Բարձր աթոռներին նստածները երկիրը սարքել են «Իսլամական պետություն». Արարատ Խանդոյան

Կենտրոն եւ Նորք-Մարաշ վարչական շրջանների ընդհանուր իրավասության դատարանում այսօր շարունակվեց ոստիկանության Պարեկապահակային ծառայության գնդի գրավմանը հաջորդած Խորենացիի դեպքերով կալանավորված «Սասնա ծռեր» խմբի անդամ Արայիկ Խանդոյանի եղբոր՝ Արարատ Խանդոյանի գործով դատական նիստը:

Խանդոյանը մեղադրվում է 2016 թվականի հուլիսի 20-ին Երեւան քաղաքում տեղի ունեցած զանգվածային անկարգություններին մասնակցելու, ոստիկանի վահանը քաշելու, նրա նկատմամբ բռնություն գործադրելու մեջ: Գործով տուժող է ճանաչվել 46 ոստիկան: Ընդհանուր առմամբ 46-ից հարցաքննվել է 36 ոստիկան:

Մասնավորապես, այսօր դատարանը լսեց բախումների ժամանակ վնասվածք ստացած 13 ոստիկանի, որոնցից երկուսը ՀՀ ոստիկանության կազմակերպված հանցավորության դեմ պայքարի գլխավոր վարչության օպերլիազորներ էին: Նրանցից մեկը՝ Արտակ Բարսեղյանը, պատմեց, որ հուլիսի 20-ին ծառայություն էր իրականացնում Խորենացի փողոցում, այդ օրը եղել է ոչ թե ոստիկանական համազգեստով, այլ՝ քաղաքացիական: Դատարանում օպերլիազորը պատմեց, որ դեպքի օրը՝ հուլիսի 20-ի երեկոյան, ժամը 10-ին, ստացած վնասվածքից գլխի աջ հատվածում ծանր վնասվածք է ստացել եւ ուշագնաց եղել: Արթնացել է հիվանդանոցում: Նա ասաց, որ այդ ժամանակ իրարանցում էր, չի նկատել՝ ով է եղել հարվածողը, սակայն վստահորեն պնդեց, որ ծանր առարկան նետվել է ժողովրդի կողմից, ոչ թե ոստիկանների: Մեղադրող դատախազ Հայկ Պետրոսյանի հարցին, թե բախումների ժամանակ Խանդոյանին տեսե՞լ է ապօրինի գործողություններ իրականացնելիս, տուժող ոստիկանը պատասխանեց. «Տվյալ օրը ինքը ՊՊԾ գնդում է եղել»: Ոստիկանի այդ պատասխանից հետո թե՛ Խանդոյանը եւ թե՛ դահլիճում ներկա գտնվողները սկսեցին ծիծաղել: «ՊՊԾ գնդում եղբայրն էր (նկատի ունի Միայնակ Գայլ Արայիկ Խանդոյանին)»,- նրան հուշեց դատախազ Հայկ Պետրոսյանը, իսկ Արարատ Խանդոյանը արձագանքեց. «Այդ մեկն էր մնացել, մի հոդված էլ ավելացավ»:

Առավել հետաքրքրական էին 6-րդ վարչության մյուս աշխատակից, օպերլիազոր, գործով տուժող Առաքել Սահակյանի ցուցմունքները: Նրա պատմելով՝ Խորենացիում բախումները տեղի են ունեցել առավոտյան ժամը 5.00-ի սահմաններում, այն դեպքում, երբ հուլիսի 20-ի բախումները սկսվել են 22:00-ի սահմաններում եւ ավարտվել երկու ժամ անց: Թե ինչ բախումների էր այդ օրը մասնկացել օպերլիազորը՝ լուսադեմին, այդպես էլ պարզել չհաջողվեց: Նա պատմեց, որ լուսադեմի 5-ի բախումների ժամանակ ոտքի կոտրվածք է ստացել, սակայն չի տեսել, թե ում կողմից է հարվածը եղել եւ ինչով: «Ցավ եմ զգացել, ընկել եմ գետնին, տեղափոխվել եմ հիվանդանոց»,- ասաց Սահակյանը՝ հավելելով, որ այդ օրը ինքը ծառայություն է իրականացրել քաղաքացիական հագուստով: Ամբաստանյալ Արարատ Խանդոյանը տուժողի եւ մեկ այլ վկա ոստիկանի ցուցմունքներում հակասություններ տեսավ, որին կանդրադառնա առաջիկա նիստերից մեկում:  

Դատարանում հարցաքննված տուժող 13 ոստիկաններից եւ ոչ մեկը չէր տեսել, որ Արարատ Խանդոյանը հարվածեր իրենց, կամ մեկ այլ ոստիկանի: Տուժողներից Գրիգոր Կոլյանն էլ, ինչպես նկատեց նախագահող դատավոր Մնացական Մարտիրոսյանը, ոստիկանական բառապաշարով էր պատասխանում հարցերին՝ «Ճիշտ այդպես», «ոչ մի կերպ»: Նրա խոսքով՝ երբ քաշքշուկի ժամանակ ցուցարարները իր վահանը քաշել են այդ ընթացքում ծոծորակի շրջանում վնասվածք է ստացել, գիտակցությունը կորցրել է: Նրա խոսքով՝ ցուցարարները չեն ենթարկվել ոստիկանության օրինական պահանջներին, ցանկացել գնալ դեպի գրաված ՊՊԾ գունդ, ինչը ըստ նրա՝ վտանգավոր էր. «Այնտեղ կրակոցներ էին հնչում»,- ասաց տուժողը: Ոստիկանության զորքերի ծառայող Խոջարյան Արթուրն էլ ասաց, որ բախումների հետեւանքով ոտքի շրջանում վնասվածք է ստացել: «Քարը կպավ ոտքիս»,- ասաց նա: Մեղադրող դատախազի ճշտող հարցին, թե ինչո՞ւ էին բախումների ժամանակ ոստիկանները մահականերով հարվածում վահաններին, տուժողը պատասխանեց. «Հոգեբանական ճնշում էինք գործադրում»:

Տուժող ոստիկանների հրացաքննությունից հետո դատավոր Մնացական Մարտիրոսյանը առաջարկեց փոխել ապացույցների հետազոտման հաջորդականությունը, հետազոտել գործում եղած փաստաթղթերը, որից հետո իրեղեն ապացույցները, տեսանյութերը, հետո հարցաքննել ամբաստանյալ Խանդոյանին, ինչի դեմ դատավարության մասնակիցները չառարկեցին: Այսպիսով՝ դատարանում հետազոտվեցին մի շարք փաստաթղթեր, որոնք վերաբերում էին դեպքի վայրի զննությանը, իրեղեն ապացույցներին, տուժողների վնասվածքներին եւ այլն: Նիստի ընթացքում Արարատ Խանդոյանը հայտարարեց, որ տեսողության հետ կապված խնդիրներ ունի: Նա նշեց, որ հուլիսի 20-ին բախումների ժամանակ կիրառած հատուկ միջոցներից վնասվել է աչքը, դիմել է ՔԿՀ, որտեղից 7 ամիս հետո են միայն արձագանքել: «Ասել են՝ վիրահատություն կլինի, բայց ինչքան ժամանակ հետո, չեմ իմանում, որովհետեւ սա մեր կեղտոտած պետությունն ա: Տականքները նստել են բարձր աթոռներին ու սկսել են երկիրը աղավաղել, երկիրը սարքել են Իսլամական պետություն»,-հայտարարեց Խանդոյանը, նրա հայտարարությունը փորձեց ընդհատել նախագահող դատավորը: Խանդոյանը նաեւ հայտարարեց, որ իր վնասվածքի մասով նախաքննական մարմինը պատշաճ քննություն չի իրականացրել. «Չեն արել, որպեսզի հաճոյանան իրենց տերերին»,- հայտարարեց Խանդոյանը:

Այս գործով հաջորդ դատական նիստը տեղի կունենա մարտի 23-ին: