Դատական հետապնդում Փայլանի դեմ, դատախազությունը պահանջում է զրկել անձեռնմխելիությունից

Անկարայի գլխավոր հանրապետական դատախազությունը խորհրդարանից պահանջել է դադարեցնել քրդամետ ընդդիմադիր «Ժողովուրդների դեմոկրատական» կուսակցության հայ պատգամավոր Գարո Փայլանի պատգամավորական անձեռնմխելիությունը։ Փայլանը կարող է պատասխանատվության ենթարկվել Թուրքիայի քրեական օրենսգրքի 299-րդ (հանրապետության նախագահին վիրավորելու) եւ 301-րդ (Թուրքիայի պետականությանը, թուրք ժողովրդին, Թուրքիայի կառավարությանը հրապարակայնորեն վիրավորելու եւ նվաստացնելու) հոդվածների հիման վրա, փոխանցում է «Ակօս»-ը։

Իսկ «Ասբարեզ»-ի փոխանցմամբ, Փայլանի դեմ 2017թ․ մայիսի 16-ին հայց է ներկայացրել Գիրեսունի համալսարանի նախկին ռեկտոր Այգյուն Աթթարը։ Մեղադրանքը հիմնավորվել է Գարո Փայլանի՝ 2017թ․ հունվարի 14-ին մեջլիսում ունեցած ելույթով եւ 2017թ․ մայիսի 1-ին Կանադայի հայկական «Horizon Weekly»-ի եթերում հնչեցրած, այնուհետ նույնանուն «Հորիզոն» թերթում հրապարակված արտահայտություններով, որում նա անդրադարձել էր Հայոց ցեղասպանության թեմային ու ասել. «Հարյուր հազարավոր մարդիկ գործազուրկ են, այս կառավարությունը Թուրքիայի մեջ ահ ու սարսափ է պատճառում, անցյալ տարի զինվորականներին հարված հասցնելու փորձ եղավ, դա ավելի է պառակտում ազգին, Թուրքիայի մեջ խաղաղության տարածումը խոչընդոտում է այս կառավարությունը: Թուրքիայում ցեղասպանություն է տեղի ունեցել եւ այդ ցեղասպանությունն այսօր եւս շարունակվում է»:

Իսկ Թուրքիայի խորհրդարանում նշված ելույթի ժամանակ հայ պատգամավոր, մասնավորապես ասել էր․ «Մի ժամանակ մենք 40 տոկոս էինք կազմում։ Այսօր հազարից մեկն ենք։ Ուրեմն, մեզ հետ մի բան է պատահել, եւ ես դա ցեղասպանություն եմ կոչում։ Հայ ազգը շատ լավ գիտի, թե իր գլխին ինչ է եկել։ Ես էլ շատ լավ գիտեմ, թե մի ժամանակ իմ հոր ու պապի հետ ինչ է կատարվել։ Ուրեմն՝ դուք ասեք դրա անունը։ Քանի որ մենք առ ոչինչ ենք։ Մենք նվազել ենք այնքան, որ արդեն միայն հազարից մեկն ենք»։

Անկարայի գլխավոր հանրապետական դատախազության՝ խորհրդարանական հանցագործությունների հետաքննության բյուրոն ընդունել է Աթթարի հայցը եւ ընթացք տվել դրան։ 301-րդ հոդվածով հետաքննություն սկսելու համար անհրաժեշտ է Թուրքիայի արդարադատության նախարարության թույլտվությունը։ Հայտնի է դարձել, որ արդարադատության նախարարությունը 2017թ․ դեկտեմբերի 7-ին բավարարել է Փայլանի դեմ հետաքննություն սկսելու պահանջը։

«Ermenihaber»-ի փոխանցմամբ էլ, Դատախազությունն արձանագրել է, որ Փայլանի նշված ելույթները բավարար ապացույց են հանդիսանում առ այն, որ նա հրապարակայնորեն վիրավորել է թուրք ժողովրդին, Թուրքիայի պետականությունն  ու հանրապետության նախագահին։

Իրեն առաջադրված մեղադրանքի վերաբերյալ «Ակօս»-ին մեկնաբանություններ տված Գարո Փայլանը նշել է, որ միշտ միանշանակ կերպով ցեղասպանություն է անվանել հայերի հետ Օսմանյան կայսրությունում տեղի ունեցածը եւ այդ հարցը բարձրացնելով մեջլիսում՝ պահանջել է արժանի գնահատական տալ այդ ոճրագործությանը։ Նա ընդգծել է, որ իր ելույթները բնավ ուղղված չեն թուրք ժողովրդի եւ պետականության դեմ, ինչպես նախատեսում է 301-րդ հոդվածը, այլ ուղղված է այն ժամանակվա հանցավոր խունտայի դեմ, որն իրականացրել է Հայոց ցեղասպանությունը։

Հայ պատգամավորը նաեւ հավելել է, որ իր դեմ գործընթաց հարուցելու արտոնություն տված Թուրքիայի կառավարությունը չի կարող լռեցնել իրեն եւ ինքն ամեն դեպքում շարունակելու է պայքարել ներկայում կատարվող եւ անցյալում կատարված անարդարությունների դեմ։

«Ասբարեզ»-ը նշում է, որ Հայոց Ցեղասպանության մասին խոսելու համար նույն 301-րդ հոդվածով հետապնդումների էին ենթարկվել «Ակօս»ի սպանված խմբագիր Հրանտ Դինքը, թուրք պատմաբան Թաներ Աքչամը եւ ուրիշներ: