Տիգրան Սարգսյանը, դատելով նրա իրականացրած գործունեությունից, պարզապես հաճույք է ստանում, երբ իր ղեկավարած կառավարության որոշումների արդյունքում խոշոր բիզնեսը ավելի է խոշորանում, իսկ մանրը` ոչնչանում է: Ասվածի լավագույն ապացույցներից կարող է լինել այն, ինչ կատարվում է փոստային եւ սուրհանդակային ծառայություններ մատուցող ընկերությունների հետ: Դեռ մեկ տարի առաջ «Փոստային կապի մասին» ՀՀ օրենքում փոփոխություններ կատարվեցին, որոնց արդյունքում լիցենզավորման ենթակա գործունեություն պետք է դառնար նաեւ սուրհանդակային եւ առաքման ծառայություններ մատուցող տնտեսվարողների գործունեությունը: Բայց, քանի որ այդ ժամանակ դեռ չկար սուրհանդակային ծառայությունների լիցենզավորման կարգ, հարցը հետաձգվեց մինչեւ անցած տարվա վերջ:

Մայիսի 6-ի ԱԺ ընտրություններից հետո շատ կարճ ժամանակահատվածում հայկական դրամը զգալիորեն թուլացավ ամերիկյան դոլարի նկատմամբ: Դոլարի ներկայիս փոխարժեքը (1 դոլար/396 դրամ) ամենաբարձրն է վերջին 2 տարում ու դեռ բարձրանալու միտում ունի: Գյումրեցի տնտեսագետ, պոլիտեխնիկական համալսարանի Գյումրու մասնաճյուղի դասախոս Արթուր Առաքելյանը դոլարի փոխարժեքի բարձրացումը բացատրեց այսպես. «Ազդում է այն բյուջետային ճգնաժամը, որը գոյություն ունի Եվրոպայում եւ այս ֆոնի վրա Ֆրանսիայում տեղի ունեցած իշխանափոխությունը: Բայց ես կուզեի խոսել ներքին միտումներից, քանի որ միայն արտաքին գործոնով հայկական ֆինանսական շուկայի միտումները բացատրելը ճիշտ չէ»:

Երեկ ՀՀ ֆոնդային բորսայում մեկ դոլարի գինը նվազել է 55 լումայով եւ կազմել 397 դրամ: Սակայն ուշագրավ է, որ արձանագրվել է գործարքների չափազանց մեծ ծավալ` ավելի քան 8.5 միլիոն դոլար: Կարելի է չկասկածել, որ այս ծավալի մեծագույն մասը, եթե ոչ` ամբողջը, Կենտրոնական բանկի իրականացրած արտարժութային ինտերվենցիան է: Արդյոք սա բավարա՞ր է դոլարի նկատմամբ աճող պահանջարկը լրացնելու համար, հայտնի կդառնա առաջիկա օրերին: Բայց այն, որ մեր ֆինանսական շուկայում ինչ-որ տարօրինակ բաներ են կատարվում, կարծես թե ակնհայտ է: Եւ ակնհայտ է նաեւ, որ դա մեծապես պայմանավորված է անցած ընտրությունների շրջանում մեծ փողերի շրջանառությամբ:

- Պարոն Բադալյան, թեեւ արդեն իշխանական շրջանակներում խոսվում է, որ կոալիցիա ձեւավորվելու է, բայց քանի որ դա դեռ չկայացած փաստ է, եւ վաղը նոր միայն ամեն ինչ գուցե հստակ կդառնա, ձեր կարծիքով` կձեւավորվի՞ կոալիցիա, թե` ոչ:
- Կոալիցիան ձեւավորվում է այն ժամանակ, երբ խորհրդարանում չկա մեկ ուժ, որը չունենա ԱԺ տեղերի կեսից ավելին եւ միայնակ չի կարողանա ձեւավորել կառավարություն: Եթե ԱԺ-ում կա քաղաքական ուժ, որը կարող է միայնակ ձեւավորել կառավարություն եւ ընդունել կառավարության համար անհրաժեշտ օրենքները, ապա այդ կոալիցիան դառնում է ձեւական, անիմաստ կոալիցիա: Տվյալ դեպքում, մայիսի 6-ից հետո Ազգային ժողովում ՀՀԿ-ն ունի 75 տեղ, ինչը նշանակում է, որ ինքը միայնակ կարող է ձեւավորել կառավարություն, վստահություն հայտնել այդ կառավարությանը եւ ընդունել կառավարության համար անհրաժեշտ օրենքները: Այդ իսկ պատճառով ՀՀԿ-ն դե յուրե կոալիցիայի կարիք չունի: Իսկ եթե ձեւավորվի կոալիցիա, որի մեջ կմտնի նաեւ ԲՀԿ-ն, դա կլինի  արդեն ձեւական կոալիցիա, որը կբխի ՀՀԿ-ի շահերից: Դա կծառայի 2 այլ խնդիրների, մասնավորապես ՀՀԿ-ն էլ է հասկանում, թե ինչպես է ՕԵԿ-ը ԱԺ մտել, եւ ինչպես է ԲՀԿ-ն ԱԺ մտել. ՀՀԿ-ին անհրաժեշտ է իրեն կպցնել ԲՀԿ-ին, որով նա իր վարկանիշը կբարձրացնի հոգեբանական տեսակետից եւ կիջեցնի ԲՀԿ-ի վարկանիշը ՕԵԿ-ի մակարդակի: Եւ հետո, նոր կառավարությունը կարող է հայտարարել, որ նա ունի ընտրողների 80% վստահությունը: Եւ 3-րդ. չնայած ՀՀԿ-ն ունի մեծամասնություն, սակայն Արեւմուտքը ՀՀԿ-ից պահանջելու է իրականացնել տնտեսական բարեփոխումներ, իսկ երբ նայում ենք, թե ովքեր են ՀՀԿ-ից անցել ԱԺ, հատկապես մեծամասնականով, շատ դժվար է լինելու անցկացնել օրենքներ, որոնք միտված կլինեն տնտեսական բարեփոխումների: Ահա այդ հակաբարեփոխիչների հնարավոր գործունեությունը չեզոքացնելու համար ՀՀԿ-ին պետք է նաեւ ԲՀԿ-ի 35 ձայնը:

Նիստն անցավ բավական լարված մթնոլորտում: Ամբաստանյալները` եւ Վահրամ Մարգարյանը, եւ Բորիս Հակոբյանը մեղադրական եզրակացության եզրափակիչ մասի դատախազի հրապարակումը լսելիս չէին կարողանում զսպել իրենց վերաբերմունքը եւ մեկնաբանություններ էին անում: «Շառ են: Էս ի՞նչ են ասում»,- բացականչեց Վահրամ Մարգարյանը, լսելով մեղադրական եզրակացության այն հատվածը, որտեղ նշվում էր, թե իբր Գալոյանին սպանելուց առաջ ինքը մի քանի օր հետեւել է նրան: Բորիս Հակոբյանը եւս կամաց ինչ-որ բան ասաց, նրա ծիծաղը հարուցեց մեղադրական եզրակացության մեջ նկարագրված այն դրվագը, ըստ որի` ինքը «Մակարով» տեսակի ատրճանակ է տվել Վահրամին, որպեսզի նա սպանի Խաչիկ Գալոյանին: Դատավոր Արշակ Վարդանյանը դիտողություն արեց ամբաստանյալներին. «Ռեպլիկներ մի արեք»: Ի պատասխան` Վահրամ Մարգարյանը ասաց. «Մի քիչ հեքիաթի ա նման էդ սաղ»:

Տաք եղանակներին զուգընթաց, ակտիվացել են օձերը: Նախօրեին օձի խայթոցից թունավորման երկու դեպք է գրանցվել: Ըստ ՀՀ ԱԻՆ-ի, առաջինը տեղի է ունեցել Վայոց Ձորի Մալիշկա գյուղում: Գյուրզա տեսակի օձի խայթոցից թունավորումով գյուղի առողջության կենտրոն, այնուհետեւ Եղեգնաձորի հիվանդանոց է տեղափոխվել նույն գյուղի բնակիչ, 1933թ. ծնված Ա. Մկրտչյանը: Երկրորդ դեպքը գրանցվել է նույն մարզի Արենի գյուղում: Այս դեպքում եւս գյուրզա տեսակի օձի խայթոցից թունավորումով Եղեգնաձորի հիվանդանոց է տեղափոխվել Արենի գյուղի բնակիչ, 1942թ. ծնված Վ. Նազարյանը: Բժիշկների գնահատմամբ` տուժածների առողջական վիճակը բավարար է, նրանց կյանքին վտանգ չի սպառնում:

ՀՀ ոստիկանությունը հիշեցնում է, որ ՀՀ-ում կենսաչափական կողմնորոշիչներ պարունակող անձնագրերի եւ նույնականացման քարտերի համակարգի ներդրման նպատակով` ՀՀ Ազգային Ժողովի կողմից 2011 թվականի նոյեմբերի 30-ին ընդունված «ՀՀ քաղաքացու անձնագրի մասին», «Նույնականացման քարտերի մասին» եւ «Հանրային ծառայությունների համարանիշի մասին» ՀՀ օրենքներն ուժի մեջ կմտնեն 2012թ. հունիսի 1-ից: ՀՀ քաղաքացիները այդ օրվանից կարող են ձեռք բերել նույնականացման քարտ` որպես անձը հաստատող փաստաթուղթ ՀՀ տարածքում օգտագործելու նպատակով, իսկ այլ պետություններ մեկնելու դեպքում` որպես ճամփորդական փաստաթուղթ, նաեւ կենսաչափական տվյալներով անձնագիր: Նույնականացման քարտը պարունակելու է տվյալների էլեկտրոնային պահոց, որտեղ ամրագրվելու են օրենքով նախատեսված տվյալներ, տվյալների պաշտպանվածությունն ապահովող` քարտին հատուկ անհատական կրիպտոգրաֆիկ բանալիներ, էլեկտրոնային թվային ստորագրության եւ նույնականացման համար հավաստագրեր: Իսկ անձնագրի էլեկտրոնային պահոցում ամրագրվելու են օրենքով նախատեսվող տեղեկություններ անձի վերաբերյալ, այդ թվում` քաղաքացու թվայնացված լուսանկարը, ստորագրությունը, աջ եւ ձախ ձեռքերի ցուցամատների մատնադրոշմները: Այդ փաստաթղթերը ստանալը ՀՀ քաղաքացիների իրավունքն է եւ ոչ թե` պարտականությունը, այսինքն` կամավոր է: Ուժի մեջ են մնալու նաեւ ՀՀ կառավարության 1998թ. դեկտեմբերի 25-ի թիվ 821 որոշմամբ նախատեսված` հին նմուշի անձնագրերը: «Պետական տուրքի մասին» ՀՀ օրենքում 2011թ. նոյեմբերի 30-ին կատարված լրացման արդյունքում սահմանվել են նաեւ ՀՀ քաղաքացու նույնականացման քարտի եւ կենսաչափական տվյալներ պարունակող էլեկտրոնային անձնագրերի տրամադրման համար պետական տուրքի չափերը, համապատասխանաբար` 3 հազար եւ 25 հազար դրամ:

Իրավ, կարելի է ասել, որ ընդդիմության վստահված անձինք առանձնապես գործ չունեն տեղամասերում: Նրանք կարող են քսանչորս ժամ անընդմեջ աշխատել, արձանագրել այս կամ այն մանր խախտումները, պահանջել օրենքի մանրակրկիտ իրականացում, սակայն, մեծ հաշվով, այդ ամենը վճռորոշ դեր չի կարող կատարել: Ստացվում է «զավեշտաողբերգալի» իրավիճակ՝ ընտրատեղամասում գտնվող ցանկացած մեկին պարզ եւ ակնհայտ է, որ ընտրողներին «բերման են ենթարկում», մեծ հաշվով` ամեն բան, բացի կաշառքից, տեղի է ունենում բոլորի աչքի առաջ, սակայն ստիպված ենք արձանագրել, որ տեղամասում ընտրություններն արտաքուստ ընթանում են հիմնականում մաքուր եւ օրինական: Բնականաբար, այդ փաստն ինքնին վատ լուր չէ. նշանակում է, որ ընտրատեղամասն, այսպես ասած, ազատագրված է հասարակության կողմից (չնայած, կարծում եմ, դա բավականին խաբուսիկ երեւույթ կարող է լինել, քանի որ ինչ-ինչ պայմաններում եթե իշխանությունը չկարողանա իր հարցերը լուծել դրսում, ապա տեղամասերը, մեծ հավանականությամբ, նորից կարող են վերածվել «ռազմի դաշտի»):

ՀՀ նախկին ԱԳ նախարար, ԲՀԿ-ական Վարդան Օսկանյանը երեկ Facebook-ի իր էջում գրառել է, որ իր գրասենյակում հանդիպել է ԵԱՀԿ/ԺՀՄԻԳ դիտորդական առաքելության ղեկավար Ռադմիլա Սեկերինսկայի հետ. «Սեկերինսկան ցանկանում էր լսել իմ մեկնաբանությունները եւ գնահատականները ընտրությունների ընթացքի, արդյունքների, ինչպես նաեւ դիտորդների գործունեության վերաբերյալ»,- գրել է նա` հավելելով, որ դիտորդական առաքելության ղեկավարին ասել է` մայիսի 6-ի ընտրությունների արդյունքները չեն արտահայտում ժողովրդի կամքը:

Ըստ պետության եւ «Երեւան ջուր» ընկերության միջեւ կնքված պայմանագրի, 2009-ից ջրի սակագինը 144 դրամից պետք է նվազեր մինչեւ 95 դրամ, բայց տարեցտարի բարձրացել է եւ այժմ կազմում է 174 դրամ` 1 խորանարդի դիմաց` երեկ հայտարարել է Սպառողների ասոցիացիայի նախագահ Արմեն Պողոսյանը: Նրա խոսքով, «Երեւան ջուր» ՓԲԸ-ն ջրային մեծ կորուստներ է տալիս:

Բանն այն է, որ, ինչպես պատմեց տիկին Ալիտան, արդեն 15 օր իրեն խաղացնում են մատների վրա. նախարարությունից ուղարկում են պոլիկլինիկա, պոլիկլինիկայից` հիվանդանոց եւ այսպես շարունակ: Նա  երբեմն կորցնում էր ինքնատիրապետումն ու ափերից դուրս գալիս, քանի որ այդ ընթացքում միայն անտարբերության պատին էր բախվել: Ասում էր` որդին, որ մասնավորապես տուբերկուլոզային մենինգիտի դեմ 1.5 տարի բուժվել է Հանրապետական հակատուբերկուլոզային դիսպանսերում, այլեւս չի կարողանում քայլել: 

«Եկել եմ այստեղ, որ մի ճանապարհով վերականգնողական աշխատանք տարվի իր հետ, քայլի, սայլակի վրայից վեր կենա: Հիվանդանոցում տարբեր մասնագետներ են եկել, տարբեր նյարդաբաններ, բոլորը ասել են, որ ինքը երկար ժամանակ պառկած է մնացել, իր մոտ մկանային թուլություններ են, վերականգնողական աշխատանք է պետք, որ քայլի»,- բացատրեց նա: Մանրամասնեց, որ տղան ավելի քան 3 ամիս գտնվել է կոմայի մեջ, եւ չնայած բժիշկների հոռետեսությանը, հաղթահարել ու դուրս է եկել այդ վիճակից, սակայն քայլել այլեւս չի կարողացել: Ու հիմա մահվան ճիրաններից վերադարձված որդու համար մայրը փորձում է կրկին քայլելու հնարավորություն ապահովել: Նա, ի դեպ, նկատում էր, որ հիվանդանոցում շատ բաների է հասել միմիայն իր պահանջկոտության շնորհիվ. «Իմ աղմուկով, իմ պահանջելով, իմ ճչալով, խելագարության էին հասցնում ինձ, նոր ես կարողանում էի ինչ-որ արդյունքի հասնել»:

Ինչու՞ է Արսեն Գրիգորյանը հրաժարվել երգելուց, դրդապատճառներ կա՞ն. մեր թղթակցի այս հարցերին երեկ պատասխանեց հենց ինքը` երգիչը. «Դրդապատճառներ չկան, ուղղակի նախընտրությունս տալիս եմ հումորին եւ ֆիլմերում նկարահանվելուն. այժմ «32 ատամ» ակումբում եմ, սակայն վերջնականապես չեմ հրաժարվել երգելուց, պատրաստվում եմ նոր ալբոմ թողարկել»: Նկատենք, որ երգիչն առավել լայն ճանաչում է ձեռք բերել իր «Այբուբեն» տեսահոլովակի շնորհիվ: Արսենն ասում է, որ իր տեսահոլովակը ուսուցողական բնույթ է կրում, եւ պատմում է, որ մի 27-ամյա երիտասարդ իր տեսահոլովակի միջոցով սովորել է այբուբենը: Արսենը Երեւանում ապրում է միայնակ` ծնողների, ինչպես ինքն է ասում, օտար ափերում գտնվելու պատճառով: Կյանքի նկատմամբ ի՞նչ հայացքներ ունի: «Եթե կյանքին շեղ աչքով նայես, ապա այն կվերածվի աբսուրդի»,- ասում է երգիչը: Մասնակցե՞լ է Արսենը խորհրդարանական ընտրություններին: «Իհարկե, մասնակցել եմ եւ ուրախ եմ, որ ստեղծվել է նոր Ազգային Ժողով, հուսանք, որ մեր քաղաքական ուժերը կփթթեցնեն Հայաստանը»: Ի դեպ, սիրելի աղջիկներ, Արսենի սիրտը դեռ նվաճված չէ, շտապե՛ք:

Արտասահմանյան այն երկրների առաջնությունները, որտեղ հանդես են գալիս մեր հավաքականի թեկնածուները, ավարտվել են, ու Երեւանում են արդեն Հենրիխ Մխիթարյանը, Գեւորգ Ղազարյանը, Կառլեն Մկրտչյանը, Ռոբերտ Արզումանյանը, Հրայր Մկոյանը, Էդգար Մանուչարյանը: Մինչեւ մայիսի 26-ին մեկնարկելիք ուսումնամարզական հավաքը` կժամանեն նաեւ Յուրա Մովսիսյանը, Ռոման Բերեզովսկին, Զավեն Բադոյանը, Վալերի Ալեքսանյանը, Արթուր Եդիգարյանը, Լեւոն Հայրապետյանը, Մարկոս Պիցցելին, Արթուր Սարկիսովը: Այս ֆուտբոլիստներին կմիանան նաեւ Հայաստանի առաջնությունում հանդես եկող մեր ազգային հավաքականի անդամները: Հունաստանի, ապա հունիսի 5-ին Երեւանում կայանալիք Ղազախստանի հետ ընկերական խաղերում կբացակայի միայն Արաս Օզբիլիսը, որը, մեր ֆուտբոլային ղեկավարների համաձայնությամբ ու օժանդակությամբ, Ամստերդամում ենթարկվել է վիրահատության: Արասը ամբողջապես պատրաստ կլինի աշնանը մեկնարկելիք աշխարհի 2014 թվականի առաջնության ընտրական մրցաշարին:

Հունաստանում ստեղծված ներքաղաքական տարաձայնությունները կարող են հանգեցնել եվրագոտու փլուզման եւ համաշխարհային մասշտաբի ֆինանսական ճգնաժամի: Բանն այն է, որ մայիսի 6-ին կայացած խորհրդարանական ընտրություններից հետո քաղաքական ուժերին չի հաջողվել ձեւավորել նոր կոալիցիոն կառավարություն, այդ իսկ պատճառով էլ երեկ որոշվել է երկրում հունիսի 17-ին նոր ընտրություններ անցկացնել:

Տարաձայնությունների գլխավոր պատճառը քաղաքական ուժերի` բյուջեի խիստ խնայողության շուրջ դիրքորոշումների արմատական տարբերությունն է: Մինչ աջակողմյան «Նոր ժողովրդավարությունը» եւ սոցիալիստական «Պասոկ» կուսակցությունը կողմ են խիստ խնայողություններին, ինչը Եվրամիությունից ու Արժույթի միջազգային հիմնադրամից հերթական վարկի տրամադրման պայմանն է, դրան հակառակ` ընտրություններում ձայներով երկրորդ տեղը զբաղեցրած ձախակողմյան «Սիրիզա» դաշինքը դեմ է խիստ խնայողություններին եւ մտադիր է չեղյալ հայտարարել ԵՄ-ի ու ԱՄՀ-ի հետ ունեցած բոլոր համաձայնագրերը: Որոշ կանխատեսումների համաձայն, այս դաշինքը առաջիկա ընտրություններում հաղթելու մեծ շանսեր ունի, քանի որ հույների մեծ մասը դեմ է խիստ խնայողություններին:

Ադրբեջանի Միլի մեջլիսի պատգամավոր Զահիդ Օրուջի նախաձեռնությամբ, առաջիկայում խորհրդարանը կարող է քննարկել երկրում հայկական կազմակերպության ստեղծման հնարավորությունը: Մասնավորապես, առաջարկվում է ստեղծել «Ադրբեջանի հայերի հասարակական միավորում» անունով կազմակերպություն: Օրուջի համոզմամբ, Ադրբեջանում ներկայումս բնակվող շուրջ 30 հազար հայերը սեփական կազմակերպություն ունենալու իրավունք ունեն: Պատգամավորը կարծում է, որ նման միավորման ստեղծումը կարելի է ծառայեցնել ղարաբաղյան հակամարտության կարգավորման հարցում Ադրբեջանի վարած քաղաքականությանը` դրան ներգրավելով ադրբեջանահայերին: