Մահափորձ վրաց պատրիարքի դե՞մ. «ցիանիդի գործի» առեղծվածը

12/04/2017 schedule09:50

Ապրիլի 5-ին «Ցիանիդի գործով» մեղադրվող հոգեւորական Գիորգի Մամալաձեի փաստաբան Միխեիլ Ռամիշվիլին հայտարարեց, որ հոգեւորականը հացադուլ է սկսել: Փաստաբանի խոսքերով՝ Մամալաձեն պահանջում է համայն վրաց կաթողիկոս-պատրիարք Իլյա երկրորդի եւ սուրբ Սինոդի անդամների  հետ հանդիպում ու բաց դատ: Հոգեւորականը գտնում է, որ հետաքննությունը կողմնակալ է ընթանում եւ սրա հետ կապված` ինքն ասելիք ունի:

«Ցիանիդի գործ» անվանումը ստացած հետաքննությունը սկսվել է փետրվարի 2-ին, երբ լրագրող Իրակլի Մամալաձեն դիմում էր ներկայացրել Վրաստանի գլխավոր դատախազություն, ըստ որի, իր ծանոթ Հայր Գիորգին խնդրել է օգնել իրեն` սեղմ ժամկետներում կալիումի ցիանիդ ձեռք բերելու գործում: Ցիանիդը թունավոր նյութ է: Այն օգտագործվում է արդյունաբերության մեջ, այդ թվում նաեւ ոսկու արդյունահանման: Ցիանիդի միացությունների մի շարք տեսակներ են հայտնի, այդ թվում նատրիումի եւ կալիումի ցիանիդ:

Փետրվարի 13-ին Վրաստանի գլխավոր դատախազությունը հայտարարեց, որ Թբիլիսիի միջազգային օդանավակայանում ձերբակալվել է պատրիարքի սեփականության կառավարման վարչության պետ Գիորգի Մամալաձեն, որն ուղեւորվում էր Բեռլին: Հոգեւորականի պայուսակում նատրիումի ցիանիդ է հայտնաբերվել, որը մարդու օրգանիզմում հայտնվելուց հետո ակնթարթային մահ է առաջացնում: Դատախազությունը հայտարարեց նաեւ, թե հոգեւորականը փորձել է թունավորել բարձրաստիճան հոգեւորականներից մեկին, հստակ անուն չնշելով: Լրատվամիջոցների մեծ մասը մահափորձը վերագրեց երկրի ամենաճանաչված եւ սիրված դեմքերից մեկին` համայն վրաց կաթողիկոս պատրիարք Իլյա երկրորդին: Սրան հիմք ծառայեց Վրաստանի գլխավոր դատախազ Իրակլի Շոթաձեի հայտարարությունը, թե Մամալաձեն պատրաստվում էր նատրիումի ցիանիդը տեղափոխել Գերմանիա, որտեղ այն ժամանակ բուժվում էր պատրիարքը:

Գործընթացը սկսեց ավելի հետաքրքիր դառնալ այն ժամանակ, երբ դատախազությունը փոխեց վարկածը եւ հայտարարեց, թե Մամալաձեն փորձել է թունավորել ոչ թե բարձրաստիճան հոգեւորականի, այլ պատրիարքարանի գլխավոր քարտուղար Շորենա Թեթրուաշվիլիին: Նա նաեւ մեղադրվում է ապօրինի զենք ձեռք բերելու եւ կրելու մեջ: Քննությունը տարվում է Վրաստանի քրեական օրենսգրքի 18-108 եւ 236 հոդվածներով, որոնք նախատեսում են մինչեւ 15 տարի ազատազրկում:

Հատկանշական է, որ հոգեւորականի ձերբակալման մասին հասարակությունը իմացավ ընդդիմադիր «Ռուսթավի 2» հեռուստաընկերության օգնությամբ, երբ «Պոստ սկրիպտում» հաղորդման եթերում խոսվեց օդանավակայանում իրականացված հատուկ գործողության վերաբերյալ: Այդ պահի դրությամբ որեւէ գերատեսչություն հոգեւորականի ձերբակալման վերաբերյալ տեղեկություն չէր հրապարակել: Միեւնույն օրը` փետրվարի 12-ին, պարզ դարձավ, որ Իլյա երկրորդի անվտանգության պետ Սոսո Օխանիշվիլին, որը նաեւ հանդիսանում է համայն վրաց կաթողիկոս պատրիարքի եղբոր փեսան եւ Իլյա երկրորդի հետ միասին գտնվում էր Գերմանիայում, վերադարձել է Վրաստան, իսկ Գերմանիայում բուժվող վրաց պատրիարքի պաշտպանությունը ուժեղացվել էր Վրաստանի պետական անվտանգության ծառայության կողմից, որը մինչ այդ չի զբաղվել Իլյա երկրորդի պաշտպանությամբ:

«Ցիանիդի գործը» Վրաստանում տեղի ունեցող գրեթե ամենակարեւոր իրադարձությունն էր: Թեման ակտիվորեն քննարկվում էր հասարակության լայն շերտերում: Իշխանության ներկայացուցիչները գտնում էին, թե թեման հանրային քննարկման առարկա կարելի է դարձնել այն ժամանակ, երբ հետաքննությունը կպարզի ամեն ինչ, իսկ որոշ հոգեւորականներ ասում էին, որ Մամալաձեն պատրիարքի վստահությունը վայելող հոգեւորական է եղել: Հետաքննությունը շարունակվում է: Գիորգի Մամալաձեն չի ընդունում իր մեղքը եւ ըստ փաստաբանների` պատրաստ է սկանդալային գործով ցնցող ցուցմունքներ տալ:

Հետաքննության վերաբերյալ խոսվել էր նաեւ նախագահ-պատրիարք հանդիպման ժամանակ: Այդ ժամանակ պատրիարքը հայտարարել էր. «Ստեղծվել է մի իրավիճակ, որը մեր եկեղեցու պատմության մեջ մինչ այս չէր եղել: Եվ դա ոչ միայն եկեղեցու, այլ նաեւ պետության խնդիրն է»: Նախագահ Մարգվելաշվիլիին իր հերթին հայտարարել էր, որ բոլոր կողմերին պետք է արտահայտվելու եւ սեփական կարծիքն ապացուցելու հնարավորություն ընձեռվի:

Որոշ աստվածաբաններ գտնվում են, որ խնդիրը պետք է դիտարկել լայն համատեքստում: Աստվածաբան Բեքա Մինդիաշվիլիի կարծիքով, եկեղեցու շուրջ տեղի ունեցող գործընթացը պայքար է պատրիարքի աթոռի, իշխանության եւ հարստության համար:

«Դեռեւս 4 տարի առաջ եմ ասել, որ պատրիարքի աթոռի համար պայքար է ընթանալու: Մի կողմից Դիմիտրի Շիոլաշվիլին է, որն ունի պատրիարքի աջակցությունը, մյուս կողմից պայքարում է այն անձը, որը սուրբ Սինոդի անդամների մեծամասնության ձայնին կարժանանա եւ իշխանությունների կողմից աջակցություն կստանա»,- հայտարարել է Մինդիաշվիլին:

Մինդիաշվիլին գտնում է, որ նման գործողություններով Վրաստանի իշխանությունները փորձում են թուլացնել պատրիարքի կողմից աջակցության արժանացած Դիմիտրի Մինդիաշվիլիի դիրքերը:

Որպեսզի հասկանալի լինի, թե ինչու է եկեղեցուն վերաբերող գործը հասարակության տարբեր շերտերի մեջ նման աղմուկ բարձրացրել, պետք է նախ հասկանալ, թե ինչ դեր ունի եկեղեցին վրաց հասարակության կյանքում: Ֆրիդրիխ Էբերտի հիմնադրամի Հարավկովկասյան տարածաշրջանային գրասենյակը 14-29 տարեկան երիտասարդ վրացիների վերաբերյալ հետազոտություն է անցկացրել: Հետազոտության համաձայն` միակ ինստիտուտը, որին միջին վիճակագրական երիտասարդ վրացին ամեն հարցով վստահում է, եկեղեցին է (81 տոկոս), 97 տոկոսը հավատում է Աստծուն եւ վստահ է, որ բարոյականության նորմերն ու դրա հետ կապված պարտականություններն Աստծո կողմից են տրված (85 %): Այս ամենի հետ մեկտեղ, միջին վիճակագրական երիտասարդ վրացին անվստահությամբ է վերաբերվում այլ դավանանքի ներկայացուցիչներին:

Հ.Գ. Երեկ ուշ երեկոյան հայտնի դարձավ, որ Գիորգի Մամալաձեն դադարեցրել է հացադուլը:

Նորայր Գասպարյան
Թբիլիսի

Տպել
2724 դիտում

Աշխարհի ամենախոշոր կրուիզային ընկերություններից մեկն իր երթուղուց հանել է Թուրքիան

Երեխա էր ուզում. Արմեն Ջիգարխանյանը նոր բացահայտումներ է արել կնոջ հետ կոնֆլիկտի մասին

Իսպանիայի իշխանությունները չեն պատրաստվում ձերբակալել Կատալոնիայի առաջնորդին

Հայտնի է, թե ով կլինի հայաշատ Ախալցխայի քաղաքապետը

Ընտրությունները Ջավախքում. հաղթել են դատախազության աշխատակիցն ու վրացերենի ուսուցչուհին

Պակիստանը ցանկանում է միանալ Ադրբեջան-Իրան-Ռուսաստան եկաթուղային միջանցքին

Քրդերը վերահսկողության տակ են վերցրել Սիրիայում խոշորագույն նավթահանքերից մեկը

Մադագասկարում ժանտախտից արդեն 100 մարդ է մահացել

Մադրիդը կոչ է արել կատալոնացիներին ենթարկվել կենտրոնական իշխանությունների հրահանգներին

Արցախում մահացած զինծառայողների գործերով ձերբակալվածներ կան

Հայաստանն ավելացնում է պարտքային բեռը. մինչեւ տարեվերջ` 6,7 մլրդ դոլար

Ռուսաստանում ամենահարուստ հայերից մեկը 1 օրում 600 միլիոն դոլար է կորցրել

Կրասնոդարում 2 հայեր կրակել են երիտասարդների ուղղությամբ. Կա 2 զոհ

Մյունխենում ձերբակալել են հեծանիվով և դանակով անցորդների վրա հարձակման կասկածյալին

ՏԻՄ ընտրությունները Վրաստանում. Թբիլիսում հաղթում է իշխանական թեկնածուն

ՏԻՄ ընտրություններ Ախալքալաքում. Բախումներ, ընտրախախտումներ և 6 հայ թեկնածու

Ռուսաստանում արգելել են Հայաստանի մասին ադրբեջանական ֆիլմի ցուցադրությունը

Սիմոն Մարտիրոսյանը, Գոռ Մինասյանը եւ Արփինե Դալալյանը՝ երիտասարդական ԵԱ չեմպիոններ

Թեհրանում բացվել է Հայաստանի պատմության եւ Իրանի ազգային թանգարանների համատեղ ցուցահանդեսը

Հայկական ընկերությունը ստեղծել է աշխարհում առաջին «ճախրող» տեսախցիկը