«Իգլայի» գործով Սամվել Բաբայանն ու գործարարն առերեսվել են. ինչ հակասություն է եղել

Վերաքննիչ քրեական դատարանը վաղը կորոշի՝ ազատ արձակե՞լ ԼՂՀ պաշտպանության բանակի նախկին հրամանատար, «Օհանյան-Րաֆֆի-Օսկանյան» դաշինքի փաստացի ղեկավար եւ ԼՂՀ պաշտպանության բանակի նախկին հրամանատար Սամվել Բաբայանին, թե՞ պահել կալանքի տակ:

Այսօր նույն դատարանում մոտ մեկ ժամ քննվում էր շուրջ մեկ ամիս անազատության մեջ գտնվող Սամվել Բաբայանի կալանքի վերաբերյալ առաջին ատյանի դատարանի որոշման դեմ բողոքը: Բողոքի քննությանը ներկա է եղել նաեւ ինքը՝ Բաբայանը:

Այդ ընթացքում դատարանի դիմաց էին հավաքվել մեծ թվով մարդիկ՝ Բաբայանի հարազատները, ազատամարտիկներ Սմբատ Հակոբյանը, Գագիկ Մելքոնյանը, քաղաքական գործիչ Արամ Հարությունյանը, ավելի ուշ նրանց միացան նաեւ ՕՐՕ դաշինքից Արմեն Մարտիրոսյանը եւ Հովսեփ Խուրշուդյանը:

«Բողոքը ներկայացրի վերաքննիչ դատարանում։ Ըստ ինձ՝ նորմալ կարգով ընթացավ բողոքի քննությունը»,- ասաց պաշտպանը: Հարցին՝ Սամվել Բաբայանը հայտարարություն արե՞լ է բողոքի քննության ընթացքում, Ավետիս Քալաշյանը պատասխանեց. «Հանգամանորեն ներկայացրեց, որ ինքը ոչ մի կապ չունի իրեն մեղսագրվող արարքների հետ, իրեն անիմաստ են պահում, ոչնչով հիմնավորված չեն այն մեղադրանքները, որոնք իրեն մեղսագրել են, ինքը չի փախնի, ինքն Արցախի հերոս է, պատերազմի ժամանակ չի փախել։ Այսպես ներկայացրեց՝ ումից եւ ինչի համար պետք է փախնեմ, ինչ եմ արել, որ փախնեմ։ Բնականաբար, գտնում է, որ իր նկատմամբ կալանավորումն անհիմն է եւ խնդրեց կայացնել արդարացի որոշում»։

Ճշտող հարցին ի պատասխան Քալաշյանն ասաց, որ Սամվել Բաբայանն այսօր քաղաքական հայտարարություն չի արել։ Խոսելով Սամվել Բաբայանի՝ քաղաքական բանտարկյալ լինել, չլինելու մասին, պաշտպանն ասաց. «Ես ասել եմ, նորից եմ պնդում, ես՝ որպես փաստաբան, այս հարցին նայում եմ զուտ քրեաիրավական հարթության մեջ։ Ես դեռեւս, շեշտում եմ՝ դեռեւս, որեւէ հիմք չունեմ քաղաքական տեսք տալու այս հարցին»։

Մեր հարցին, թե գործով նշանակված փորձաքննության եզրակացության արդյունքներն արդեն հայտնի՞ են, Բաբայանի պաշտպանը դրական պատասխան տվեց՝ նշելով, որ ստացվել է դատաձգաբանական փորձաքննության եզրակացությունը, որի համաձայն՝ հայտնաբերված առարկան հանդիսանում է «Իգլա» տեսակի ռազմամթերք. «Զենք չէ, որովհետեւ դա հայտնաբերված վիճակով չի կարող կիրառվել իր նպատակային նշանակությանը համապատասխան, որովհետեւ անհրաժեշտ մասեր բացակայում են, դա ընդամենը ռազմամթերք է։ Այդ եզրակացությանը որեւէ առարկություն չունենք»։

Մեր մյուս հարցին, թե այս ընթացքում Սամվել Բաբայանի մասնակցությամբ ի՞նչ քննչական գործողություն է կատարվել, Քալաշյանը պատասխանեց. «Այս ընթացքում առերեսում է կատարվել գործով մյուս մեղադրյալ Սանասար Գաբրիելյանի հետ, որը ինչպես իր նախկին ցուցմունքում, այնպես էլ առերեսման ժամանակ հերքել է այն հանգամանքը, որ Սամվել Բաբայանը որեւէ առնչություն ունի այդ «Իգլայի» հետ»։ Մեր դիտարկմանը, որ առերեսում կատարվում է ցուցմունքներում էական հակասությունների առկայության դեպքում, պաշտպանը արձագանքեց, որ հակասությունը խոսակցության վերաբերյալ է, որն, ըստ նրա, այդքան էական չէ։ Թե ինչ խոսակցության մասին է խոսքը, Քալաշյանը փակագծեր չբացեց:

Ավետիս Քալաշյանն ասաց, որ իրենց հայտնի է երրորդ անձի անունը, ում քրեական գործով մեղադրանք է առաջադրվել, սակայն չնշեց նրա անունը։ Մեր ճշտող հարցին, այնուամենայնիվ, այդ երրորդ անձին Սամվել Բաբայանը ճանաչո՞ւմ է, Քալաշյանը պատասխանեց, որ Սամվել Բաբայանը ճանաչում է միայն իր հետ առերեսված Սանասար Գաբրիելյանին, իսկ մյուսներին չի ճանաչում։

Սամվել Բաբայանի ձերբակալությունից հետո Թբիլիսիում նույն գործի շրջանակներում ձերբակալվեց ոմն Ռոբերտ Ա.: Ավելի վաղ, դատախազությունն ի պատասխան մեր հարցին ասել էր, որ ՀՀ գլխավոր դատախազությունը «Իգլայի» աղմկոտ գործով Թբիլիսիում ձերբակալված ՀՀ քաղաքացուն Հայաստանին հանձնելու պահանջ է ներկայացրել վրաց իրավապահներին: Մեր հարցին, թե նրան Հայաստան տեղափոխելու հետ կապված որեւէ տեղեկություններ կա՞ն, Ավետիս Քալաշյանը բացասական պատասխան տվեց՝ ասելով, որ իր տեղեկություններով՝ Վրաստանում ձերբակալված անձը դեռեւս Հայաստան չի տեղափոխվել։ Մի քանի օր առաջ մամուլում հրապարակումներ եղան այն մասին, որ հնարավոր է Սամվել Բաբայանն ազատ արձակվի: «Աստված տա»,- այսպես արձագանքեց մամուլի հրապարակմանը Ավետիս Քալաշյանը: Եթե, այնուամենայնիվ, դատարանը որոշի մերժել պաշտպանական կողմի բողոքը, ապա Ավետիս Քալաշյանն ասաց, որ կբողոքարկի եւ ներպետական ատյանները սպառելուց հետո կդիմի Մարդու իրավունքների եվրոպական դատարան: Պաշտպանական կողմի բողոքը քննել է դատավոր Մխիթար Պապոյանը։

Այսպիսով, Սամվել Բաբայանին, Սանասար Գաբրիելյանին եւ գործով կալանավորված երրորդ անձին մեղադրանք է առաջադրվել ՀՀ Քրեական օրենսգրքի 235 հոդվածի երկրորդ մասի (Ապօրինի կերպով հրազեն, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը, որը կատարվել է մի խումբ անձանց կողմից նախնական համաձայնությամբ՝ պատժվում է ազատազրկմամբ՝ երկուսից վեց տարի ժամկետով) եւ 235.1 հոդվածի երկրորդ մասի առաջին կետի հատկանիշներով (ռազմամթերքի մաքսանենգություն՝ պատժվում է ազատազրկմամբ՝ երեքից յոթ տարի ժամկետով): Մեղադրանքը հաստատվելու դեպքում նրանց սպառնում է առավելագույնը 13 տարվա ազատազրկում: Վաղը Վերաքննիչ դատարանում կքննվի նաեւ Սամվել Բաբայանի հետ առերեսված Սանասար Գաբրիելյանի վերաքննիչ բողոքը: