Մենք կառուցում ենք օրենքի երկիր, որեւէ կլան առավելություն չի ունենալու. Դիանա Գասպարյան

Էջմիածնի քաղաքապետի ժամանակավոր պաշտոնակատարը 30-ամյա Դիանա Գասպարյանն է: Նա ծնվել է Արմավիրի մարզի Էջմիածին քաղաքում: 2004-2011 թվականներին սովորել է Երեւանի պետական համալսարանի իրավագիտության ֆակուլտետում: Գասպարյանը սովորելու վերջին տարիներին՝ 2008-2009 թվականներին աշխատել է Երեւանի քրեական դատարանում՝ որպես դատարանի նախագահի գործավար, այնուհետեւ 2009-2012 թվականներին՝ վերաքննիչ քրեական դատարանում: 2013 թվականից աշխատել է արդարադատության նախարարության եվրոպական կապերի վարչությունում՝ որպես քաղաքացիական-տնտեսական գործերով բաժնի առաջատար մասնագետ, այնուհետեւ նույն բաժնի գլխավոր մասնագետ, ապա 2016-ից այդ բաժնի պետ: Դիանա Գասպարյանը դասավանդել է նաեւ Արդարադատության ակադեմիայում՝ դատավորների, դատախազների, դատական ծառայողների վերապատրաստման շրջանակներում՝ քրեական եւ քաղաքացիական գործերով Եվրոպական դատարանի նախադեպային իրավունքի վերջին զարգացումների հետ կապված:

2018 թվականի հունիսի 25-ին վարչապետ Նիկոլ Փաշինյանի որոշմամբ՝ Դիանա Գասպարյանը ստանձնել է Էջմիածնի քաղաքապետի ժամանակավոր պաշտոնակատարի պարտականությունները:

«Հայկական ժամանակ»-ը Դիանա Գասպարյանի հետ զրուցեց վերջինիս նշանակման ու ապագա անելիքների մասին:

- Տիկին Գասպարյան, ո՞ւմ կողմից եղավ Էջմիածնի քաղաքապետի պաշտոնը ստանձնելու առաջարկը:

- Առաջարկը եղավ իշխող քաղաքական թիմի կողմից, բայց թույլ տվեք ավելի մանրամասներ չասել: Առաջարկն ինձ համար բավականին անսպասելի էր եւ անգամ շոկային՝ դրական իմաստով: Երկար մտածելուց հետո եւ քաղաքի ներկայիս վիճակը տեսնելով, մտահոգ լինելով խնդիրներով՝ որոշեցի այս ծանր պատասխանատվությունը վերցնել ինձ վրա եւ փորձել առայժմ ժամանակավոր պաշտոնակատարի դերում լուծում տալ հատկապես ամենահրատապ հարցերին:

- Էջմիածնում տարիներ շարունակ կրիմինալ քաղաքական եւ ոչ քաղաքական միջավայր է եղել: Ի՞նչ եք կարծում, կկարողանաք աշխատել այս միջավայրում եւ փոփոխություններ անել ժամանակավոր պաշտոնավարման ընթացքում:

- Կցանկանայի նշել, որ կրիմինալ միջավայրի եւ ընդհանրապես կրիմինալ կլանների ակտիվացման, գործունեության համար ես տեսնում եմ օբյեկտիվ եւ սուբյեկտիվ գործոններ: Որպես օբյեկտիվ գործոն կարող եմ նշել տվյալ ժամանակաշրջանում առկա քաղաքական ղեկավարության կողմից տված որոշակի արտոնությունները, ամենաթողությունը, որը շատերին թույլ է տվել գործել օրենքից դուրս: Ես հավատում եմ, եւ արդեն բոլորը տեսնում են, որ իրողություն է փոխվել, որ մենք այլեւս կառուցում ենք օրենքի երկիր: Հետեւաբար՝ այդ կրիմինալ շրջանակները չեն շահելու պետության հովանավորությունը: Որեւէ կլան առավելություն չի ունենա:

- Տիկին Գասպարյան, իսկ Դուք որեւէ կուսակցության հարու՞մ եք:

- Կարող եմ վստահաբար նշել, որ ինքս որեւէ կլանի, խմբավորման մաս չեմ կազմում: Հետեւաբար՝ ինքս էլ որեւէ կաշկանդվածություն չունեմ որեւէ խմբի առաջ: Այս պահին անկուսակցական եմ, բայց իմ գաղափարներով հարում եմ ներկայիս վարչապետի քաղաքական թիմին՝ Քաղաքացիական պայմանագիր կուսակցությանը: Հնարավոր է՝ առաջիկայում համալրեմ իրենց կուսակցական շարքերը:

- Այս տարվա հոկտեմբերին կայանալիք ՏԻՄ ընտրությունների ժամանակ Էջմիածնի քաղաքապետի պաշտոնում Դուք ձեր թեկնածությունը կառաջադրե՞ք:

- Այս պահին քաղաքի առաջ այնքան խնդիրներ են ծառացած: Ես հակված եմ այդ խնդիրները տարանջատելու առաջնայինի եւ երկրորդականի: Այս պահին իմ առաջնային նպատակը տեսնում եմ քաղաքը բնականոն կյանք վերադարձնելը, կայունության հաստատումը, ընթացիկ բոլոր ծրագրերի ավարտումը, նոր ծրագրերի ներդնումը: Հետեւաբար թույլ տվեք ապագայի հետ կապված առավել հեռավոր պլանների մասին հայտարարություն չանել, չնայած արտահերթ ընտրությունները սարերի հետեւում չեն: Հետագան կախված է առաջիկայում կատարելիք իմ աշխատանքից, իմ հնարավորություններից ու ընկալելիությունից: Կարծում եմ, ամեն դեպքում, նաեւ կարծրատիպեր կոտրելու խնդիր ունենք, խնդիր ունենք ցույց տալու, որ տարիքը, սեռը որեւէ բան չեն որոշում, կարեւորը կամային հատկանիշներն են, ցանկությունը եւ ձգտումը: Չեմ բացառում, որ հետագայում կառաջադրվեմ որպես քաղաքապետի թեկնածու, բայց այս պահին վերջնական որոշում չկա:

Գասպարյանը նշեց՝ քանի որ նրա նշանակումնը, ըստ էության, արդեն եղել է, նա այսօր պատրաստվում է այցելել քաղաքապետարան՝ աշխատակիցների հետ ծանոթանալու եւ ընթացիկ վիճակը գնահատելու համար: Իսկ մարզպետն ու տարածքային կառավարման եւ զարգացման նախարարը Գասպարյանին վաղը կներկայացնեն աշխատակազմին: