Մոսկովյան այցի արդյունքները. 102-րդ ռազմաբազան «ընդարձակվում» է դեպի Ղարաբաղ

Հայաստանի ռազմական, քաղաքական եւ տնտեսական վերնախավը մարտի 15-ին Մոսկվայում էր: Տրամաբանական է, որ ռուսական կողմի հետ քննարկվել են տնտեսական, քաղաքական եւ անվտանգությանը վերաբերող հարցեր:

Բաց աղբյուրներից ստացված տեղեկատվությամբ արդեն ստորագրվել է հայ-ռուսական ներդրումային հիմնադրամ ստեղծելու մասին համաձայնագիր: Սերժ Սարգսյան-Վլադիմիր Պուտին հանդիպման արդյունքում ՌԴ նախագահն առաջարկել է Հայաստանի հետ առեւտուր անել ազգային արժույթներով: Իսկ Հայաստանի եւ Ռուսաստանի զինված ուժերի գլխավոր շտաբի պետերի հանդիպմանը ՀՀ-ում ռուսական 102-րդ ռազմաբազան գնահատվել է որպես «տարածաշրջանային անվտանգության երաշխավոր»:

Հատկապես վերջին հայտարարությունը հետաքրքրական է, քանի որ նախ այն հնչել է ՌԴ Զինված ուժերի գլխավոր շտաբի պետ Վալերի Գերասիմովի շուրթերից: Մյուս կողմից, մինչեւ օրս ՌԴ ռազմաբազան համարվում էր միայն Հայաստանի անվտանգության երաշխավորը: Այս մոտեցումը դրված է 2010 թ. Հայաստանի եւ Ռուսաստանի միջեւ բազայի կարգավիճակի վերաբերյալ պայմանագրին կից կնքած նոր արձանագրության հիմքում: Թերեւս նորություն է ռուսական ռազմաբազայի գործառույթներին թեկուզ վերբալ առումով տարածաշրջանային անվտանգության երաշխավոր դիտարկելը: Սա, փորձագետների կարծիքով, ապրիլյան արյունալի իրադարձություններից հետո Ադրբեջանին ուղղված որոշակի մեսիջ է, քանի որ վերջինս, ռազմաճակատում իրավիճակը պարբերաբար շիկացնելով, շարունակում է սասանել տարածաշրջանային անվտանգության հիմքերը:

ՌԴ Արեւելագիտության ինստիտուտի Կովկասի եւ Կենտրոնական Ասիայի աշխատանքային խմբի ղեկավար, քաղաքագետ Ալեքսանդր Սկակովը Վալերի Գերասիմովի հայտարարությունը մեկնաբանում է որպես ռուսական 102-րդ ռազմաբազայի պատասխանատվության գոտու փաստացի ընդլայնում: Այս հայտարարությունը, նկատում է նա մեզ հետ զրույցում, ունի երկակի նշանակություն:

«Մի կողմից Հայաստանի անվտանգության ապահովումն անհնար է պատկերացնել տարածաշրջանային անվտանգության համայնապատկերից դուրս: Սա հասկանալի իրողություն է: Ամեն ինչ այս հարցում փոխկապակցված է: Սակայն, բացի Հայաստանից, տարածաշրջանում կա Լեռնային Ղարաբաղը, որը ՀՀ մաս չի հանդիսանում եւ որի դեմ անցյալ տարի սանձազերծվեցին պատերազմական գործողություններ: Այս իմաստով, Գերասիմովի խոսքերը կարելի է ընկալել որպես ռազմաբազայի պատասխանատվության գոտու յուրօրինակ ընդարձակում դեպի Ղարաբաղ, դեպի տարածաշրջան», - ընդգծում է Սկակովը եւ հավելում, որ հաշվի առնելով տարածաշրջանում ու հատկապես Հայաստանում ՌԴ ռազմաքաղաքական ու տնտեսական շահերի խորությունն ու շերտերը, բնականաբար, Ռուսաստանը շահագրգռված է Հարավային Կովկասի կայունությամբ: «Լարումը շփման գծում աճում է, կողմերը ավելի շատ խոսում են պատերազմից, քան խաղաղությունից ու կայունությունից: Ուստի ՌԴ-ի նպատակն է պահել կայունությունը: Այդ նպատակի իրականացման համար օգտագործվում է հենց այն գործիքակազմը, որը կա ձեռքի տակ», - ասաց Սկակովը:

«Նպատակն է՝ թույլ չտալ ապրիլյան գործողությունների կրկնությունը,- ասաց Սկակովը՝ հավելելով, որ այդ հայտարարությունների հասցեատերը Բաքուն է:- Բաքուն մինչեւ հիմա հրաժարվում է Վիեննայում եւ Սանկտ-Պետերբուգում նախագահների մակարդակով ձեռք բերված պայմանավորվածությունների կատարումից»,- պարզաբանեց փորձագետը:

Գաղտնիք չէ, որ Հայաստանը, լինելով տարածաշրջանում ՌԴ միակ դաշնակիցը, բազմիցս ամենաբարձր մակարդակում դժգոհություն է հայտնել ռուս-ադրբեջանական միլիարդավոր դոլարների հասնող ռազմական գործարքներից: Այս համատեքստում հատկանշական է մինչեւ Պուտինի հետ հանդիպումը եւ Գերասիմովի հայտարարությունը Սերժ Սարգսյանի՝ ՄԳԻՄՕ-ում ելույթի ժամանակ կատարած շեշտադրումը: «Մինչեւ 2016 թվականը մեր գործընկերները մեզ համոզում էին, որ, պատերազմական քարոզչություն եւ հակահայկական հիստերիա տարածելով, Բաքուն լուծում է սեփական ներքաղաքական խնդիրները: 2016 թվականի ապրիլին Ադրբեջանի կողմից սանձազերծված քառօրյա ռազմական արկածախնդրությունը Լեռնային Ղարաբաղի դեմ դարձավ Բաքվի հենց այդ երկարամյա ռազմատենչ հռետորաբանության եւ քաղաքականության մարմնավորումը՝ ի հակադրություն իր հողում սեփական ճակատագիրն ազատ տնօրինելու Արցախի ժողովրդի ցանկության», - ընդգծել էր Սարգսյանը:

Սա թերեւս ապրիլյան պատերազմական իրադարձություններից հետո Հայաստանում ՌԴ վարչապետ Դմիտրի Մեդվեդեւի հետ հանդիպմանը Սերժ Սարգսյանի խոսքի տրամաբանական շարունակությունն է: Այդ հանդիպմանը Սարգսյանը հատուկ ընդգծեց, որ «Ռուսաստանից ձեռք բերված սպառազինությունը» կիրառվեց հայկական կողմի դեմ, իսկ երկրորդ նման սադրանքը կհանգեցնի «լայնամասշտաբ օպերացիայի»: «Ռուսաստանը, հաշվի առնելով հակամարտության գոտում լարված իրավիճակը, բավականին բարդ դրության մեջ է: Այն մի կողմից փորձում է պահել իր ազդեցությունը տարածաշրջանում, իսկ մյուս կողմից սանձել Ադրբեջանին եւ փորձել մոտեցնել հակամարտող կողմերի դիրքորոշումները»,- արձանագրում է Ալեքսանդր Սկակովը:

Ըստ Սկակովի դիտարկման՝ Սարգսյան-Պուտին հանդիպումից հատկանշական է նաեւ մեկ այլ հանգամանք, որ ՌԴ ղեկավարը փաստացի առաջին անգամ բաց խոսեց ՀՀ-ում սահմանադրական փոփոխությունների եւ սպասվող քաղաքական տրասնֆորմացիաների մասին: «Ընդհանուր առմամբ, Ռուսաստանին ՀՀ-ում կատարվող փոփոխությունները հետաքրքրում են հենց երկրի ներքաղաքական կայունության տեսանկյունից: Իսկ այս հանդիպումը ես կգնահատեի որպես Հայաստանում սպասվող խորհրդարանական ընտրություններից առաջ մոտեցումների ճշգրտում», - ասաց մեր զրուցակիցը:

Հայաստանում առաջացած ներքաղաքական իրավիճակը, նշում է Սկակովը, շատ հարցեր է առաջացնում Մոսկվայում: «Ընդդիմության՝ որպես իրական քաղաքական գործոնի բացակայությունը մի կողմից, իսկ մյուս կողմից գործող իշխանությունների բավականին ցածր վարկանիշը հասարակության շրջանում. սա անհանգստացնող երեւույթ է Մոսկվայի համար: Ուստի, ՀՀ-ում սպասվող խորհրդարանական ընտրություններից առաջ այս հանդիպման կարիքը կար՝ առաջին ձեռքից Հայաստանում ստեղծված իրավիճակի մասին տեղեկատվություն ստանալու համար», - եզրափակեց Սկակովը:

Տպել
14936 դիտում

Մահացել է Սարդ-մարդու, Երկաթե մարդու, Հալքի, Ֆանտաստիկ քառյակի, Իքս մարդկանց «հայրը»

Նիկոլ Փաշինյան, Լենա Նազարյան, Արարատ Միրզոյան. հայտնի է «Իմ քայլը» դաշինքի առաջին տասնյակը

ԿԸՀ-ի որոշմամբ, ավագանու անդամ Արամ Մանուկյանի լիազորությունները դադարեցված են, նրան կփոխարինի Միքայել Թումանյանը

Դաշնակցության անունից առաջադրվելու եմ պատգամավորի թեկնածու, պատվի հարց է. Գեղամ Մանուկյան

Պաշտպանն ուշադրության կենտրոնում է պահում խաղաղ հավաքների ժամանակ մարդկանց իրավունքների երաշխավորման հարցը

Կոռուպցիայի դեմ պայքարն ու բարեփոխումներն առաջնահերթություն են. Փաշինյանը՝ ԵՄ դեսպաններին

Դիլիջանի ոլորաններում, Սյունիքի մարզի Գորիս և Քաջարան քաղաքներում մառախուղ է

Արագ հավաքովի, սենդվիչային տարբերակով թաղամաս. Ա. Մեսչյանն առաջարկում է համալրել բնակֆոնդը

«Ղեկը աջ» նախաձեռնությունը վաղը Կառավարության մոտ մեծ բողոքի ակցիա կիրականացնի

Կան պաշտոնյաներ, որոնք ստանում են 1 մլն դրամից ավելի թոշակ. Թանդիլյանն առաջարկում է չափ սահմանել

20-ամյա կնոջը դաժան ծեծի ենթարկած 30-ամյա տղամարդը նախկինում երեք անգամ դատապարտված է եղել

Արցախի ԱԳՆ ղեկավարն ընդունել է ԵԱՀԿ գործող նախագահի անձնական ներկայացուցչին

ՊԲ հրամանատարն ու Անջեյ Կասպրշիկը քննարկել են շփման գոտում տիրող իրավիճակը

Մինչեւ վերասարքավորում կատարելը իրենք չեն կարող այդ մեքենան շահագործել. Արմեն Փամբուխչյան

1988 թ. երկրաշարժի զոհերի հարգանքի տուրքի բոլոր միջոցառումները կկազմակերպվեն բարձր մակարդակով. Ցոլակյան

Ոստիկանին փորձում են անհիմն ազատել աշխատանքից. նա դիմում է ՀՀ ոստիկանապետին

Վերաքննիչը բեկանեց Շահեն Հարությունյանին տուգանելու մասին Վարչական դատարանի որոշումը

Իմ երեխան, իմանալով, որ մեքենան անսարք է, ասել է՝ ես չեմ վարի. զինծառայողի ծնողները մանրամասներ են պատմում

Ախալցխայում հայկական դպրոցի աղջիկներին մի քանի օր հետևել է Պակիստանի քաղաքացի. նրան ձերբակալել են

Քառօրյա պատերազմի ժամանակ մարտական հերթապահություն իրականացրած ՀՊՏՀ ուսանողների բաց նամակը վարչապետին, ԿԳ նախարարին