Դու հզո՛ր ես եւ դու այսօր հաղթելու ես, այսօ՛ր ես դու հաղթելու. Փաշինյանը՝ ԱԺ գնալուց առաջ

Ստորեւ ներկայացնում ենք Ֆրանսիայի հրապարակում Նիկոլ Փաշինյանի ելույթը, որով նա հանդես է եկել՝ ցուցարարների ուղեկցությամբ դեպի Ազգային ժողովի շենք շարժվելուց առաջ.

«Սիրելի՛ ժողովուրդ, Հայաստանի Հանրապետության հպարտ քաղաքացիներ, երեկ երեկոյան, երբ մենք ձեռնարկում էինք «փակիր փողոցը» ակցիան,ես համոզված եմ, որ շատերը թերահավատորեն էին վերաբերվում դրան: Բայց Հայաստանի Հանրապետությունում կան քաղաքացիների, որոնք գիտեն, որ Հայաստանի ապագան կախված է մեկ մարդուց եւ այդ մեկ մարդը դո՛ւ ես: Եվ այդ մեկ մարդը դո՛ւ ես: Եվ այդ մեկ մարդը դո՛ւ ես:

Ես ուզում եմ հարգանքի եւ խոնարհումի տուրքս մատուցել մեր ուսանողներին, ովքեր  դուրս եկան փողոց եւ տեր կանգնեցին իրենց հաղթանակին, ովքեր դուրս եկան փողոց եւ տեր կանգնեցին իրենց իրավունքին, ովքեր դուրս եկան եւ տեր կանգնեցին իրենց հայրենիքին:

Ես ուզում եմ իմ հարգանքի տուրքը մատուցել այն մարդկանց առաջ, ովքեր փակեցին Արշակունյաց պողոտան, Մաշտոցի պողոտան, Թումանյան փողոցը, Բաղրամյան պողոտան, «Օրբելին», «Կոմիտասը», Հաղթանակի կամուրջը, «Լեոն», «Սարյանը», Ազատության պողոտան:

Դու հզո՛ր ես, դու հզո՛ր ես: Դու հզո՛ր ես եւ դու այսօր հաղթելու ես: Այսօ՛ր ես դու հաղթելու:

Սերժ Սարգսյանը չի լինելու Հայաստանի վարչապետ: Հանրապետականը չի լինելու իշխանություն Հայաստանում: Հայաստանում իշխանություն չի լինելու ոչ մի քաղաքական ուժ եւ ոչ մի քաղաքական գործիչ: Հայաստանում իշխանություն լինելու է ժողովուրդը: Հայաստանում իշխանություն լինելու է քաղաքացին եւ... (այո՛, ճիշտ եք, անում, տղերք, էդ հետեւից մոտեցեք, որովհետեւ Հայաստանի քաղաքացու հաղթանակի ժամը եկել է եւ Հայաստանի քաղաքացու հաղթանակի ժամը հիմա է: Հի-մա՛, հի-մա՛, հի-մա՛...)

Շնորհակալ եմ, որ դուրս եկաք փողոց եւ տեր եք կանգնում ձեր իրավունքին, շնորհակալ եմ, որ դուրս եկաք փողոց եւ տեր եք կանգնում ձեր հաղթանակին: Շնորհակալ եմ, որ դուրս եկաք փողոց եւ տեր եք կանգնում ձեր հայրենիքին: Եվ ուրեմն, քայլ արա, մերժիր Սերժին: Քայլ արա մերժիր Սերժին:

Սիրելի՛ ժողովուրդ, ես քիչ առաջ մոտեցա Բաղրամյան պողոտային եւ զարմանալի տեսարանի ականատեսը դարձա. իմ աշխատանքի վայրի ճանապարհը իմ առաջ փակված էր: Իմ աշխատանքի վայրը Հայաստանի Հանրապետության Ազգային ժողովն է, եւ դուք եք տվել այս աշխատանքի վայրը ինձ: Դուք եք իմ գործատուն: Եվ մենք, ազգային ժողովի չորս պատգամավորներս ձեր ուղեկցությամբ հիմա գնալու ենք մեր աշխատանքի վայրը: Բայց ես ուզում եմ նորից հիշեցնել հետեւյալը՝ այն ոստիկանները, որ կանգնած են այնտեղ, մեր եղբայրերն են եւ բուռն ծափերով ողջունենք մեր ոստիկաններին: Մենք այս ընթացքում ասել ենք եւ ասում ենք, որ սա բաց ձեռքերի քաղաքական պայքար է, մեր ձեռքերում չկա ոչ փայտ, մեր ձեռքերում չկա ատելություն, մեր ձեռքերում միայն կա սեր, մեր ձեռքերում միայն կա հարգանք, լույս կա մեր ձեռքերում: Մենք ոչ մի ոստիկանի նկատմամբ բռնություն չենք գործադրել եւ չենք գործադրի, թե անգամ նրանք փորձեն մեզ խփել: Ժպտացեք նրանց, ասեք նրանց՝ եղբայր իմ, ասեք նրանց, որ մենք մի երկրի քաղաքացի ենք, մենք ձեր ժողովուրդն ենք, ոստիկաննե՛ր:

Ներողություն եմ խնդրում բոլոր ոստիկանների ընտանիքներից, որ նրանք մեր ակցիայի պատճառով ստիպված են աշխատել շուրջօրյա, կրկնակի ավելի ծառայություն իրականացնել եւ օրերով տուն չգնալ: Եվ ես նրանց ընտանիքի անդամներից՝ կանանցից ու մայրերից, երեխաներից ներողություն եմ խնդրում, բայց նաեւ հավաստիացնում եմ՝ այն, ինչ մենք անում ենք, մենք անում են նաեւ հանուն իրենց երեխաների:

Եթե որեւէ մեկը որեւէ բան կշպրտի ոստիկանների վրա, նա մեր շարժման հետ կապ չունի: Անմիջապես չեզոքացրեք նրան, նա սադրիչ է: Եթե որեւէ մեկը կհարվածի որեւէ ոստիկանի, տեղում չեզոքացրեք նրան, նա սադրիչ է, մենք բռնություն չենք գործադրելու, մենք ուղղակի անցնելու ենք: Ուղղակի անցնելու ենք:

Հիմա այստեղ կա ԱԺ չորս պատգամավոր եւ առաջին շարքում քայլում են ԱԺ այդ չորս պատգամավորները, ովքեր գնում են աշխատանքի իրենց գործատուների հետ: Դուք մեր գործատուն եք, դուք մեր շեֆն եք: Եվ ուրեմն, քայլ արա մերժիր Սերժին, քայլ արա մերժիր Սերժին...»