Փոխմարզպետի որդու սպանության գործով միջադեպ է տեղի ունեցել. ամբաստանյալին հազիվ են փախցրել

Գեղարքունիքի փոխմարզպետ Անդրանիկ Հակոբյանի որդու՝ 29-ամյա Հայկ Հակոբյանի (Նորատուսցի Հայկո մականվամբ) աղմկոտ սպանության գործով առաջին դատական նիստն անցել է լարված մթնոլորտում. միջադեպ է տեղի ունեցել:

Այս մասին մեր զրույցում ասաց գործով ամբաստանյալ, 19-ամյա Մեխակ Հարությունյանի պաշտպան Ռուստամ Խաչատրյանը: Սույն գործը քննվում է Գեղարքունիքի մարզի ընդհանուր իրավասության դատարանում՝ դատավոր Մնացական Հարությունյանի նախագահությամբ:

Գեղարքունիքի փոխմարզպետի որդին՝ Հայկ Հակոբյանը, սպանվել է սույն թվականի հունվարի 7-ին, ցերեկը՝ ժամը 12:30-ի սահմաններում. «Տոյոտա լենդ քրաուզեր պրադո» ավտոմեքենայից կրակոցներ էին արձակվել «Աուդի-Q7» մակնիշի ավտոմեքենայի ղեկին գտնվող Հայկ Հակոբյանի գլխի եւ պարանոցի ուղղությամբ, ինչի հետեւանքով ստացած վնասվածքներից վերջինս հիվանդանոցի ճանապարհին մահացել էր. Հակոբյանի վրա 7 կրակոց էր արձակվել: 

Հարությունյանի պաշտպանը մեր զրույցում նշեց, որ առաջին նիստի օրվա վերաբերյալ ծանուցման մեջ նշվել է, որ նիստը կանցկացվի դռնփակ, սակայն փաստաբանը զարմացել է, երբ նիստերի դահլիճ են մտել տուժող կողմի հարազատները՝ 50-60 հոգի: Դատարանը փաստաբանին պարզաբանել է, որ սխալմունք է տեղի ունեցել եւ դռնփակ բառը սխալ է  գրվել: Այնինչ, Մեխակ Հարությունյանի պաշտպանը պահանջում է այդ տարածաշրջանում նիստերը դռնփակ անցկացնել: Նրա պնդմամբ՝ իր պաշտպանյալի կյանքին վտանգ է սպառնում: Նշենք, որ «Արմավիր» ՔԿՀ-ում փորձել էին սպանել Մեխակ Հարությունյանին. այդ դեպքից հետո Հարությունյանը առ այսօր գտնվում է պաշտպանության տակ:

Ռուստամ Խաչատրյանի պատմելով, երբ սեպտեմբերի 8-ին Մեխակ Հարությունյանը բերվել է նիստերի դահլիճ, տուժող կողմի հարազատները սեռական բնույթի հայհոյանքներ են հնչեցրել նրա հասցեին, փորձել հարձակվել նրա վրա: «Կարգադրիչները մի կերպ են Մեխակ Հարությունյանին նիստերի դահլիճից փախցրել»,- ասաց Ռուսամ Խաչատրյանը: Նրա խոսքով՝ դահլիճում ներկա գտնվողները սեռական բնույթի հայհոյանքներ են հնչեցրել նաեւ դատավորի ներկայությամբ: «Դատավորը մի պահ ոտքի կանգնեց եւ ասաց, որ մյուս անգամ հայհոյողները չմտնեն նիստերի դահլիճ, դա շատ զարմանալի եւ ծիծաղելի էր»,- նշեց պաշտպանը:

Վերջինիս խոսքով՝ դատարանում տեղի ունեցած միջադեպը եւս մեկ անգամ փաստում է, որ այդ տարածաշրջանում այս գործով նիստը պետք է դռնփակ անցկացվի: Պաշտպանը նաեւ դատարանին միջնորդել է նիստերն արտագնա անցկացնել: Սակայն, թե՛ այս, եւ թե՛ արտագնա նիստեր անցկացնելու վերաբերյալ միջնորդությունները դատարանը կքննի սույն գործով հաջորդ դատական նիստին: Այս գործով հաջորդ դատական նիստը նշանակվել է սեպտեմբերի 25-ին ժամը 11:00-ին:

Ինչ վերաբերում է «Արամվիր» ՔԿՀ-ում Մեխակ Հարությունյանի դեմ մահափորձին, ապա Ռուստամ Խաչատրյանն ասաց, որ այդ գործով նախաքննությունն ավարտվել է, եւ գործը շուտով կուղարկվի դատարան:

Հիշեցնենք, որ Մեխակ Հարությունյանի դեմ մահափորձն իրականացվել է այս թվականի մարտի 25-ին: «Արմավիր» ՔԿՀ-ի դատապարտյալներից մեկը փորձել է ածելիով վիզը կտրելու միջոցով սպանել նրան: Ըստ պաշտոնական հաղորդագրության՝ զբոսանքի՝ օրենքով սահմանված ժամանակը լրանալուց հետո, վերադառնալիս դատապարտյալը մուտք է գործել ՔԿՀ անվտանգության ապահովման բաժնի աշխատակցի աշխատասենյակ, բռնություն գործադրել նրա նկատմամբ, հափշտակել բանալիներն ու շտապել դեպի այն խուցը, որտեղ պահվում է կալանավոր Մեխակ Հարությունյանը: Ապա՝ բացել է խցի դուռը եւ հարձակվել այնտեղ միայնակ գտնվող կալանավորի վրա, բռնություն գործադրել նրա նկատմամբ, կտրող-ծակող առարկայով հարվածել նրա մարմնի տարբեր մասերին։ Դատապարտյալը հասցրել է ածելիով վնասել Մեխակ Հարությունյանի կոկորդը. նա նաեւ վնասվածքներ էր ստացել դեմքի շրջանում:

Մեխակ Հարությունյանի նկատմամբ կատարված սպանության փորձի գործով մեղադրանք է առաջադրվել 3 անձի՝ Հարություն Բուշտունցին՝ ՀՀ քրեական օրենսգրքի 34-104-րդ (սպանության փորձ) եւ 316-րդ հոդվածների 1-ին մասերով (իշխանության ներկայացուցչի նկատմամբ բռնություն գործադրելը), իսկ Էդուարդ Եգանյանին եւ Ռազմիկ Սաֆարյանին՝ ՀՀ քրեական օրենսգրքի 38-34-104-րդ եւ 316-րդ հոդվածների 1-ին մասերով:

Հարություն Բուշտունցը ՔԿՀ աշխատակցի ձեռքից խլելով բանալիները, շտապել էր կալանավորի խուց, իսկ մյուս երկու կալանավորները փորձել էին մեկուսացնել ՔԿՀ աշխատակցին, սակայն վերջինիս հաջողվել էր նրանց վնասազերծել եւ շտապել Բուշտունցի հետեւից՝ կանխելով կալանավորի սպանությունը։

Շրջանառվող որոշ տեղեկությունների համաձայն՝ Մեխակ Հարությունյանի սպանության պատվերը տվել է քրեական հեղինակություն Նորատուսցի Ալիկը: Նշենք, որ սպանված Հայկ Հակոբյանը Նորատուսցի Ալիկի մորեղբոր որդին է: Մեխակ Հարությունյանի նկատմամբ սպանության պատվերը տալու փաստով նոր քրեական գործ է հարուցվել, եւ նախաքննությունը շարունակվում է: