Ստեփանակերտում ասացին զինվորների արկղերը շտաբներ չտանեք, տեղ չի հասնի, ուղիղ զորամաս տարեք

Գյումրու Հայորդյաց տան  կողմից ուղարկված արկղերը հասել են զորամասեր: «Ես Ձեզ սա վստահեցնում եւ պնդում եմ, որ Մանվել Գրիգորյանի պահեստներում, կամ մեկ այլ տեղ հայտնաբերված արկղերի մեջ մեր կողմից ուղարկված արկղեր չկային եւ չեն էլ կարող լինել»,- ՀԺ-ի հետ զրույցում ասաց Գյումրու Հայորդյաց տան տնօրեն Աստղիկ Եդիգարյանը:

Հայորդյաց տուն տարված բոլոր արկղերը բացվել են դրանք բերողների ներկայությամբ, քանի որ առանց դրանց պարունակությանը ծանոթ լինելու փակ արկղեր ուղարկելու իրավունք չի եղել: Առաջին մեքենան 9 արկղով ուղարկվել է Ստեփանակերտի շտաբ: Ստեփանակերտում արկղերը տանողներին տեղաբնակներն ասել են, որ պետք չէ դրանք շտաբներ տանել, այլ լավ կլինի միանգամից հասցնել զորամասեր ու տալ զինվորներին, քանի որ նկատել են, թե ինչպես են արկղերը շտաբներից այլ նպատակներով դուրս հանվում: Նաեւ զանգել են Հայորդյաց տան տնօրենին եւ խորհուրդ տվել միատեսակ պարունակությամբ արկղեր չուղարկել: Այսինքն չլինի արկղ, որի մեջ միայն պահածո է, կամ միայն ծխախոտ, կամ հագուստ:

«Դրանից հետո մենք սկսեցինք մեզ մոտ բերվող ակղերից կազմել խառը արկղեր՝ 4-ից 5 հոգու համար, երկու շաբաթվա կեցության չափաբաժնով՝ սկսած քաղցր կաթից, պահածոյից մինչեւ անձնական հիգիենայի պարագաներ: Այսինքն, մենք չենք ունեցել արկղ, որի մեջ լիներ միատեսակ սնունդ: Բոլոր արկղերի վրա գրել ենք Մայր Աթոռ ՍԲ Էջմիածնի Գյումրու Հայորդյաց տուն: Սակայն յուրաքանչյուր արկղում դրել ենք նամակներ եւ տեղեկացնող թերթիկներ այն դպրոցներից, որոնք բերել էին այդ արկղերի մթերքներն ու պարագաները: Եվ տարանք ուղիղ զորամասեր: Մեր ապրանքը գնացել է Մատաղիսի, Մարտակերտի, Թալիշի, Ջաբրայիլի, Հադրութի տարբեր զորամասեր»,-պատմեց Աստղիկ Եդիգարյանը:

Յուրաքանչյուր մեքենայի հետ Հայորդյաց տան աշխատակիցներից են գնացել կամ Դելտա տելեկոմի տղաներից մեկը, ունենք զորամասերի ստացականները, սահմանն անցնելուց տրված բեռնագրերը, այնպես վստահ ենք, որ մենք գոնե մինչեւ զորամաս հասցրել ենք Շիրակի մարզի եւ Գյումրու դպրոցների, տարբեր կազմակերպությունների, անհատ քաղաքացիների կողմից զինվորների համար գնված ապրանքները: Ընդամենը մեկ մեքենա է իմ տեսադաշտից դուրս մնացել, դա եղել է Գյումրիից մեկնող երկրապահների վետերանների ավտոբուսը: Իրենք գնում էին որպես կամավորներ, եկան, թե մեզ ի՞նչ կարող եք տալ, մենք իրենց հետ ահագին բան դրեցինք: Բայց վերադառնալիս իրենք բերել են ստացականներ, թե ուր եւ ինչ են տարել»,-վստահեցրեց Աստղիկ Եդիգարյանը:

Ընդհանուր առմամբ այդ օրերին 600 արկղ է տարվել Մատաղիսի, Մարտակերտի, Թալիշի, Ջաբրայիլի, Հադրութի զորամասեր: Աստղիկ Եդիգարյանը մինչ օրս պահում է բոլոր արկղերի պարունակությունը փաստող գրառումները:

«Էն ժամանակ ես Շուլիին չէի ճանաչում, Շուլին ինձ գրեց ֆեյսբուքով, շնորհակալություն Թալիշի, Մարտակերտի, Մատաղիսի զինվորների անունից, գրեցին Ղարաբաղից, որ ապրանքը տեղ է հասել, մեզ գրեցին Թալիշի բնակիչներից: Մի օր էլ արկղերը բացել էին, արկղի մեջ եղել էր 6-րդ դպրոցի աշակերտների նամակը, կարդացել էին: Մեր ապրանքը տանողների միջոցով զանգեցին զինվորները, ասեցին՝ հնարավո՞ր է խոսենք էդ դպրոցի երեխաների հետ: Վազեցի 6-րդ դպրոց, հեռախոսը փոխանցեցի, խոսեցին տղաների հետ»,-պատմեց տիկին Եդիգարյանը:

Վստահ լինելով, որ ամեն ինչ կարողացել են կազմակերպել ճիշտ եւ նպատակային, միաժամանակ Աստղիկ Եդիգարյանը չի բացառում, որ հնարավոր է այդ ապրանքի ինչ-որ մաս զինվորին հասած չլինի: «Ես ոչինչ չեմ բացառում, մարդկային ֆակտոր կա էստեղ, մենք տարել ենք զորամասեր, բայց մենք չենք հսկել, թե էդ արկղը քանի հոգու հասավ կամ որ զինվորին ինչ հասավ: Բայց որ տարել ենք ուղիղ զորամասեր, դա երաշխավորում եմ 100 տոկոսով»: