Ծառուկյանը ջենտլմենական խոսքի տերն է եղել. ձայն չեն բերել` մանդատ չպետք է ստանային

Գագիկ Ծառուկյանի մամուլի խոսնակ Իվետա Տոնոյանը պատասխանել է իշխանական կայքերից մեկի հարցերին եւ մեծապես լույս սփռել երեկ «Ծառուկյան» դաշինքի հետ կատարված սկանդալային իրադարձությունների վրա:

Տոնոյանը բացարձակ սուտ է անվանել ինքնաբացարկի դիմում ներկայացրած թեկնածուների այն հայտարարությունները, թե իրենք չեն գրել այդ դիմումները եւ իրենց հետ նույնիսկ չեն համաձայնեցվել նման դիմումներ ԿԸՀ տանելը:

Ըստ Տոնոյանի, իրավապահներն անգամ կարող են սուտ մատնության մեղեդրանք ներկայացնել այդ անձանց, եւ մեկ ձեռագրաբանական ուսումնասիրությունն էլ բավարար կլինի դա ապացուցելու համար: «Նրանք բոլորն են գրել ու ստորագրել այդ դիմումները, և այդ գործընթացը այնպես չէ, որ տեղի է ունեցել գաղտագողի կամ ծածուկ, մարդիկ են ներկա եղել և, կարծում եմ, պրիմիտիվ սուտ է կամ սեփական գործողություններն արդարացնելու ինչ-որ փորձ, ոչ ավելին»,-ասել է Տոնոյանը: 

Իսկ այդ գործողությունները, ըստ Տոնոյանի, «քաղաքական պայմանավորվածությունների խախտում են»: 

Խոսքը այն աղմուկի մասին է, որ դաշինի 12 թեկնածուներ բարձրացրին ինքնաբացարկի դիմումների հետ կապված եւ ԿԸՀ-ին նոր դիմումներ ներկայացրին, որով հայտնում էին, որ որ ցանկանում են մանդատը ստանալ: 

Հարցին, թե ինչպես է լինելու խորհրդարանում մանդատ ստացած 8 հոգու հետո համագործակցությունը, Տոնոյանը պատասխանել է. «Դրա մասին պետք է մտահոգվեն այն մարդիկ, ովքեր, ոտնահարելով թե´ քաղաքական պայմանավորվածությունները, թե´ մարդկային բոլոր հարաբերությունները՝ նման որոշում են կայացրել եւ նման քայլի են գնացել»: 

Իսկ հարցին, թե ինչպիսին է Ծառուկյանի գնահատականը այս աղմուկի վերաբերյալ, խոսնակը պատասխանել է. «Բայց պարոն Ծառուկյանի ու բոլոր թեկնածուների միջեւ եղել է քաղաքական պայմանավորվածություն, որը ձեռք է բերվել նախընտրական շրջանում, կոնկրետ, թե թեկնածուներից յուրաքանչյուրը դաշինքի համար ընտրողների ինչ քանակի վստահության քվե է ակնկալում ու պատրաստ է ձեռք բերել այդ վստահության քվեն, և ընտրությունների արդյունքները վկայեցին այն մասին, որ թեկնածուների կողմից բարձրաձայնված քանակի անգամ կեսն էլ նրանք չեն կարողացել ապահովել, այնպես որ՝ այս բոլոր իրադարձությունները այդ պայմանավորվածության խախտման հետևանք ու արդյունք են»։ 

Տոնոյանի պատասխաններից բխում է, որ ընտրություններից առաջ Գագիկ Ծառուկյանը թեկնածուներից յուրաքանչյուրի հետ պայմանավորվածություն է ձեռք բերել, որի հիմքում դրվել են նրանց հավաքած ձայները: Այսինքն, յուրաքանչյուրի համար ձայներ բերելու որոշակի շեմ է սահմանվել: 

Նապոլեոն Ազիզյանն այսօր հայտարարեց, որ Գագիկ Ծառուկյանն ինքն է իրեն ֆինանսական միջոցներ տվել եւ ասել՝ գնա, մասնակցիր ընտրություններին: 

Ստացվում է՝ Ծառուկյանը ֆինանսավորել է սույն թեկնածուներին, նրանք ստանձնել են X թվով ձայներ ստանալու պարտավորություն: Եվ այս մարդիկ մանդատ պետք է ստանային այս երկու գործոնների հաջող համադրության արդյունքում: 

Բայց, ինչպես Տոնոյանն է արձանագրում, «ընտրությունների արդյունքները վկայեցին, որ թեկնածուների կողմից բարձրաձայնված քանակի անգամ կեսն էլ նրանք չեն կարողացել ապահովել»: Այսինքն, Ծառուկյանը կատարել է իր ստանձնած պարտավորությունը՝ ընդգրկել է նրանց ցուցակում, ֆինանսավորել է, իսկ նրանք տապալել են իրենց ստանձնած պարտավորությունը եւ քիչ ձայն են ստացել:

Հայտնի չէ, թե ով որքան քվե է «ստանձնել», սակայն ընտրությունների պաշտոնական արդյունքներով Արարատ Զուրաբյանն, օրինակ, ստացել է  1870 քվե, Սերգեյ Բագրատյանը՝  4033, Նապոլեոն Ազիզյանը՝ 4348,  Խաչիկ Մանուկյանը՝ 5675: 

Եթե մի կողմ թողնենք ինքնաբացարկի դիմումները նախապես գրելու կամ դատարկ թղթերի տակ ստորագրելու արատավոր պրակտիկան, այս պայմանավորվածությունը միանգամայն տրամաբանական է եւ քաղաքական:

Մի փոքր ավելի բարձր քաղաքական կուլտուրայի դեպքում նույնիսկ նախապես թղթեր ստորագրելու կարիք չէր լինի, բավարար էր միայն խոսքը՝ այսինքն քաղաքական համաձայնությունը: Հայաստանում, իհարկե, ամեն ինչ այլ է, եւ ինչպես ցույց տվեցին իրադարձությունները, ոչ միայն խոսքը, այլեւ ստորագրությունը երաշխիք չէ. կարելի է հեշտությամբ հրաժարվել դրանից:

Տոնոյանի գաղտնազերծած տեղեկատվությունը էլ ավելի է ամրապնդում այն վարկածը, որ Ծառուկյանի դեմ դուրս եկած անձինք կազմակերպված են գործել եւ ուղղորդվել են: 

Հակառակ դեպքում՝  ի՞նչը կարող էր նրանց ստիպել դրժել քաղաքական եւ ջենտլմենական պայմանավորվածությունները: Միայն մանդատ ստանալու ցանկությունը, որքան էլ այն անսահման լինի, չէր կարող  հանգեցնել նման որոշման: Կամ կարող էր, բայց մեկ-երկու հոգու դեպքում, ոչ՝ 12-ի: Ի վերջո, այդ մարդիկ շարունակելու են ապրել եւ գործել Հայաստանում, Գագիկ Ծառուկյանի հետ առնչվել: 

Ինչ վերաբերում է ինքնաբացարկի դիմումներին, այս մասով այնքան էլ հստակ չէ՝  թեկնածուները դատա՞րկ թղթի տակ են ստորագրել, թե՞ նախապես իրենց ձեռքով նաեւ այդ դիմումներն են լրացրել: Երեկ «Կենտրոն» նոտարական գրասենյակի նոտար Աննա Աբրահամյանի խոսքից կարելի էր եզրակացնել որ ինքը հաստատել է միայն այդ մարդանց ստորագրությունները դատարկ թղթերի տակ, իսկ Իվետա Տոնոյանն այսօր պնդում է, որ նրանք իրենց ձեռքով լրացրել են նաեւ դիմումի տեքստը: 

Ծառուկյան դաշինքում  անորոշություն է, թե ի՞նչ ընթացք կստանա այս գործը: Քաղաքագետները երեկվանից նշում են, որ հայտարարությունները, թե դաշինքը տարբեր թեկնածուների անունից  ինքնաբացարկի դիմումներ է ներկայցրել ԿԸՀ, իրավական գործընթաց հարուցելու հիմք են:

 Հարցին, թե կստացվի՞ համաձայնության գալ, թե՞ հարցը կտեղափոխվի իրավական դաշտ, Իվետա Տոնոյանը պատասխանել է. «Ես չեմ կարող գնահատական տալ, որովհետև չգիտեմ, թե գործընթացը ինչ հունով է գնալու»: 

Ծառուկյանը փաստորեն չի բացառում, որ գործը կարող է նաեւ իրավական ընթացք ստանալ: Դա իհարկե քաղաքական որոշման հարց է, սակայն ինքը Ծառուկյանը, ըստ ամենայնի, այդ որոշման վրա ազդելու մեծ հնարավորություններ չունի: Վստահ ենք, որ նման դեպքերի համար նույնպես նա քաղաքական եւ ջենտլմենական պայմանավորվածություններ ունի: Տպավորություն է, սակայն, որ դրանք նույնպես այլեւս ուժի մեջ չեն:

Տպել
6102 դիտում

Մահացել է Սարդ-մարդու, Երկաթե մարդու, Հալքի, Ֆանտաստիկ քառյակի, Իքս մարդկանց «հայրը»

Նիկոլ Փաշինյան, Լենա Նազարյան, Արարատ Միրզոյան. հայտնի է «Իմ քայլը» դաշինքի առաջին տասնյակը

ԿԸՀ-ի որոշմամբ, ավագանու անդամ Արամ Մանուկյանի լիազորությունները դադարեցված են, նրան կփոխարինի Միքայել Թումանյանը

Դաշնակցության անունից առաջադրվելու եմ պատգամավորի թեկնածու, պատվի հարց է. Գեղամ Մանուկյան

Պաշտպանն ուշադրության կենտրոնում է պահում խաղաղ հավաքների ժամանակ մարդկանց իրավունքների երաշխավորման հարցը

Կոռուպցիայի դեմ պայքարն ու բարեփոխումներն առաջնահերթություն են. Փաշինյանը՝ ԵՄ դեսպաններին

Դիլիջանի ոլորաններում, Սյունիքի մարզի Գորիս և Քաջարան քաղաքներում մառախուղ է

Արագ հավաքովի, սենդվիչային տարբերակով թաղամաս. Ա. Մեսչյանն առաջարկում է համալրել բնակֆոնդը

«Ղեկը աջ» նախաձեռնությունը վաղը Կառավարության մոտ մեծ բողոքի ակցիա կիրականացնի

Կան պաշտոնյաներ, որոնք ստանում են 1 մլն դրամից ավելի թոշակ. Թանդիլյանն առաջարկում է չափ սահմանել

20-ամյա կնոջը դաժան ծեծի ենթարկած 30-ամյա տղամարդը նախկինում երեք անգամ դատապարտված է եղել

Արցախի ԱԳՆ ղեկավարն ընդունել է ԵԱՀԿ գործող նախագահի անձնական ներկայացուցչին

ՊԲ հրամանատարն ու Անջեյ Կասպրշիկը քննարկել են շփման գոտում տիրող իրավիճակը

Մինչեւ վերասարքավորում կատարելը իրենք չեն կարող այդ մեքենան շահագործել. Արմեն Փամբուխչյան

1988 թ. երկրաշարժի զոհերի հարգանքի տուրքի բոլոր միջոցառումները կկազմակերպվեն բարձր մակարդակով. Ցոլակյան

Ոստիկանին փորձում են անհիմն ազատել աշխատանքից. նա դիմում է ՀՀ ոստիկանապետին

Վերաքննիչը բեկանեց Շահեն Հարությունյանին տուգանելու մասին Վարչական դատարանի որոշումը

Իմ երեխան, իմանալով, որ մեքենան անսարք է, ասել է՝ ես չեմ վարի. զինծառայողի ծնողները մանրամասներ են պատմում

Ախալցխայում հայկական դպրոցի աղջիկներին մի քանի օր հետևել է Պակիստանի քաղաքացի. նրան ձերբակալել են

Քառօրյա պատերազմի ժամանակ մարտական հերթապահություն իրականացրած ՀՊՏՀ ուսանողների բաց նամակը վարչապետին, ԿԳ նախարարին