Այո, օդանավում տեսել եմ. Ն. Նազարյանը՝ Քոչարյանի հետ հանդիպման եւ նախարարի պաշտոնի մասին

Ամանորյա արձակուրդային օրերին ԱՄՆ մեկնելիս ՀՀ ԱԻՆ փրկարար ծառայության տնօրենի տեղակալ, Երևան քաղաքի փրկարարական վարչության պետ Ներսիկ Նազարյանը օդանավում հանդիպել է Ռոբերտ Քոչարյանին, բայց երկար զրույց չի ունեցել նրա հետ:

Նազարյանն ու Քոչարյանը պատահաբար հանդիպել են Երեւանից Փարիզ թռչող օդանավում (ՀՀ-ից ԱՄՆ ուղիղ չվերթ չկա, այդ պատճառով նրանք ԱՄՆ են մեկնել Փարիզից): Այդ մասին մեզ հետ զրույցում հայտնեց Նազարյանը՝ անդրադառնալով մամուլի հրապարակումներին, որոնց համաձայն ԱՄՆ մեկնելիս նա օդանավում հանդիպել եւ երկար զրուցել է Քոչարյանի հետ:

- Պարոն Նազարյան, ճի՞շտ է, որ օդանավում վերջերս հանդիպել եք Ռոբերտ Քոչարյանին: Արդյո՞ք քաղաքական հարցեր եք քննարկել, որովհետեւ ըստ մամուլի հրապարակման՝ երկար զրուցել եք:

- (Ծիծաղում է): Ի՞նչ երկար զրույց կարող էինք ունենալ: Այո, թռնելու ժամանակ տեսել եմ: Մտել եմ ինքնաթիռ, երկրորդ նախագահը նստած է եղել, բարեւել եմ, հարցրել եմ՝ ինչպես եք, ինքն ասել է՝ դո՞ւ ինչպես ես, ասել եմ շատ լավ, եւ գնացել-նստել եմ իմ տեղը՝ կնոջս կողքին, թռել-գնացել եմ: Բոլորը նստած էին իրենց տեղերում՝ ի՞նչ զրույց պետք է լիներ:

- Չե՞ք խոսել քաղաքական հարցերի շուրջ, նրա քաղաքականություն վերադառնալու հնարավորության մասին չե՞ք հարցրել:

- Շատ ամոթ բան է...Ես էնքան դաստիարակված մարդ եմ, որ երբեք ինձ թույլ չեմ տա նման բան: Հետո նման մարդկանց հետ երբեք... իրենք էլ թույլ չեն տա, որ բացի բարեւելուց ուրիշ բան... Ես ինձ նույնկերպ կպահեի, եթե Լեւոն Տեր-Պետրոսյանը լիներ, այլ նախկին նախագահներ լինեին: Ամեն դաստիարակված մարդ պետք է բարեւի իր երկրի նախկին նախագահին: Իսկ նման բան թույլ տալ, քաղաքական...ո՞նց եք մտածում, ես եթե ուզենամ էլ, կկարողանա՞մ նման բան թույլ տալ:

- Միգուցե ի՞նքն է բացել խոսակցությունը, ինչո՞ւ ոչ:

- Բացարձակ, բացարձակ այդպիսի բան չի կարող լինել: Ով ինչ ուզում է՝ թող գրի:

- Իսկ ի՞նչ եք կարծում՝ ինչո՞ւ է տարածվել լուրը եւ ո՞ւմ կողմից:

- Չեմ կարող ասել, ես նման բաներով չեմ հետաքրքրվում եւ իմունիտետ եմ ձեռքբերել նման գրվածքներին արդեն 32 տարի:

- Պարոն Նազարյան, մենք տեղեկություններ ունենք, որ Քոչարյանն ԱՄՆ-ում է ապրում: Այդ մասին տեղեկություն ունե՞ք:

- Ես նման ինֆորմացիա չունեմ եւ պարտավոր էլ չեմ՝ ունենալու: Ես ուրիշների անձնական հարցերով երբեւիցե չեմ հետաքրքրվում:

- Մեկ այլ թեմայի մասին. Արտակարգ իրավիճակների նախարար Արմեն Երիցյանի վաղաժամ մահվանից հետո քննարկվում են նոր նախարարի պաշտոնի հավակնորդների անուններ: Ձեզ առաջարկվե՞լ է նախարար լինել:

- Ես բոլորին խորհուրդ եմ տալիս բախտագուշակությամբ չզբաղվել, նշանակված է ժամանակավոր պաշտոնակատար` պարոն Հայկարամ Մխիթարյանը, որը երկար տարիների աշխատող է (մոտ 6 -7 տարի), շատ լավ իրականացնում է իր պարտականությունները, կոլեկտիվն էլ շատ լավ համախմբված է, ինչպես եղել է պարոն Երիցյանի ժամանակ: Աշխատանքները շարունակվում են, մինչեւ ղեկավարություը կորոշի՝ պարոն Մխիթարյա՞նն է մնում, թե ուրիշ մարդ է նշանակվում: Ոչ մեկ ոչ մի բան չի կարող ասել:

- Ձեզ առաջարկ չի՞ եղել:

- Ոչ, ոչ, նման բան չկա, ինձ առաջարկել են Երեւանի փրկարարական ծառայության պետ, ես աշխատում եմ այստեղ, իմ աշխատանքից շատ գոհ եմ: Ինձ համար շատ ցավալի է, որ կողքի մարդիկ (քաղաքագետներ եւ այլն), անտեղյակ լինելով հայտարարություն են անում, որ վատ վիճակ է, եւ այն: Նման բան չկա, շատ բնականոն հունով աշխատանքները ընթանում են նախարարությունում: Մեր ծառայությունն այնպիսի ծառայություն է, որ ամեն վայրկյան պետք ենք գալիս: Մենք մեր աշխատանքն անում ենք՝ անկախ նրանից՝ ով է ղեկավար լինում, չի լինում: Բնականոն հունով աշխատանքները ընթանում են եւ լարվածություն, խժդժոց, անկանոն վիճակ չկա: Հավատացեք ինձ: Դա ինչ-որ մարդկանց ֆանտազիա է, որը իրականությանը չի համապատասխանում: