Պրեմիերա. «Կյանք ու կռիվ 2». հերոսների կյանքը 25 տարի անց

Արմանը շարունակում է հերոսական ուղին, Լեւոնը խուսափում է հայրենիքը դավաճանելու վտանգից, Աննան չի մոռանում Տիգրանին, Սոֆին սկսում է խոսել: «Կյանք ու կռիվ» ֆիլմի 2-րդ մասը բացահայտում է՝ ինչ փոփոխություններ են տեղի ունեցել սիրված հերոսների կյանքում 25 տարի անց: Այսօր՝ հունվարի 26-ին, «Կինոպարկում» կայացավ ռեժիսոր Մհեր Մկրտչյանի «Կյանք ու կռիվ 2. 25 տարի անց» ֆիլմի պրեմիերան:

Առաջին ֆիլմում հերոսների կյանքը ներկայացվում էր արցախյան պատերազմի ֆոնին: 2-րդում ռեժիսորն արծարծել է ապրիլյան քառօրյա պատերազմը, թեպետ այստեղ պատերազմն այնքան մեծ դեր չի ունենում հերոսների ճակատագրերի վրա, ինչպես 90-ականներինը:    

2-րդ ֆիլմը ներկայացնում է հայաստանցիների ներկան: Գործողությունները տեղի են ունենում 2016 թվականին: Այստեղ ապրում են մարդիկ, որոնց մի մասը շարունակում է 90-ականների սկզբին բռնած հերոսական ուղին, մի մասն էլ, թեեւ նախկինում խիզախորեն կռվել է հայրենիքի անկախության համար եւ պատրաստ է եղել զոհվել հանուն նրա, տարիների ընթացքում օգտվել է կյանքի ընձեռած հնարավորություններից, եւ դարձել այն մարդկանցից, ովքեր կողոպտում են երկիրն ու հայրենակիցներին:

Ազնիվ ու պատվախնդիր գնդապետ Արմանը, որի կյանքը Տիգրանը փրկում է առաջին ֆիլմում սեփականը զոհելով, հատուկ ջոկատայինների հրամանատարն է: Նա ապրում է համեստ կյանքով: Տարիների ընթացքում չի գայթակղվել մեծ գումարներ վաստակելու մոտ ընկերների մոլուցքով եւ իր դիրքը սեփական շահերի համար երբեք չի օգտագործում:

Առաջին ֆիլմում ընտանիքի հետ Ռուսաստան մեկնած մասնագիտությամբ բժիշկ Լեւոն Ամարյանը 2016-ին հայրենիքում հիմնական բնակություն հաստատելու որոշում է կայացնում: Տարիների ընթացքում նա մեծ հաջողությունների է հասնում, հիմնում է սեփական կլինիկաները, հարստանում: Սակայն հարստանում է ոչ ազնիվ ճանապարհով: Նա ընկերոջ հետ զբաղվում է զենքերի առքուվաճաքով, եւ քիչ է մնում, որ խորամանկ ընկերը խաբեությամբ ստիպի նրան զենք վաճառել ադրբեջանցիներին: Լեւոնն արագ գլխի է ընկնում ընկերոջ մտադրության մասին եւ գործարք չի կնքում, թեեւ արդյունքում մի քանի հարյուր հազար դոլարի կորուստ է ունենում: Նա մատնում է դավաճան ընկերոջը՝ այդպիսով վտանգելով սեփական կյանքը:

Լեւոնի կինը՝ Աննան, սիրող կին ու հոգատար մայր է: Երջանիկ է, սակայն անցյալի հուշերն ամեն պահ նրա հետ են: Ամեն ինչ նրան հիշեցնում է 90-ականների արցախյան պատերազմում զոհված հերոս հորը, եղբորը եւ սիրելիին՝ Տիգրանի, որին երբեք չի մոռանում ու որի անունով կնքել է որդուն: Նրա տղան 25 տարեկանում որոշում է Հայաստանի Հանրապետության քաղաքացիություն ստանալ եւ բանակ գնալ. ծառայել Արմանի ջոկատում: Աննան թեեւ դժվարությամբ է բաժանում որդուց, սակայն Լեւոնին հորդորում է Արմանից տղայի նկատմամբ հատուկ վերաբերմունք չխնդրել:

Սոֆին՝ առաջին ֆիլմի հերոս Տիգրանի քույրը՝ Արմանի կինը, շարունակում է ուժեղ ու կենսուրախ լինել, չկոտրվել կյանքի հարվածներից: Նա համբերատար է եւ ամեն հարցում սատարում է ամուսնուն, որը, ինչպես ցանկացած զիվորական, կարող է օրերով տանը չլինել: 2-րդ ֆիլմի վերջում Սոֆիի կյանքում կտրուկ շրջադարձ է տեղի ունենում: Նա սկսում է խոսել: Վերջին տեսարաններից մեկում Աննան, Լեւոնը, Արմանը եւ Սոֆին զրուցում են, երբ ինչ-որ մարդիկ փորձում են սպանել Լեւոնին ընկերոջը եւ նրա համախոհներին մատնելու համար: Արմանը գնդակն իր վրա է վերցնում: Այդ պահին Սոֆին անսպասելի բղավում է եւ կրկին սկսում է խոսել:

Ֆիլմի 1-ին մասն ավարտվել էր Տիգրանի մահով, սակայն այս անգամ գլխավոր հերոսը՝ Արմանը, չի մահանում: Ինչպես ֆիլմից հետո ռեժիսոր Մհեր Մկրտչյանը նշեց, կինոսերները նրան 2-րդ հերոսի մահը չէին ների:

«Կյանք ու կռիվ 2. 25 տարի անց»-ը բոլոր կինոթատրոնների մեծ էկրաններին կլինի հունվարի 27-ից: Նույն օրը փակ ցուցադրություն կլինի «Մոսկվա» կինոթատրոնում, որին հրավիրված կլինեն Սերժ եւ Ռիտա Սարգսյանները, ինչպես նաեւ մի շարք բարձրաստիճան պաշտոնյաներ: