Վանշը պատրաստվում է Հայաստան գալ. Armtimes-ի զրույցը հնդիկ հայտնի դերասանի հետ

Վերջին մի քանի ամիսների ընթացքում հայ հեռուստադիտողների շրջանում ամենաքննարկվող հեռուստանախագծերից մեկը հնդկական «Մերժվածը» սերիալն է: Հեռուստասերիալի հայ երկրպագուներն ապրում են հերոսների կյանքով. ուրախանում են, երբ Իչակիի մոտ ինչ-որ մի բան ստացվում է, զայրանում Տապասիայի չարագործությունների պատճառով: Շատերը տխրել էին, երբ մահացավ սերիալի հիմնական հերոսներից մեկը՝ Վանշը՝ Իչակիի առաջին ամուսինը: Թեեւ Վանշը «Մերժվածը» սերիալում եղել է կարճ ժամանակ, հասցրել է սիրվել հայ լսարանի կողմից: Այդ պատճառով armtimes.com-ը կապ հաստատեց նրան մարմնավորող Ռոհիթ Խուրանայի հետ եւ խոսեց հայերի հետ նրա կապի, «Մերժվածը» սերիալում նրա կերպարի եւ ապագա ծրագրերի, այդ թվում՝ Հայաստանում աշխատելու նրա նպատակի մասին: Ռոհիթը Հնդկաստանում հայտնի դերասան է, խաղացել է մի շարք հեռուստասերիալներում եւ ֆիլմերում: Նա նաեւ աշխատում է որպես մոդել:      

- Ռոհի՛թ, գիտեի՞ք, որ «Մերժվածը» սերիալը սիրված է հայ հեռուստադիտողի կողմից, եւ Ձեզ էլ հայ լսարանը շատ է սիրում:

- Այո՛, գիտեմ, որ մեր նախագիծը բարձր վարկանիշ ունի Հայաստանում, զգում եմ մարդկանց սերը, տեղյակ եմ, որ նախագիծը մեծ ճանաչում ունի: Կարծում եմ՝ հրաշալի է, որ մեր նախագիծը կարող է միավորել 2 տարբեր աշխարհների պատկանող լսարաններին: Ես մեծացել եմ «Street Hawk», «The Old Fox» եւ նմանատիպ այլ նախագծեր դիտելով: Դրանք հնդկական չեն, «Street Hawk»-ն ամերիկյան, իսկ «The Old Fox»-ը գերմանական նախագիծ է, բայց վստահեցնում եմ՝ 80-ականներին եւ 90-ականներին դրանք մեծ ճանաչում ունեին Հնդկաստանում: Անգամ իմ ամենահամարձակ երազներում չէի կարող պատկերացնել, որ մեր «Մերժվածը» սերիալը հայտնի կլինի արտասահմանում, հատկապես Հայաստանում: Կարծում եմ՝ սա մեծ նվաճում է:

- Դուք ինչ-որ կապ ունե՞ք Հայաստանի հետ, հայ ընկերներ ունե՞ք:

- Ես ճանաչում եմ ձեռք բերել հայ լսարանի շրջանում եւ չգիտեմ՝ ինչպես շնորհակալություն հայտնեմ այդ սիրո ու աջակցության համար: Ես ամեն օր այնքան նամակներ եւ խնդրանքներ եմ ստանում հայ ընկերների ու երկրպագուների կողմից, որ ինչ-որ առումով ողջ Հայաստանն իմ ընկերն է: Ես տեսնում եմ հայ ժողովրդի էներգիան, հայերը շատ խելացի են: Ես կապ ունեմ Լիլիթ Մովսիսյան անունով երիտասարդ, էներգիայով լի մի աղջկա հետ, նա Երեւանից է, սովորում է Casting School-ում: Նա մեզ համար Հայաստանում մի նախագծի շուրջ քննարկումների մեջ է:

- Հայաստանում որեւէ նախագծի մասնակցելը պարզապես ցանկությու՞ն է, թե՞ իրական ծրագրեր ունեք:

- Տեսնելով հայերի կողմից այդ սերն ու աջակցությունը՝ վստահ եմ, որ շուտով կաշխատեմ Հայաստանում: Կոնկրետ պլաններ ունեմ: Միշտ մտածել եմ այսպես. եթե ցանկանում ես ինչ-որ բան անել, պետք է անես դա: Երբ «Տնից հեռու» նախագծում նկարահանվելու համար հանդիպեցի Վարդան Սարգսյանին, նրան ասացի, որ անհամբերությամբ սպասում եմ, թե երբ եմ աշխատելու Հայաստանում, երբ եմ այդտեղ լինելու: Ինչ վերաբերում է իմ ծրագրերի մանրամասներին, ապա դրանք բացահայտելու համար դեռ վաղ է, թող անակնկալ լինի:

- Խոսենք Ձեր հերոսի՝ Վանշի մասին: Նա հակասական կերպար է. երբեմն դրական է, երբեմն էլ չարագործ: Ըստ Ձեզ՝ ինչպե՞ս է նա կարողացել նվաճել հեռուստադիտողի սերը:

- Ինձ դուր է գալիս Ձեր բնորոշումը՝ հակասական, սա ընկալում է: Յուրաքանչյուր դեր, որը դերասանը խաղում է, անկայունություն է պահանջում, նույնիսկ մեր առօրյա կյանքում մենք տարբեր դերեր ենք խաղում: Մեր օրերն իրար նման չեն, եւ մեզ առաջնորդում են մեր էմոցիաները: Վանշը թմրամոլ էր, եւ նա մերժված էր: Եթե դու կարող ես զգալ՝ ինչ է նշանակում անցանկալի լինել, դու կհասկանաս՝ ինչ է նշանակում սիրված չլինել: Երբ նա հանդիպեց Իչային, հոգատարություն, սեր զգաց, եւ դա օգնեց նրան ավելի լավ կյանք վարել: Կարծում եմ՝ լսարանը տեսավ նրա սրտում եղած ցավը եւ այն, թե ինչպես էր նա փորձում փոխվել: Գուցե հենց դա է պատճառը, որ նա սիրվեց:

- Ի՞նչ այլ կերպարներ եք մարմնավորել, որոնք նույնքան ազդեցիկ եւ կարեւոր են եղել Ձեր կարիերայում, որքան Վանշը:

- Ես սիրում եմ իմ բոլոր կերպարները եւ ջանասիրաբար աշխատում եմ կատարելության հասնելու համար: Իմ կարողությունները ստուգելու համար միշտ բարդ դերեր եմ վերցնում: Հնդկաստանում մարդիկ գիտեն, որ «Sony Television» հեռուստաընկերության «Khoobsurat Dil ki Nazar» սերիալում մարմնավորած իմ կերպարն իրոք բարդ էր: Հանդես էի գալիս Մադհավ անունով մի տղայի դերում: Նա հաջողակ ռադիոհաղորդավար է, որը շատ գեղեցիկ ձայն ունի, սակայն արտաքնապես գրավիչ չէ: Մարդիկ սիրահարվում են նրան, երբ ռադիոյով լսում են նրա ձայնը, սակայն շոկի են ենթարկվում, երբ անձամբ տեսնում են նրան: Բայց հոգու խորքում Մադհավը պարկեշտ եւ հոգատար անձնավորություն է: Մեկ այլ բարդ դեր եմ ունեցել «ZEE TV»-ի «Lajwanti» կոչվող հեռուստասերիալում: Այնտեղ ես մարմնավորում եմ Ջամալ Փաշվարի անունով վաճառականի, որը կաշվե իրերի առքուվաճառքով է զբաղվում: Դա բացասական կերպար է, սակայն իր մեջ դրական հատկանիշներ էլ ուներ:

^{Վարդան Սարգսյանը եւ Ռոհիթ Խուրանա «Տնից հեռու» հաղորդման նկարահանման ժամանակ}

- Դուք հանդես եք գալիս ինչպես հեռուստասերիալներում, այնպես էլ ֆիլմերում: Ո՞րն է ավելի հոգեհարազատ:

- Կասեի, որ երկուսն էլ հոգեհարազատ են: Կարեւորն այն է, թե ինչ դեր եմ խաղում: Տեսեք, Բոլիվուդի շատ դերասաններ, որոնք խաղում են ֆիլմերում, մինչեւ այդ հանդես են եկել հեռուստանախագծերում, նույն կերպ էլ հեռուստատեսության աստղերը խաղացել են ֆիլմերում: Կարեւորն այն է, որ լսարանին դուր գա, իսկ հեռուստատեսություն է, թե՝ կինո, էական չէ:

- Դուք նաեւ որպես մոդել եք աշխատում: Եթե այս դեպքում էլ այդ երկուսը համեմատեք, ո՞րն եք ավելի շատ սիրում:

- Ես նույնը կասեմ: Մենք բոլորս կյանքում առաջ ենք շարժվում սովորելով: Երբ իմ ճամփորդությունը սկսվեց, ես սկսեցի վերցնել այն ամենը, ինչ գալիս էր իմ ճանապարհին: Ինչպես ասում են, ճամփորդելն ավելի լավ է, քան տեղ հասնելը: Հետեւաբար, ես սիրում եմ կյանքի ճամփորդությունը եւ ընդունում եմ այն ամենը, ինչ կյանքը տալիս է:  

- Եվ վերջում, ի՞նչ կմաղթեք Ձեր հայ լսարանին եւ երկրպագուներին:

- Հայաստանը եւ Հնդկաստանը բարեկամ երկրներ են, մենք մշակութային շատ նմանություններ ունենք, պատմականորեն էլ Հայաստանն ու Հնդկաստանն ավելի քան 2500 տարվա դաշնակիցներ են: Ես այդտեղ բոլորին կասեմ հետեւյալը. խնդրում եմ, շարունակեք հնդկական հեռուստանախագծեր դիտել եւ ձեր սիրով պատել մեր դերասաններին: Մենք էլ կշարունակենք ուրախացնել մեր երկրպագուներին մեր դերերով: Մենք ձեզ շատ ենք սիրում: