Արա Բաբլոյանի կրճատած 16 խորհրդականն ու օգնականը անգործ չեն մնա

Ազգային Ժողովի նախագահ Արա Բաբլոյանի խորհրդականների եւ օգնականների թիվը 22-ից կրճատվել է եւ դարձել է ոչ թե 6, այլ՝ 11: Այս մասի armtimes.com-ի գրավոր հարցմանն ի պատասխան հայտնեց ԱԺ աշխատակազմի հանրային կապերի վարչության պետ Արսեն Բաբայանը:

Այդ 11 օգնականների եւ խորհրդականների հաստիքներից 6-ը հասարակական հիմունքով խորհրդականի համար է, 1-ը՝ գլխավոր խորհրդականի, 1-ը՝ պարզապես խորհրդականի եւ 3-ը՝ օգնականի: Ազգային Ժողովի պաշտոնական կայքում դեռ հասանելի չի, թե ովքեր են կոնկրետ զբաղեցնում խորհրդականների եւ օգնականների պաշտոնները: Այսինքն՝ անուն առ անուն դեռեւս դա ստուգել հնարավոր չէ:

Հիշեցնենք, որ մայիսի 26-ին տեղի ունեցած ՀՀ Ազգային ժողովի խորհրդի անդրանիկ նիստում Արա Բաբլոյանն ասել էր, որ հաշվի առնելով խորհրդարանական մի քանի հանձնաժողովների միացման արդյունքում դրանց ծանրաբեռնվածությունը եւ վերահսկողական գործառույթները՝ առաջարկվում է ավելացնել հանձնաժողովների փորձագետների թիվը: ԱԺ նախագահը հորդորել էր գործընկերներին այս հարցում առաջնորդվել բացառապես պետության ունեցած հնարավորությունների սահմաններում: «Ես ուզում եմ մենք չանձնավորենք խնդիրը: Ամենամեծ բեռն այսօր իմն է, երբ ես իմ աշխատակազմում 22 խորհրդականներին ու օգնականներին կրճատել եմ՝ թողնելով 6 հոգու: Շատ բարդ գործ է: Եթե ես ոտքս պետք է մեկնեմ իմ երկրի հնարավորությունների չափով, ապա պետք է ինքս օրինակ ծառայեմ, եւ նույնը պետք է խնդրեմ իմ գործընկերներից»,- ասել էր Արա Բաբլոյանը՝ նշելով նաեւ, որ ԱԺ-ի մշտական հանձնաժողովների հաստիքները պետք է ավելացվեն:

ԱԺ նախագահի այս նախաձեռնությունը փորձ արվեց որպես գեղեցիկ PR ակցիա մատուցել հանրությանը: Մամուլում եղան նաեւ հրապարակումներ, որտեղ համեմատական տարվեց ԱԺ նախկին նախագահ, այժմ Հանրապետական խմբակցության պատգամավոր Գալուստ Սահակյանի հետ՝ ընդգծելով, որ Սահակյանն էր ուռճացրել ԱԺ նախագահի խորհրդականների եւ օգնականների թիվը:

ԱԺ-ի հանրային կապերի վարչության պետին հարցրել էինք նաեւ, թե փորձագետի քանի՞ հաստիք է ավելացել ԱԺ-ի հանձնաժողվներում: «ՀՀ ԱԺ խորհրդի 26.05.2017 նիստում եւ որոշմամբ ՀՀ ԱԺ առողջապահության եւ սոցիալական հարցերի մշտական հանձնաժողովում, պետական-իրավական եւ մարդու իրավունքների պաշտպանության հարցերի մշտական հանձնաժողովում եւ տնտեսական հարցերի մշտական հանձնաժողովում ավելացել է փորձագետի երկուական հաստիք, մնացյալ 5 հանձնաժողովներում՝ փորձագետի մեկական հաստիք: ՀՀ ԱԺ եվրոպական ինտեգրման հարցերի մշտական հանձնաժողովի փորձագետի ավելացման հարցին Խորհրդի անդամներն առաջարկել են անդրադառնալ առաջիկայում»,- փոխանցեց Արսեն Բաբայանը: Ամբողջացնելով փորձագետների ստեղծվելիք հաստիքների թիվը՝ ստանում ենք 11 հաստիք առանց եվրոպական ինտեգրման հարցերի մշտական հանձնաժողովի փորձագետի հնարավոր հաստիքի: Այդ 11-ին էլ գումարում ենք ԱԺ նախագահի խորհրդականների եւ օգնականների հաստիքները եւ ստանում ենք 22, այն թիվը, որը կար Գալուստ Սահակյանի նախագահության ժամանակ, պարզապես այժմ այդ խոհրդականները «օրենքով սահմնանված կարգով» եւ մրցույթի արդյունքում կձեւակերպվեն փորձագետ եւ վերջ:

Բարձրաստիճան պաշտոնատար անձանց էթիկայի հանձնաժողովի կայքից պարզում ենք, որ ԱԺ նախագահի գլխավոր խորհրդականը Վրեժ Գասպարյանն է, որը 2011 թվականին եղղել է ԱԺ աշխատակազմի ղեկավարը, որից հետո մինչ օրս խորհրդարանի խոսնակների գլխավոր խորհրդականն է եղել: Արա Բաբլոյանը խորհրդականներից մեկն այժմ Հանրապետական խմբակցության նախկին պատգամավոր, Նոր Նորք վարչական շրջանի նախկին թաղապետ Մկրտիչ Մինասյանն է, որը տարեց լինելու հանգամանքով պայմանավորված՝ պատգամավորական մանդատի համար չմտավ ընտրապայքարի մեջ: Խորհրդականներից մյուսը Անուշ Սուքիասյանն է, որի նույնիսկ կենսագրությունը հանրությանը դեռ հայտնի չէ: Նշված երեք անձինք վճարովի խորհրդականներն են: Գալուստ Սահակյանի խորհրդականներից Վրույր Փենեսյանը, որքանով մեզ է հայտնի, այժմ ԱԺ նախագահի խորհրդական է հասարակական հիմունքներով, նա բոլոր դեպքերում պահպանել է իր ստատուսը: