Կառավարության նախաձեռնությամբ վաղը՝ մարտի 23-ին, ԱԺ արտահերթ նիստ կգումարվի

Այսօր կառավարության նիստում մի շարք նախագծերի թվում հավանության արժանացավ մարտի 23-ին ԱԺ ար­տա­հերթ նիստ գումարելու վերաբերյալ կառավարության նախաձեռնությունը: Արտահերթ նիստի օրակարգում ներառված են առաջին ընթերցման ժամանակ ծավալուն քննարկումների առարկա դարձած «Պետական պարգեւների եւ պատվավոր կոչումների մա­­սին» ՀՀ օրենքում փոփոխություններ եւ լրացումներ կատա­րե­լու մա­սին նախագիծը, «Հանրաքվեի մասին» օրենքի, «Կառա­վարության կառուցվածքի եւ գործունեության մասին» օրենքների փաթեթի եւ այլ նախագծեր:

ՀՀ ֆինանսների նախարար Վարդան Արամյանի խնդրանքով օրակարգից հանվեց Հայաստանի Հանրապետության դատական դեպարտամենտին գումար հատկացնելու մասին նախագիծը. դատական դեպարտամենտի հետ որոշ տեխնիկական հարցեր կային շտկելու:

Առողջապահության նախարար Լեւոն Ալթունյանը ներկայացրեց «Հայաստանում տուբերկուլյոզի դեմ պայքարի», «Մոր եւ մանկան առողջության եւ ընտանիքի պլանավորման/վերարտադրողական առողջության բարելավում» դրամաշնորհային ծրագրի արտաբյուջետային հաշվի միջոցների ծախսման 2018 թվականի նախահաշիվը հաստատելու մասին նախագիծը: Դրանով սահմանվում է 212 հազար դոլարի չափով դրամաշնորհի հատկացման պայմանագիր կնքել Առողջապահության ազգային ինստիտուտի հետ՝ համապատասխան ծրագրային նպատակների իրականացման համար:

Փոխարտգործնախարար Շավարշ Քոչարյանը ներկայացրեց Հայաստան-ԵՄ համապարփակ եւ ընդլայնված գործընկերության համաձայնագրի վավերացման օրենքի նախագիծը: Քոչարյանը նշեց, որ ԵՄ-ն ավարտել է համաձայնագրի առանձին դրույթների ժամանակավոր կիրառման համար ներպետական գործընթացները, այսինքն՝ Հայաստանի վավերացումից հետո համաձայնագրի որոշ դրույթներ կկիրառվեն մինչեւ համաձայնագրի վերջնական ուժի մեջ մտնելը:

Կարեն Կարապետյանն անդրադառնալով այլ երկրների հետ վիզային ռեժիմի հեշտացմանը, նշեց, որ մի քանի երկրների հետ վիզային ռեժիմի փոփոխությունը որեւէ վտանգ եւ խնդիր չի պարունակում, բայց ուշացվում է:

Հավանության արժանացավ Հայաստանի եւ Իսրայելի միջեւ՝ եկամուտների եւ գույքի կրկնակի հարկումը բացառելու եւ հարկումից խուսափելը կանխելու մասին կոնվենցիայի վավերացման օրենքի նախագիծը: Այն ներկայացնող Վարդան Արամյանը նշեց նաեւ, որ ընթացիկ տարում Ղրղզստան, Ուզբեկստանի եւ Սեյշելյան կղզիների հետ նման պայմանագրի ստորագրման ընթացակարգերը գրեթե ավարտված են, իսկ մինչեւ տարվա վերջ նախատեսվում է եւս 4 երկրի հետ ավարտել բանակցությունները եւ պատրաստվել ստորագրման:

Բնապահպանության նախարար Արծվիկ Մինասյանը ներկայացրեց «Շրջակա միջավայրի պահպանության եւ բնական ռեսուրսների օգտագործման կառավարման ռազմավարությանը եւ միջոցառումների ծրագիրը»: Այդ ծրագիրը նպատակ ունի բնական ռեսուրսների, շրջակա միջավայրի օբյեկտների ամբողջական միասնական հաշվառման համակարգ ստեղծել եւ նախատեսում է մինչեւ 2022 թ. շուրջ 22 միջոցառում իրականացնելու:

Երեւանի քաղաքապետ Տարոն Մարգարյանը ներկայացրեց ներդրումային ծրագրին հավանություն տալու եւ «Երեւանի պետական համալսարանի շրջանավարտների միավորում» հասարակական կազմակերպությանը հողամաս օտարելու մասին որոշման նախագիծը: Դրանով նախատեսվում է Մոնթե Մելքոնյան փողոցի հարակից տարածքում կառուցել երիտասարդական ավան, որը կունենա շուրջ 1000 բնակարան, կանաչապատ հանգստի գոտի, մանկապարտեզ։ Ներդրումները կկազմեն 52 մլրդ դրամ, իսկ իրականացման ընթացքում 2400 աշխատատեղ։ Ծրագրի մեկնարկը նախատեսվում է 2018թ., ավարտը` 2021-ին:

Վերոնշյալ բոլոր նախագծերը արժանացան կառավարության հավանությանը: Կառավարությունը հավանություն տվեց նաեւ արժանի Երեւանի քաղաքապետարանի ներկայացրած «Երեւան քաղաքի 33-րդ թաղամասի նկատմամբ բացառիկ՝ գերակա հանրային շահ ճանաչելու մասին» նախագծին: Դրանով նախատեսվող քաղաքաշինական ծրագրի իրականացմամբ Ֆիրդուսի շուկայի եւ հարակից տարածքներից «կվերանա ներկայումս առկա խառը, անկանոն կառուցապատումը` տարերայնորեն տեղակայված հին եւ խարխուլ շինություններով»: