Դոն Պիպոյի սպանության նախապատրաստման գործով մեղադրյալը մտահոգված է իր անվտանգության համար

Քրեական հեղինակություն Դոն Պիպոյի (Արթուր Ասատրյանի) սպանությունը նախապատրաստելու մեղադրանքով կալանավորված Արկադի Քոչինյանը մտահոգված է իր անվտանգության համար: Հենց այդ պատճառով էլ նա կալանավորվելուց հետո հացադուլ է հայտարարել եւ պահանջել իրեն կարանտինից հետո տեղափոխել մենախուց:

Այս մասին մեր զրույցում ասաց նրա պաշտպան Արմինե Ֆանյանը. «Ես պահանջել եմ, որպեսզի նա դադարեցնի հացադուլը, քանի որ այդպես հարց չի լուծվում:  Հացադուլը տեւել է մի քանի օր: Հիմա մենախցում է, բայց չգիտենք, թե դա որքան կտեւի»,- ասաց Ֆանյանը՝ հավելելով, որ Արկադի Քոչինյանը չի ցանկանում պահվել այլ անձանց հետ՝ նույն խցում՝ քանի որ կարծում է, որ  կարող են ճնշումներ գործադրել իր վրա:  Պաշտպանը նշեց, որ դիմել էր ՔԿՀ,  որպեսզի ապահովեն իր պաշտպանյալի անվտանգությունը, քանի որ բավարար հիմքեր կան ենթադրելու, որ իր պաշտպանյալին ՔԿՀ-ում վտանգ է սպառնում:

Ֆանյանն ասաց, որ Արկադի Քոչինյանը կալանքը երկարաձգելու միջնորդություն նախաքննական մարմնի կողմից դեռ չի ներկայացվել: Քրեական գործի հետ կապված այլ հարցերին, Ֆանյանը չպատասխանեց՝ ասաց, որ վարույթն իրականացնող մարմնի կողմից զգուշացվել են նախաքննության գաղտնիքը չհրապարակելու մասին: Նշենք, որ Վերաքննիչ դատարանը մերժել է ազատ արձակել Արկադի Քոչինյանին:

Խմբին օժանդակելու մեջ մեղադրվող Զոհրաբ Ղումաշյանի կալանավորելու դատարանի որոշման դեմ ներկայացված բողոքը նույնպես մերժվել է:

Այս մասին մեր զրույցում ասաց նրա պաշտպան Սյուզաննա Խչեյանը: Այժմ պաշտպանը պատրաստվում է սույն որոշումը բողոքարկել Վճռաբեկ դատարան:

Հիշեցնենք, որ Զոհրաբ Ղումաշյանի նկատմամբ, ըստ պաշտոնական տեղեկատվության, հետախուզում է հայտարարվել մայիսի 27-ին, եւ դատարանը նրա նկատմամբ որպես խափանման միջոց է ընտրել կալանավորումը: Մայիսի 31-ին, երբ Ղումաշյանը հայտնաբերվել է, դատարանը նորից, արդեն նրա մասնակցությամբ, քննարկել է կալանքի վերաբերյալ միջնորդությունն ու բավարարել այն:

Հարցին, թե նրա մասնակցությամբ մինչ այս պահը ի՞նչ քննչական գործողություններ են կատարվել, Խչեյանը պատասխանեց, որ Խչեյանի խոսքով՝ իր պաշտպանյալն իրեն առաջադրված մեղադրանքը չի ընդունել, հրաժարվել է ցուցմունք տալ եւ քրեական գործով մասնակցել որեւէ քննչական գործողության: Ըստ Խչեյանի՝ նախաքննություն իրականացնող մարմինը նշում է, թե օպերատիվ տեղեկություն է ստացվել Ղումաշյանի` իրեն մեղսագրվող արարքին մասնակցություն ունենալու կապակցությամբ, թե որքան եմ դրանք օրինական ճանապարհով ձեռք բերվել, պաշտպանը չգիտի:

Պաշտպանն ուշադրություն հրավիրեց նաեւ այն հանգամանքի վրա, որ Զոհրաբ Ղումաշյանի նկատմամբ հետախուզում է հայտարարվել մայիսի 27-ին, մինչդեռ, մայիսի 24-ին կատարված բնակարանի խուզարկության արձանագրության մեջ գրված է, որ հետախուզվող Զոհրաբ Ղումաշյանը չի հայտնաբերվել: Բնակարանի խուզարկություն թույլատրելու՝ Կենտրոն եւ Նորք-Մարաշ վարչական շրջանների ընդհանուր իրավասության դատարանի որոշումը պաշտպանը եւս բողոքարկել է: Նշենք, որ այս բնակարանի խուզարկությամբ հայտնաբերվել է զենք-զինամթերք:

Բացի դա պաշտպանը նշում է, որ իր պաշտպանյալը գործով անցնող երեք անձանց հետո որեւէ առնչություն չունի:

Նշենք, որ սույն գործի վարույթը Քննչական կոմիտեից փոխանցվել է ՀՀ Ազգային անվտանգության ծառայությանը, մեր տեղեկություններով, որպես պատճառաբանություն նշվել է, թե ԱԱԾ-ն սույն գործով օբյեկտիվ քննություն կիրականացնի:

Հիշեցնենք, որ մայիսի 8-ին Դոն Պիպոն կասկածել էր իր դեմ նախապատրաստվող սպանության մասին եւ այդ մասին տեղյակ պահել իրավապահ մարմիններին։ Նույն օրը սպանությունը նախապատրաստելու կասկածանքով ձերբակալվել, ապա կալանավորվել է երեք անձ։ Ինչպես ավելի վաղ տեղեկացրել ենք, կալանավորված երեք անձանցից երկուսը շինարար են, մեկը՝ խոհարար: Սույն գործի շրջանակներում Դոն Պիպոն տուժող է ճանաչվել: