Տիգրան Ուրիխանյանը ներել է շորթման մեջ մեղադրվող «Analitik.am» կայքի տնօրենին. ՖՈՏՈ

Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր շարունակվեց «Analitik.am» կայքի տնօրեն Անի Հովհաննիսյանի գործով դատական երկրորդ նիստը:

Ինչպես նախորդ նիստին այս նիստին եւս դատարան չէր եկել գործով առանցքային տուժող ԱԺ պատգամավոր Տիգրան Ուրիխանյանը: Վերջինս դատարան դիմում էր ուղարկել, որում նշում էր, որ ներել է «Analitik.am» կայքի տնօրեն Անի Հովհաննիսյանին ե տուժողի դիրքերից հանդես գալու ցանկություն չունի: Նա նաեւ նշել էր, որ չի ցանկանում ներկա գտնվել սույն նիստերին:

«Անալիտիկ» կայքի տնօրեն Անի Հովհաննիսյանը մեղադրվում է ԱԺ պատգամավոր Տիգրան Ուրիխանյանից շորթում կատարելու մեջ:  Ըստ մեղադրանքի նա Տիգրան Ուրիխանյանից ամսական պահանջել է վճարել 300 հազար դրամ:

Նախագահող դատավոր Արշակ Վարդանյանը նկատեց, որ արդար դատաքննության շահերից ելնելով, այնուամենայնիվ, առնվազն մեկ դատական նիստին պետք է ապահովվի Տիգրան Ուրիխանյանի ներկայությունը՝ ցուցմունք տալու տեսանկյունից:

Այսօրվա դատական նիստին դատարանը սկսեց գործում առկա ապացույցների հետազոտումը. գործի նյութերը կազմում է մոտ 18 հատոր: Մասնավորապես, հետազոտվեցին տարբեր քննչական գործողությունների վերաբերյալ որոշումներ, բերման ենթարկելու, ձերբակալելու արձանագրություններ: Հրապարակվեց «Analitik.am» կայքի խմբագրությունում կատարված խուզարկության արձանագրությունը: Համաձայն այդ արձանագրության խուզարկությամբ Վաղարշյան փողոցում գտնվող խմբագրությունից հայտնաբերվել եւ առգրավվել է Անի Հովհաննիսյանի նոթբուքը, համակարգիչ, մի քանի հոդվածներ, նոթատետրեր:

Դատարանում հետազոտվեց նաեւ Տիգրան Ուրիխանյանի ղեկավարած «Այլանս» կուսակցության փոխնախագահ Սարգիս Հարությունյանի (խարդախության համար այժմ դատապարտված է, -հեղ.) եւ Անի Հովհաննիսյանի օգնական Վարդիթեր Գիշյանի հանդիպման տեսանյութերը, որոնք կատարվել են արտաքին եւ ներքին դիտում օպերատիվ միջոցառման շրջանակներում: Ըստ այդ տեսանյութի՝ սրճարանների մեկում Սարգիս Հարությունյանն ինչ-որ գումար է փոխանցում Անի Հովհաննիսյանի օգնականին, ինչից հետո նա պարբերաբար Գիշյանին «խորհուրդ» է տալիս զանգել Անիին եւ տեղեկացնել այդ մասին: Այս կապակցությամբ պաշտպան Լիպարիտ Սիմոնյանը նկատեց, որ Հարությունյանը հատուկ է դրդել Գիշյանին՝ զանգահարել Անի Հովհաննիսյանին, որպեսզի զանգ ֆիքսվի եւ հետագայում այդ փաստը շահարկվի: Մեկ այլ տեսանյութում էլ երեւում էր, թե ինչպես են քաղաքացիական հագուստով անձինք Վարդիթեր Գիշյանի ձեռքերը բռնած սրճարանից դուրս հանում եւ նստեցնում մի մեքենա: Լիպարիտ Սիմոնյանը դատարանի ուշադրությունը հրավիրեց այն հանգամանքի վրա, բերման ենթարկելու արձանագրության մեջ նշված է, որ Գիշյանին բերման ենթարկողը կին է եղել, այնինչ տեսանյութում մի քանի տղամարդիկ են:

Գործի մի հատորում գրեթե 100 էջ զետեղված էին «Analitik.am» կայքում «Ալյանս» կուսակցության վերաբերյալ հրապարակումները: Այս կապակցությամբ ամբաստանյալ Անի Հովհաննիսյանը հանդես եկավ հայտարարությամբ, մասնավորապես, նշելով, որ այդ հրապարակումներում լուսաբանվել է Ուրիխանյանի գործունեությունը, ըստ Հովհաննիսյանի՝ նրա ընտանիքին վարկաբեկող որեւէ նյութ առկա չի եղել: Միայն հրապարակումներից մեկում նշված է եղել, որ Xnews.am կայքը պատկանում է Ուրիխանյանի կնոջը, եւ ներկայացվել է փաստ, որ կայքի դոմենը հանդիսանում է այն կազմակերպությունը, որը պատկանում է Տիգրան Ուրիխանյանի կնոջը:

«Եթե Տիգրան Ուրիխանյանը սեփական իսկ հայտարարությունների լուսաբանումը համարում է վարկաբեկիչ նյութ, ապա հավանաբար այդ մարդը հոգեբանական խնդիրներ ունի, ինչ վերաբերվում է նրա կնոջը վարկաբեկելուն, ապա, եթե ԱԺ պատգամավոր Տիգրան Ուրիխանյանը լրատվական կայք ունենալը համարում է վարկաբեկիչ, ապա էլ ինչ սպասես»,- եզրափակեց նա:

Սույն գործով հաջորդ դատական նիստը տեղի կունենա մարտի 6-ին  ժամը 12:00-ին: