Թրամփը Քիսինջերին պատվիրել է Ռուսաստանի հետ հարաբերությունների բարելավման ծրագիր մշակել

Ամերիկյան նոր վարչակազմը, որն իր արտաքին քաղաքական առաջնահերթություններից է համարում Ռուսաստանի հետ հարաբերությունների բարելավումը, նախկին պետքարտուղար, հայտնի դիվանագետ Հենրի Քիսինջերին հանձնարարել է մշակել Մոսկվայի հետ լարված հարաբերությունների կարգավորման ծրագիր:

Այս մասին այսօր տեղեկացրել է գերմանական Bild պարբերականը՝ վկայակոչելով Դոնալդ Թրամփի վարչակազմում ունեցած աղբյուրին: Ըստ այդմ, Քիսինջերի խորհրդով Դոնալդ Թրամփը նախ պատրաստվում է չեղարկել Ռուսաստանի նկատմամբ սահմանված պատժամիջոցները: Բացի այդ, Քիսինջերն ամերիկյան վարչակազմին առաջարկում է ճանաչել Ռուսաստանի գերիշխանությունը Բելառուսից, Ուկրաինայից եւ Վրաստանից մինչեւ Ղազախստան ընկած տարածաշրջանում: Դա նշանակում է, որ ԱՄՆ-ն, ի տարբերություն գործող վարչակազմի, Լեհաստանից ու Բալթիայից դեպի արեւելք՝ մինչեւ Չինաստան ընկած երկրները ճանաչում է որպես Մոսկվայի ազդեցության գոտի:

Ըստ Քիսինջերի տեսլականի՝ ԱՄՆ-ն պետք է դադարեցնի Ղրիմի հարցը բարձրացնել, սակայն դրա հետ մեկտեղ չճանաչելով թերակղզու վերամիավորումը Ռուսաստանին: Դրա դիմաց Մոսկվան երաշխավորելու է Ուկրաինայի արեւելյան շրջանների՝ Դոնբասի անվտանգությունը:

Քիսինջերն ԱՄՆ-ի եւ Ռուսաստանի մերձեցումը համարում է քայլ ճիշտ ուղղությամբ, ինչին դրդում է օրեցօր հզորացող Չինաստանը:

1966 թվականին Հենրի Քիսինջերը նախագահ Ռիչարդ Նիքսոնի արտաքին քաղաքական հարցերով խորհրդականն է եղել, իսկ 1973 թվականին նշանակվել է պետքարտուղար եւ հանդես է եկել Խորհրդային Միության հետ հարաբերություններում առկա լարվածությունը թուլացնելու օգտին: Ընդհանրապես, նա համարվում է ԽՍՀՄ-ի հետ լարվածության թուլացման ճարտարապետը եւ տասնյակներ շարունակ աշխատել է այդ ուղղությամբ:

Հենրի Քիսինջերը համարվում է Ռուսաստանի նախագահ Վլադիմիր Պուտինին շատ մոտ կանգնած անձնավորություն եւ այդ առումով Մոսկվայի հետ հարաբերությունների կարգավորման ծրագրի մշակումը հանձնարարելը բոլորովին էլ պատահական չէ: 2000 թվականից նա բազմիցս հանդիպել է Վլադիմիր Պուտինի հետ: 2012 թվականին ամերիկացի դիվանագետը հայտարարել է, թե Պուտինը տրամադրված չէ Արեւմուտքի դեմ, այլ պարզապես հայրենասեր է:

Ռուսաստան-Արեւմուտք հարաբերությունների լարվածության ամենաթեժ պահին՝ 2015 թվականի հունիսին, Քիսինջերը կոչ էր արել չմեկուսացնել Ռուսաստանին: «Ռուսաստանի եւ ԱՄՆ-ի միջեւ երկխոսությունը կարեւոր է աշխարհում հավասարակշռությունը պահպանելու տեսանկյունից: Մոսկվան ու Վաշինգտոնը պետք է ամեն ինչ անեն թշնամական դիմակայությունից զերծ խուսափելու համար»,-այն ժամանակ հայտարարել էր Քիսինջերը, ապա հավելել, թե արեւմտյան երկրները պետք է ընդունեն, որ Ռուսաստանը շատ կարեւոր դերակատարում ունի աշխարհում խաղաղության պահպանման առումով: Այն ժամանակ նա նաեւ ճակատագրական սխալ է համարել այն, որ կողմերից յուրաքանչյուրը փորձում է Ուկրաինան քաշել իր կողմը: Ըստ դիվանագետի՝ Ուկրաինան պետք է կամրջի դեր խաղա Ռուսաստանի ու Եվրոպայի միջեւ:

Այս տարվա փետրվարին Պուտինը Քիսինջերին ընդունել է Նովո-Օգարեւոյի իր նստավայրում եւ նրա հետ երկար զրուցել Ռուսաստան-Արեւմուտք դիմակայության շուրջ: Դեկտեմբերի 19-ին CBS-ին տված հարցազրույցում Քիսինջերը նշել է, թե «Վլադիմիր Պուտինը հստակ հաշվարկում եւ համառորեն պաշտպանում է Ռուսաստանի շահերը»:

Նկատի առնելով Դոնալդ Թրամփի՝ Չինաստանին զայրացրած վերջին քայլերը, ինչպես նաեւ Հենրի Քիսինջերի դիրքորոշումը Պեկինի ու Մոսկվայի հանդեպ՝ շատերը տեսակետ են հայտնում, որ ամերիկյան նոր վարչակազմը՝ Մոսկվայի հետ միասին պատրաստվում է զսպել Չինաստանի աճող հզորությունը: Այդ համատեքստում արժե հիշել 1972 թվականի փետրվարին նախագահ Նիքսոնի՝ Պեկին կատարելիք այցից առաջ վերջինիս արած այն զգուշացումը, թե չինացիները նույնքան վտանգավոր են, որքան ռուսները: Նա ընդգծել էր, որ պատմական երկարաժամկետ հեռանկարում չինացիներն ավելի վտանգավոր են ԱՄՆ-ի համար: «20 տարի անց, եթե Ձեր իրավահաջորդը լինի նույնքան խելացի, որքան Դուք եք, կհենվի ռուսների վրա՝ ընդդեմ չինացիների»,- ասել էր Քիսինջերը:

Թե ինչ մղումներով է ներկայումս Քիսինջերն առաջարկում բարելավել Մոսկվայի հետ հարաբերությունները, ցույց կտա ժամանակը: Սակայն մի բան ակնհայտ է, որ ամերիկյան վարչակազմն առանձնահատուկ տեղ է հատկացնում Ռուսաստանի հետ հարաբերություններին եւ դրան հասնելու համար ընտրել է Վլադիմիր Պուտինի մոտ ամենամոտը կանգնած երկու հայտնի ամերիկացիներին՝ Քիսինջերին եւ Exxon Mobile ընկերության արդեն նախկին նախագահ, պետքարտուղար նշանակված Ռեքս Թիլլերսոնին: