Արցախի ՄԻՊ-ը հայցել է Եվրոպայի աջակցությունը արցախցիների իրավունքները պաշտպանելու հարցում

Արցախի մարդու իրավունքների պաշտպան Ռուբեն Մելիքյանը այսօր Բրյուսելում հրավիրված ասուլիսի ժամանակ անդրադարձել է Բրյուսելում, Ստրասբուրգում եւ Վիեննայում փետրվարի 13-16-ը ունեցած հանդիպումներին: ԼՂՀ մարդու իրավունքների պաշտպանի այցը համակարգվել է Հայկական Բարեգործական Ընդհանուր Միության Եվրոպայի մասնաճյուղի կողմից: Սա օտարերկրյա պաշտոնյայի կողմից ոչ պաշտոնական այցելություն էր եվրոպական մայրաքաղաք: Լեռնային Ղարաբաղի Հանրապետությունն իր միջազգայնորեն չճանաչված կարգավիճակի պատճառով չունի պաշտոնական հարաբերություններ եվրոպական դիվանագիտական մարմինների հետ:

Արցախի օմբուդսմենի մանդատն է ծառայել որպես մարդու իրավունքների գործունեությունը հսկող դիտորդ, կազմել հաշվետվություն մարդու իրավունքների խախտումների առնչությամբ, ինչպես նաեւ դիտարկել բողոքներ եւ խորհրդարանին նոր օրենսդրության մշակման խորհրդատվություն տրամադրել:

Անդրադառնալով իր այցի նպատակին՝ Մելիքյանը Բրյուսելի իր լսարանին ասել է. «Որպեսզի պաշտպանենք մարդու իրավունքները Լեռնային Ղարաբաղում, մենք պետք է զարգացնենք մեր կարողությունները, որի համար անհրաժեշտ են միջազգային կապեր եւ ներգրավվածություն»: Այցի ընթացքում օմբուդսմենը հնարավորություն է ունեցել աշխատանքային հարաբերություններ հաստատել մարդու իրավունքների մի շարք մասնագետների հետ:

Հանդիպումների ընթացքում Ռուբեն Մելիքյանը ներկայացրել է 2016 թվականին ադրբեջանական զինված ուժերի կողմից իրականացրած ապրիլյան քառօրյա պատերազմական գործողությունների վերաբերյալ վերջին հաշվետվությունը: Ամփոփելով սահմռկեցուցիչ բացահայտումները՝ նա նշել է, որ այդ հարձակումների ընթացքում գերեվարված հայ զինվորների եւ խաղաղ բնակչության 90%-ը խոշտանգվել, անդամահատվել կամ սպանվել է: Նա նաեւ ավելացրել է, որ նմանատիպ գործողություններ խրախուսվել են ադրբեջանական զինված ուժերի կողմից եւ կոչ արեց միջազգային կազմակերպություններին հետաքննել եւ դատապարտել նման հանցագործությունները:

Արցախի օմբուդսմենը, զեկուցելով իր ներկայիս աշխատանքների մասին, հավաստել է, որ Լեռնային Ղարաբաղի պաշտպանության ուժերի կողմից գերեվարված ադրբեջանական զինվորների իրավունքները հարգվում են: Մելիքյանը նշել է, որ Լեռնային Ղարաբաղում լայն կոնսենսուս կա, այն է՝ թույլ չտալ վրեժխնդրություն, որի հիմնավորումն է. «Մեր ուժը մեր չափորոշիչների մեջ է»:

Ռուբեն Մելիքյանը նաեւ մեկնաբանել է փետրվարի 8-ին բլոգեր Ալեքսանդր Լապշինի՝ Բելառուսից Ադրբեջանին արտահանձնումը: Վերջինս մեղադրվում է Արցախ մեկնելու եւ Արցախի մասին գրելու ենթադրյալ հանցագործության մեջ: Ըստ Մելիքյանի, դրանից կարճ ժամանակ անց մարդիկ, ովքեր եղել էին Ղարաբաղում, սկսեցին էլեկտրոնային սպառնացող նամակներ ստանալ, ոմանք էլ չեղարկեցին դեպի Ղարաբաղ իրենց ճամփորդական ծրագրերը:

ՀԲԸՄ Եվրոպայի գրասենյակի տնօրեն Նիկոլա Դավիդյանն ասել է. «Եվրամիությունն իրականացնում է «ներգրավվածություն առանց ճանաչման» քաղաքականությունը, որը վերաբերվում է անկախ չճանաչված պետություններին, մասնավորապես Մերձդնեստրին (Մերձդնեստրի Մոլդովական Հանրապետություն), Աբխազիային, Հյուսիսային Կիպրոսին: Նույնը պետք է իրականացնել նաեւ Ղարաբաղում: Ինչ խոսք, Ադրբեջանի ղեկավարությանը հեշտ չէ կառավարել, քանի որ այս երկիրն ունի նավթ ու գազ: Ղարաբաղը մեկուսացնելու Ադրբեջանի մոլուցքին սատարելը կմեծացնի հետագա պատերազմների եւ բարբարոսական գործողությունների հավանականությունն ու հաճախականությունը, որի հանդուրժումը կնշանակի դեմ գնալ եվրոպական արժեքներին»:

Դավիդյանը շարունակել է խոսքը՝ ասելով. «Մենք մասնավորապես շնորհակալ ենք բոլոր նրանց, ովքեր օժանդակեցին պրն. Մելիքյանի այցը եւ այս հանդիպումը կազմակերպելու հարցում: Հատուկ շնորհակալություն ԵԽ անդամ Ֆրանկ Էնգելին Եվրախորհրդարանում միջոցառումներ իրականացնելու համար»: