Ցանկացողները հրավիրվում են բուսաբանական այգին աղբից մաքրելու. ոմանց առաջարկը զայրացրել է

Երեւանի բուսաբանական այգու ֆեյսբուքյան էջում տարածքն աղբից մաքրելու հրավեր կա.

Ս․թ․ ապրիլի 29-ին` ժ․ 12:00-ին, «Աջակցություն բուսաբանական այգուն» բարեգործական հիմնադրամը եւ «Երիտասարդ կենսաբանների ասոցիացիա» ՀԿ-ն, միանալով Make Armenia Clean Again նախաձեռնության կողմից հայտարարված համահայկական շաբաթօրյակին, հրավիրում են բոլոր ցանկացողներին միասին մաքրելու Երեւանի բուսաբանական այգու տարածքում կուտակված աղբը։ Աղբահավաքի մասնակիցների համար մուտքն անվճար է:

Օգտատերերից ոմանք դրական ու պատրաստակամորեն են արձագանքել նշված հրավերին, ոմանց էլ դա զայրացրել է:

Անուշ Պողոսյանն, օրինակ, նկատել է. «Բա բուսաբանականի աշխատակիցները իրենց աշխատավարձից մասհանում կանե՞ն: Բուսաբանական մուտք գործելը անվճար լինելուց հեռու է, տոմսով, կարգ ու կանոնով՝ փոքրերի եւ մեծերի համար սահմանաված դրույքաչափերով: Տեսնես այդ դեպքում մաքրելը ինչու է կամավորականության հիմքով, տոմսերի փողը եւ այլ հատկացումները ուր են գնում: Էլ չեմ ասում, որ բուսաբանական այգուց վաղուց անունն է միայն մնացել, վերածվել է հանրային զուգարանի...  Երկրում տիրող անտերության հերթական էպիզոդն է: Եթե այգին չունենար մուտքի վարձավճար, ես նույնպես սիրով կհամաձայնեի ու կմասնակցեի միջոցառմանը: Բայց երբ մեկ ժամ զբոսնելու կամ հեծանիվ քշելու համար պարտադրված եմ տոմս գնել, այգին մաքրելու հրավերը միայն վրդովմունք է առաջացնում»:

Ավելի վաղ տեղեկացրել ենք, որ «Աջակցություն բուսաբանական այգուն» նորաստեղծ հիմնադրամի միջոցով նախատեսվում է Բուսաբանական այգում արմատական փոփոխություններ իրականացնել: Գիտական հատվածից բացի այստեղ կստեղծվեն հանգստի ու ժամանցի տարբեր գոտիներ: