Աթոռը վերցրի ու խփեցի.Չարբախցի Գեղամի որդին աղմկոտ սպանության դեպքից մանրամասներ է պատմում

Շենգավիթ վարչական շրջանի ընդհանուր իրավասության դատարանում դատավոր Նելլի Բաղդասարյանի նախագահությամբ այսօր  հարցաքննվեցին գործով ամբաստանյալ քրեական հեղինակություն Չարբախցի Գեղամ մականունով Պետրոս Իսրայելյանի հարազատները:

Նախ դատարանում ցուցմունք տվեց նրա քրոջ որդին՝ Իսահակ Իսրայելյանը: Նա ասաց, որ դեպքի հետ կապված՝ այն, ինչ իրեն հայտնի է, իր ցուցմունքներում նշել է, ավելացնելու ոչինչ չունի: Դատավորը, սակայն, նրան նախազգուշացրեց, որ վկան պարտավոր է ցուցմունք տալ եւ իրավունք չունի հրաժարվել: Իր ցուցմունքում վկան ասաց, որ դեպքի օրը ավտոլվացման կետում լվացել է Գոռ Իսրայելյանի Մերսեդես մակնիշի ավտոմեքենան: Վերջինս այդ ավտոլվացման կետում որպես հսկիչ է աշխատում: Նրա խոսքով, մեքենայում՝ վարորդի կողքի նստարանի մոտ «տոմատանման» հյութի կամ արյան հետք է եղել, որը մաքրել է: «էդ ավտոն միշտ մաքրել եմ, միշտ մարքում եմ»,- ասաց նա,- «ու պիտի մաքրեք»,- լրացրեց դատավորը, ինչից հետո դահլիճում ներկա գտնվողները սկսեցին ծիծաղել: Վկան ի պատասխան ասաց. «Մաքրությունը լավ բան ա»: Նրա այս պատասխանը զայրացրեց նախագահող դատավորին. «Միայն խնդրում եմ մի մոռացեք, որ դատարանում եք գտնվում, այն էլ իմ նիստին. նախագահող դատավոր Բաղդասարյան»,- ասաց դատավորը:

Այսօր դատարանում ցուցմունք տալու ցանկություն հայտնեց նաեւ Չարբախցի Գեղամի որդին՝ Գոռը, որը նախորդ նիստին հրաժարվել էր ցուցմունք տալուց՝ օգտվելով իր սահմանադրական իրավունքից:

Պետրոս Իսրայելյանի պաշտպան Միհրան Պողոսյանն այսօր դատարանին հայտնեց, որ Գոռ Իսրայելյանը հետագայում հասկացել է, որ իր ցուցմունքերը կարող են էական նշաակություն ունենալ գործի համար, ուստի ցանկանում է ցուցմունք տալ եւ խնդրում է հարցաքննել իրեն: Դատարանը բավարարեց դիմումը եւ որոշեց հարցաքննել Գոռ Իսրայելյանին: Վկան պատմեց, որ դեպքի օրը գտնվել է տանը: Պատշգամբից նկատել է իրենց գեղեցկության սրահի մոտ կայանված անծանոթ մեքենաները, կարծել՝ ինչ-որ խառնաշփոթ է եւ իջել բակ: Նա հայտնեց, որ գեղեցկության սրահին կից նկուղ իջնելիս ճակատով հարվածել է առաստաղին, հետո գնացել սանհանգույց, որ տեսնի ինչ է եղել: «Սանհանգույցից դուրս եկա՝ տեսա մի 7-8 հոգի անծանոթ մարդկանց, ովքեր մտան ներս: Մինչեւ ներս մտնելը իմ ծանոթներից տեսել եմ Արտակին եւ Արսենին: Ներսում տեսա Գեւորգին, հարցրի՝ ի՞նչ է կատարվում, ասաց՝ մարդ ա գալու: Հետո 7-8 հոգի անծանոթ մարդիկ եկան, անծանոթներից մեկը գոռգոռում էր, Գեւորգն էլ փորձում էր կարգի հրավիրել նրան, որից հետո հայհոյել սկսեց Գեւորգին, Գեւորգն էլ՝ նրան»,-պատմեց վկան եւ նկարագրեց, թե ինչպես է անծանոթը ատրճանակը հանում եւ կրակում Գեւորգին: Նա նշեց, որ հետո է իմացել, որ այդ անծանոթի անունը Մուշեղ է, նա գրասենյակ էր եկել ինչ-որ գումարային խնդրի պատճառով. «Հետո եմ իմացել, որ Մուշեղն ասել է, որ ինչ-որ մեկն իրան 20 հազար ա պարտք, ասել էր՝ դա իմ ինքնասիրության հարցն է, էդ փողը ստանալու եմ, ով դեմս հելավ՝ կխփեմ»,-պատմեց վկան եւ  հավելեց, որ չգիտի, թե ով է այն անձը, որին պետք է Մուշեղը փող տար: Գոռ Իսրահելյանը պատմեց, որ երբ անծանոթ տղան կրակոցներ է արձակել, մյուսները դուրս են վազել: «Կրակում էր բոլորի վրա, ես թաքնվել էի բազմոցի հետեւը, հետո լսեցի՝ «Պատրոնները վերջացան, Գեւորին փրկեք» արտահայտությունը: Վազեցի, որ Գեւորգին ազատեմ, Մուշեղը գրկել էր, չէր թողնում, աթոռը վերցրի ու խփեցի, մի կերպ կարողացա պոկել Գեւորին նրա ձեռքերից ու իմ մեքենայով հասցնել հիվանդանոց»,-ասաց նա: Գոռ Իսրայելյանը նշեց, որ հիվանդանոցում վախեցած է եղել եւ Գեւորգին այնտեղ տանելուց հետո փախուստի է դիմել, որից հետո նախաքննական մարմին է հանձնել իրենց պատկանող գեղեցկության սրահի դռան մոտից գտած երկու դանակները, ինչպես նաեւ իրավապահներին է հանձնել նաեւ դեպքից հետո բակից գտած ատրճանակը: Գոռ Իսրայելյանի խոսքով՝ դեպքի օրը գրասենյակում հորը՝ Պետրոս Իսրայելյանին տեսել է այն ժամանակ, երբ կրակոցները վերջացել են. «Շատ խառն էի, միայն Գեւորգին փնտրելու մասին էի մտածում, դրա համար միայն հիշում եմ, որ հորս մի պահ եմ նկատել»,-ասաց նա:

Հիշեցնենք, որ այս գործով մեղադրյալներն են քրեական հեղինակություններ Պետրոս Իսրայելյանը (Չարբախցի Գեղամ մականունով), Նորատուսցի Ալիկը (Ալիկ Բանդուրյան) եւ Արմեն Գասպարյանը:

Շենգավիթ վարչական շրջանում գործող «Լիա» գեղեցկության սրահի նկուղային հարկում կրակոցներ են հնչել, որի հետեւանքով 25-ամյա Գեւորգ Ավետիսյանը տեղում մահացել է, իսկ հրազենային վիրավորում ստացած 38-ամյա Մուշեղ Մուշեղյանը եւ 35-ամյա Արամ Պետրոսյանը տեղափոխվել են «Սուրբ Աստվածամայր» բժշկական կենտրոն: Ավելի ուշ, ստացած վնասվածքներից մահացել է նաեւ Մուշեղ Մուշեղյանը:

Ըստ մեղադրական եզրակացության՝ Չարբախցի Գեղամին մեղադրանք է առաջադրվել այն բանի համար, որ Մուշեղ Մուշեղյանին մորթելու, սատկացնելու, մահակներով ոտքերը ջարդելու եւ այլ ձևերով վերջինիս առողջությանը մի խումբ անձանց հետ ծանր վնաս պատճառելն իրագործելու վերաբերյալ Ալիկ Բանդուրյանի հորդորների հետեւանքով նրա մոտ Մուշեղ Մուշեղյանի առողջությանը ծանր վնաս պատճառելու վճռականություն է առաջացել: Դրանից հետո նախնական համաձայնության գալով Գեւորգ Ավետիսյանի և քննությամբ չպարզված անձանց հետ` խմբի կազմում, Ալիկ Բանդուրյանի օժանդակությամբ նա իրագործել է Մուշեղ Մուշեղյանի նկատմամբ պլանավորված հանցավոր ոտնձգությունը: Հանդիպելով Մուշեղ Մուշեղյանի զինված դիմադրությանը` վերջինիս կողմից անհրաժեշտ պաշտպանության վիճակում ատրճանակով կրակոցներ արձակելուն, Մուշեղ Մուշեղյանի դիմադրությունը հաղթահարելու և այդ ժամանակ ծագած Մուշեղ Մուշեղյանին սպանելու հանցավոր դիտավորությունն ավարտին հասցնելու նպատակով ապօրինաբար վերջինիս ուղղակի դիտավորությամբ զրկել է կյանքից:

Նորատուսցի Ալիկին մեղադրանք է առաջադրվել այն բանի համար, որ նա 2016թ. նոյեմբերի 13-ին Պետրոս Իսրայելյանին դրդել է այլ անձանց հետ համատեղ Մուշեղ Մուշեղյանի առողջությանը դիտավորությամբ ծանր վնաս պատճառել: Ինչպես նաև նույն օրը հանցավոր խմբին օժանդակել է պլանավորված հանցագործության անխոչընդոտ իրականացմանը` Մուշեղ Մուշեղյանի առողջությանը ծանր վնաս պատճառելու գործընթացը հեշտացնելու, հետևաբար դրա խոչընդոտները վերացնելու եղանակով: