը:  

Բժշկի փոխանցմամբ, մահացած պտուղները շատ վտանգավոր են եւ բերում են ներանոթային մակարդելիության սիստեմի խանգարման: Եղանակային այս պայմաններում, 350 կմ ճանապարհ կտրելով, կնոջը Երեւան տեղափոխելը բժիշկները գնահատել են ռիսկային եւ որոշում է ընդունվել նրան հոսպիտալացնել: Հետագայում զարգացել է ծննդաբերական գործունեություն: Դեկտեմբերի 25-ին՝ ժամը 4:40-ին, ծնվել է մահացած երեխան: Այնուհետեւ բժիշկները նկատել են, որ արյան մակարդում բացարձակ տեղի չի ունենում:

«Մենք, մինչեւ ծննդաբերությունը այդ խնդիրը կանխատեսելով, պրոֆիլակտիկ նշանակումներ ենք արել, որ մակարդելիության սիստեմը մի քիչ բարելավվի: Հեղուկներ ենք ներարկել, ամեն ինչ արել ենք, բայց բժշկությունն այսօր ի զորու չէ, որ բոլոր խնդիրները 100 տոկոսով հաղթահարի: Ծննդաբերությունից հետո նույնպես արյան մակարդելիության սիստեմը կարգավորող դեղորայքներ ենք նշանակել, պլազմա ենք արել, որը պատվիրում ենք Գորիսից, մորից ենք փոխներարկել եւ այլն»,- մանրամասնեց բաժանմունքի վարիչը: Տեսնելով, որ կոնսերվատիվ` դեղորայքային մեթոդներն արդյունք չեն տալիս, որոշում է ընդունվել վիրահատել կնոջը: Բժիշկ Միկոյանի խոսքով, սկզբում վիրահատությունից փորձել են հնարավորինս խուսափել` հաշվի առնելով, որ դա եղել է կնոջ առաջին հղիությունը եւ նպատակ են ունեցել պահպանել արգանդը` մայրանալու հնարավորությունից հետագայում նրան չզրկելու համար:  

«Ուղղակի 26 տարեկան կին էր, զրկվել էր երեխայից, եթե մենք շուտ գնայինք վիրահատության, արգանդն անպայման պետք է հեռացնեինք, դրա համար չարչարվեցինք, որպեսզի գոնե արգանդը պահպանենք: Բայց, էլի եմ ասում, մենք փրկիչներ չենք: Ինչ-որ արել ենք, օգուտ չի տվել: Հետագայում տեսնելով, որ դեղորայքային միջոցն արդյունք չի տալիս, գնացել ենք վիրահատության: Վիրահատությունը դեռ չվերջացած, սրտի կանգ է տեղի ունեցել, որը վերականգնել հնարավոր չի եղել: Թե հետագայում դատաբժշկությունը եզրակացություն կտա, ես ինչ կարող եմ ասել»,- նշեց Կապանի բժշկական կենտրոնի մանկաբարձագինեկոլոգիական բաժանմունքի վարիչը:

Հարցին, թե հնարավոր կլինե՞ր փրկել կնոջ կյանքը, եթե շուտ դիմեին վիրահատական միջամտության` չփորձելով պահպանել արգանդը, բժիշկը պատասխանեց.

«Գիտեք ինչ կա, նա ծննդաբերությունից հետո նորմալ քանակով արյուն է կորցրել: Եթե դա կազմում է քաշի համեմատությամբ 0.5 տոկոս, համարվում է թույլատրելի արյան կորուստ: Իր մոտ թույլատրելի արյան կորստից էլ ցածր է եղել: Եթե մենք գնայինք վիրահատության, կարող է ավելի շատ կորցներ եւ այս երեւույթներն ավելի շուտ զարգանային, դարձյալ չկարողանայինք փրկել կնոջ կյանքը»:

Կինը մինչեւ ծննդաբերելն իմացել է, որ արգանդում աղջնակն արդեն մահացած է: Բայց թե ինչ պատճառով դա կարող էր տեղի ունենալ, հայտնի չէ: Սամվել Միկոյանը նշում է, նման դեպքերին հատուկ մի շարք պատճառներ, ինչպես օրինակ, արյան բացասական ռեզուս, պորտալարի փաթաթում, այս պարագայում չեն եղել: «Այստեղ գուցե հավանական է զույգերի միջեւ անհամատեղելիություն, որ 37-38 շաբաթականում հանկարծ ներարգանդային մահ է տեղի ունենում: Պտուղը մենք ուղարկել ենք քննության: Դատաբժիշկները կպարզեն՝ ինչն է պատճառը»,- ասաց նա: Հղիության ընթացքը, ինչպես փոխանցել են Միկոյանին, չի ուղեկցվել բարդություններով:

Մահացած ծննդկանի ու երեխայի հարազատները համոզված են, որ իրենց ընտանիքին պատուհասած այս մեծ ողբերգությունը բժիշկների մեղքով է: Նրանք փորձել են վրեժխնդիր լինել:  

«Մենք` հայերս, սիրում ենք բռունցքներով հարցեր լուծել: Ոչ մի քաղաքակիրթ երկրում այսպիսի բան չի լինի, որ բժիշկն այսքան անպաշտպան լինի: Բոլոր նորմալ հիմնարկներում անվտանգության աշխատակիցներ կան: Երեւանի համարյա բոլոր բուժհիմնարկներում նույնպես անվտանգության աշխատակիցներ են նստած: Իսկ մեզ մոտ ինքնադատաստան են տեսնում: 20 հոգի դուռը բացեցին, թափվեցին վրաս, սկսեցին բռունցքներով, քացիներով խփել: Իրավունք չունենք բռունցքով մեր հարցերը լուծել, հասկանո՞ւմ եք: Մտածում են, որ մահ է եղել, ուրեմն բժիշկը մեղավոր է: Բայց բժշկությունը հարյուր տոկոսանոց չէ»,- ասաց մանկաբարձագինեկոլոգիական բաժանմունքի ղեկավար Սամվել Միկոյանը:

Հ.Գ. Կապանի բժշկական կենտրոնում տեղի ունեցածի վերաբերյալ երեկ հաղորդագրություն է տարածել ՀՀ քննչական կոմիտեն: Ըստ այդմ, Սյունիքի մարզային քննչական վարչությունում հարուցվել է քրեական գործ՝  ծննդկանի մահվան դեպքի առթիվ: 2016թ. դեկտեմբերի 25-ին՝ ժամը 14:20-ին, Կապանի բժշկական կենտրոնից ահազանգ է ստացվել, որ ընկերության մանկաբարձագինեկոլոգիական բաժանմունքում գրանցվել է նորածնի, այնուհետեւ վերջինիս մոր՝ 1990 թ. ծնված Մարինե Իվանյանի մահը: Նախնական տվյալներով՝ Մարինե Իվանյանը 2016 թ. դեկտեմբերի 24-ին՝ ժամը 14:00-ին, «մահացած պտուղ» ախտորոշմամբ ընդունվել է «Կապանի ԲԿ» ՓԲԸ մանկաբարձագինեկոլոգիական բաժանմունք, որտեղ 2016թ. դեկտեմբերի 25-ին՝ ժամը 11:30-ին, ծնվել է մահացած պտուղը, որին հաջորդել է բուժվող հիվանդ Մարինե Վարդանի Իվանյանի մահը:

Սյունիքի մարզային քննչական վարչությունում դեպքի առթիվ  հարուցվել է քրեական գործ՝ ՀՀ քրեական օրենսգրքի 130-րդ հոդվածի 2-րդ մասով («Բժշկական օգնություն եւ սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը»): Նշանակվել են մահացած պտղի եւ Մ. Իվանյանի դիակի դատաբժշկական փորձաքննություններ: Ձեռնարկվում են անհրաժեշտ քննչական գործողություններ՝ դեպքի բոլոր հանգամանքների բազմակողմանի, օբյեկտիվ եւ լրիվ հետազոտումն ապահովելու ուղղությամբ:

9383 դիտում

Աշխարհի ամենաշքեղ 10 զբոսանավերը (ֆոտոշարք)

«Մանչեսթեր Սիթիի» ֆուտբոլիստը Instagram-ի գրառման համար տուգանվել է 50 հազար դոլարով

Իրաքի բանակը Մոսուլի արևմտյան հատվածում սկսել է հարձակումը ԻՊ-ի դիրքերի վրա

Ով շինել է, թող առնի. Դիլիջանի ուսումնական կենտրոնի օտարման արդար տարբերակ

19-ամյա երիտասարդն ապտակել է Ֆրանսիայի նախագահի թեկնածու Մանուել Վալսին (տեսանյութ)

Համագործակցության վերջնական ձեւաչափը՝ առաջիկայում

«Մացոյի» գլխավորած «դատարանը» ոչ մի աղերս չունի օրենքի և իրավունքի հետ. ՀԽ

Այո, օդանավում տեսել եմ. Ն. Նազարյանը՝ Քոչարյանի հետ հանդիպման եւ նախարարի պաշտոնի մասին

Արմեն Աշոտյանի արձագանքը Գագիկ Ծառուկյանի հայտարարությանը

ՀՀԿ-ն Գործադիր մարմնի նիստ է հրավիրել

Ով է գրել Ծառուկյանի հայտարարությունը, եւ որտեղ է այն գրվել` Երեւանո՞ւմ, թե՞ Մոսկվայում

Սիրիան Իրանի շնորհիվ բջջային նոր օպերատոր կունենա

Ահաբեկչություն Բաղդադում. կան զոհեր ու վիրավորներ

Թրամփի հայտարարությունը չի անհանգստացրել Իրանի նախագահին

Չախկալ, խոշոր աչքեր, նոսր մազեր. վկան ճանաչել է Գաստիկին, հետո՝ փոշմանել. Լուսանկարներ

Հրապարակում Kempinski հյուրանոց չբացվեց. Էռնեկյանի գործերն այդքան էլ լավ չեն

ՀՀ միջպետական եւ հանրապետական նշանակության բոլոր ճանապարհները բաց են

Ոչ մի երաշխիք չունենք, որ Լուկաշենկոն կկասեցնի Լապշինի արտահանձնումը. Վազգեն Մանուկյան

«Համախմբումը» 2 այլ կուսակցության հետ համագործակցության համաձայնագիր է ստորագրել

Հայաստանի ազգային պատկերասրահում եւ մասնաճյուղերում 2016 թ. կազմակերպվել է 61 միջոցառում