Ինչպես է հանգուցալուծվելու Մայր աթոռի շուրջ ստեղծված սկանդալը. զիջումների չեն գնում

Արդեն մեկ ամսից ավելի է՝ «Նոր Հայաստան, նոր հայրապետ» շարժումը պահանջում է Ամենայն հայոց կաթողիկոս Գարեգին Բ-ի հրաժարականը: Նման հասարակական պահանջ առաջացավ, երբ երկրում քաղաքական իրողություն փոխվեց՝ հեռացավ գործադիր նախկին իշխանությունը: 

«Հայկական ժամանակ»-ի լրագրողի հետ զրույցում «Նոր Հայաստան, Նոր Հայրապետ» նախաձեռնության անդամներից Կարեն Պետրոսյանը նշել էր, որ իրենց գործողությունները շարունակելու են մինչեւ Գարեգին Բ-ն հրաժարական տա:

«Կաթողիկոսը, ով կին, երեխաներ ունի, ով ստեղծել է բռնապետական համակարգ, ով կարող է քրիստոնյաների գրպանը թմրանյութ գցել`իրենց ասածով եմ ասում, ով այսքան լկտի ստի եւ կեղծիքի մեջ է, ինչպե՞ս նա կարող է արդարության եւ միաբանության երաշխավոր լինել:

Ինքը եղել է Սերժ Սարգսյանի կաթողիկոսը, որովհետեւ ընտրությունները դեռ չհրապարակված, ԿԸՀ-ն դեռ արդյունքները չհայտարարած, նա վազում եւ շնորհավորում է Սերժ Սարգսյանին: Սա ի՞նչ է, եթե ոչ ընտրության արդյունքների վրա ազդեցություն եւ լեգիտիմացում: Ես, որպես ՀՀ քաղաքացի, այսպես եմ հասկանում, ո՞ւր էր այդ Գարեգին Բ-ն Մարտի 1-ին»,- մասնավորապես, ասել էր Կարեն Պետրոսյանը:

Մայր Աթոռի տեղեկատվական համակարգի տնօրեն Տեր Վահրամ Մելիքյանը «Նոր Հայաստան, Նոր Հայրապետ» շարժման մասնակիցների հայտարարությունները եւ գործողությունները որակում է բռնություն՝ Գարեգին Բ-ի նկատմամբ: Նշենք, որ շաբաթ օրը կաթողիկոսի հրաժարականը պահանջողները Վայոց Ձորի մարզում շրջափակել են նրա մեքենան՝ զրկելով նրան ազատ տեղաշարժվելու իրավունքից: Ըստ տեր Վահրամ Մելիքյանի՝ սպառնալիք է եղել, որ Կաթողիկոսին փակելու են Գնդեվանքում, ինչպես նաեւ քաշքշուկ է տեղի ունեցել: «Եթե Ամենայն Հայոց Կաթողիկոսին սկսում են քաշքշել, արգելափակել նրա տեղաշարը, դա բռնություն է»,- ասել էր Տեր Վահրամը:

Այժմ Հայ Առաքելական եկեղեցում ստեղծվել է անելանելի իրավիճակ: «Նոր Հայաստան, Նոր Հայրապետ» նախաձեռնության անդամները շարունակում են հայտարարել, որ մինչեւ Գարեգին Բ-ն հրաժարական չտա, իրենց գործողությունները չի դադարելու, իսկ Մայր Աթոռից էլ պատասխանում են, որ Ամենայն Հայոց կաթողիկոսի հրաժարականի մասին խոսք անգամ լինել չի կարող:

Հայաստանի վարչապետ Նիկոլ Փաշինյանը ստեղծված իրավիճակին անդրադարձել է մի քանի անգամ եւ հայտարարել, որ գործադիր իշխանությունը չի պատրաստվում խառնվել եկեղեցական հարցերին, քանի որ պետությունն ու եկեղեցին գործում են միմյանցից անջատ:

«Ես համոզված չեմ ու դա հենց իմ համոզմունքն է, որ կառավարությունը ներեկեղեցական հարցերին չպետք է խառնվի: Սա ներեկեղեցական հարց է, քանի որ այդ շարժման մասնակիցների մեջ կան հոգեւորականներ ու հոգեւորականության ներկայացուցիչներ: Եթե անկեղծ լինեմ, մի քանի հոգեւորականների հայտարարություններ լսելիս, որոնք արվում են Վեհափառի պաշտպանության համար, ուղղակի ապշում եմ, քանի որ այդ հայտարարությունները հակառակ էֆեկտ են ստանում:

Առայժմ ես այն տպավորությունն ունեմ, որ սա ներեկեղեցական շրջանակներից դեռեւս դուրս չի եկել, բայց ինչ խոսք, օրենքի պաշտպանության հարցում կառավարությունը իր անելիքը պետք է անի, մասնավորապես՝ վարչապետին կից կառույցը՝ ոստիկանությունը»,- վերջին ֆեյսբուքյան ուղիղ եթերի ժամանակ ասել էր վարչապետը եւ միաժամանակ նշել, որ գոհ չէ ոստիկանության աշխատանքից:

Վարչապետը միաժամանակ նշել էր, որ եկեղեցու անդամները պետք է հավաքվեն, քննարկեն ստեղծված իրավիճակն ու գտնեն լուծումներ: «Այստեղ եկեղեցու տարբեր խմբերի խնդիր կա ու ես չեմ կարծում, որ այս հարցին կառավարության միջամտության կարիքը կա»:

Գործադիր մարմնից զատ օրենսդիրը եւս չի ցանկանում միջամտել կաթողիկոսի շուրջ ստեղծված սկանդալին: Մասնավորապես, Ազգային ժողովի նախագահ Արա Բաբլոյանը կարծում է, որ եկեղեցու խնդիրները պետք է եկեղեցու պատերի ներսում լուծվեն: Միաժամանակ խորհրդարանի նախագահը կարծում է, որ պետությունը պետք է պահպանի եկեղեցու շահերը:

«Եկեղեցին անջատ է պետությունից, բայց միեւնույն ժամանակ պետությունը պարտավոր է ապահովել բոլոր կառույցների, այդ թվում՝ եկեղեցու օրինական շահերի պաշտպանությունը: Եթե առկա են խնդիրներ, ապա դրանք պետք է լուծվեն եկեղեցու ներսում՝ հոգեւոր դասի շրջանակներում: Միաժամանակ անթույլատրելի է եկեղեցու դեմ ուղղված ցանկացած անօրինական գործողություն»,- ՀԺ-ի հարցադրմանն ի պատասխան Արա Բաբլոյանի տեսակետը ներկայացրեց ԱԺ լրատվության վարչության պետի ժ/պ Կնյազ Սարոյանը:

ՀՀԿ-ից արդարադատության նախկին նախարար Դավիթ Հարությունյանը եւս կարծում է, որ գործադիր իշխանության միջամտության անհրաժեշտությունը չկա, սակայն իրավապահ համակարգն անելիքներ ունի:

«Խոսքը վերաբերում է անձի ազատ տեղաշարժը ակնհայտորեն սահմանափակելուն»,- ՀԺ-ի հետ զրույցում փոխանցեց Հարությունյանը:

Նա չի կարծում, որ տեղի ունեցող իրադարձությունները սահմանափակվում են ներեկեղեցական լինելով: «Սա միայն ներեկեղեցական հարց չէ, սա որոշակի անձանց կողմից թույլատրելի սահմաններն անցնել է: Իրավապահ մարմինները պետք է ապահովեն անձի ազատ տեղաշարժի իրավունքը՝ այդ թվում կաթողիկոսի: Այլոք կարող են բողոքներ ու պահանջներ ներկայացնել, բայց, երբ դա բերում է անձի ազատ տեղաշարժը սահմանափակելուն, կաթողիկոսին քաշքշելուն, ուրեմն իրավապահները պետք է միջամտեն»:

Դավիթ Հարությունյանը դժվարանում է պատասխանել ՀԺ-ի այն հարցին, թե որը պետք է լինի ստեղծված իրավիճակի լուծումը, երբ նախաձեռնության անդամները պահանջում են կաթողիկոսի հրաժարականը, իսկ Մայր Աթոռից պատասխանում են, որ դրա մասին խոսք անգամ լինել չի կարող:

ԵԼՔ-ից Էդմոն Մարուքյանն էլ մեր զրույցում հայտարարեց, որ իրեն իրավունք չի վերապահում որպես աշխարհիկ իշխանության ներկայացուցիչ միջամտել հոգեւոր իշխանության գործերին: «Ես ինձ չեմ պատկերացնում այս հարցին միջամտողի դերում: Իմ իշխանությունն այլ տեղից է, իրենցն՝ այլ»,- ասաց Մարուքյանը: Նա միաժամանակ չցանկացավ գնահատել ստեղծված իրավիճակը, թե արդյո՞ք կաթողիկոսի հրաժարականը պահանջողների գործողությունները դուրս են եկել թույլատրելի սահմաններից:

ՀՀ նախագահ Արմեն Սարգսյանն էլ նշում է, որ եկեղեցին անջատ է պետությունից, բայց միաժամանակ կարծում է, որ հավատացյալներն իրավունք ունեն քննարկել կաթողիկոսի գործունեությունը:

«Կարելի է, իհարկե, քննարկել որեւէ կոնկրետ հարցում եկեղեցու կամ նրա պետի գործունեությունը, դիրքը եւ վերաբերմունքը: Կարծում եմ, հավատացյալները դրա իրավունքն ունեն, որոնք փափագում են Հայոց եկեղեցին տեսնել ամուր եւ առողջ, իսկ նրա սպասավորներին՝ անբիծ եւ նվիրյալ: Մյուս կողմից, քանի որ եկեղեցին աշխարհիկ կառույց չէ, ավելին՝ հատուկ համազգային հաստատություն է,  այն չի կարող ենթարկվել աշխարհիկ եւ քաղաքական կյանքին հատուկ տրամաբանությանը: Հետեւաբար, պետք է ապավինել սթափ դատողությանն ու զերծ մնալ մեր հոգեւոր ու բարոյական հենարանները խարխլելու փորձերից»,- մասնավորապես ասված է մեզ ուղարկված պատասխանում:

Այնուհանդերձ, նշենք, որ Գարեգին Բ-ն այն հոգեւոր առաջնորդն է, որի ներկայությունն ու աջակցությունը հայ հավատավոր ժողովուրդը գրեթե չի զգացել: Նա սառը, պաշտոնական ոճի մեջ մի քանի րոպեանոց ուղերձներ է հղել միայն Նոր տարվա նախաշեմին: Փոխարենը ջերմ ու բարիդրացիական հարաբերությունների մեջ է եղել նախկին իշխանությունների հետ: Մամուլն էլ բազմիցս գրել է այն մասին, որ Գարեգին Բ-ն բիզնեսներ, երեխաներ ու կին ունի, որը որեւէ անգամ չի հերքվել:

Տպել
10720 դիտում

Ինչու է ՊԵԿ-ը մտել Գազպրոմ. պարզաբանում է Դավիթ Անանյանը

Քաղաքական գործիչը ձգտում է առավելագույնի. Արայիկ Հարությունյանն՝ ԱԺ նախագահ լինելու մասին

Լիլիթ Արզումանյանի նշանակման հիմքում փորձն ու գիտելիքներն են. Արայիկ Հարությունյան

Մենք կապ չունենք Զուրաբիշվիլիին ուղղված սպառնալիքների հետ. Վրաստանի ընդդիմություն

«Օրենքով գող» Մերաբ Քալաշովը կհանձնվի Ֆրանսիայի իրավապահներին. նա հետախուզվում է 2015-ից

Ավելի քան 13 երկիր ցանկանում է ռուսական C-400 զենիթահրթիռային համակարգեր գնել

Առեւանգել են 14-ամյա աղջկան եւ սեռական հարաբերություն ունեցել. ՔԿ-ն մեղադրանք է առաջադրել

Սվիտալսկին լսե՞լ է «հստակ գաղափարները». Փաշինյանը հանդիպել էր ԵՄ դեսպաններին

Երկու տղամարդ գնում են ԶԱԳՍ ու ասում են՝ ուզում ենք ամուսնանալ, կա՞ օրենք, որ նրանց ամուսնությունը կգրանցվի. վարչապետ

ՀՀ-ում լայն կիրառում է ունեցել «հեռախոսային արդարադատությունը». Զեյնալյանը՝ ՄԱԿ-ի հատուկ զեկուցողին

Քրեակատարողական հիմնարկները կվերանորոգվեն. կառավարությունը 270 մլն հատկացրեց

Մայրապետյանին թույլ կտան տեսակցել ընտանիքի անդամներին եւ ֆինանսավորել «Հ2»-ը. դատախազության պարզաբանումը

Կառավարության նիստերն այսուհետ դռնբաց կլինեն՝ անկախ վարչապետի ցանկությունից

Նոյեմբերի 21-ին կհրավիրվի Ազգային ժողովի արտահերթ նիստ

Ընտանեկան բռնություն. ինչո՞ւ կնոջը ծեծելու համար կասկածվող ամուսինը չի ձերբակալվել դեպքի օրը. պարզաբանում

Պատրաստ ենք հաջորդ հաջողությունները կրկնապատկել. Ամերիկայի հայկական համագումարն ամփոփեց տարին

Ընտրություններին «ասողների» ինստիտուտը չի լինելու. Նիկոլ Փաշինյան

Դիլիջանի ոլորանները դժվարանցանելի են, մի շարք ճանապարհներին ձյուն է տեղում, Գորիսում, Սիսիանում եւ Բերդում մառախուղ է

Ցուցակում ընդգրկվածների հետ հարցազրույց ենք անցկացրել. Ալեն Սիմոնյան

Երթեւեկության կազմակերպման փոփոխություն Երեւանի Սասունցի Դավիթի եւ Բելինսկու փողոցների խաչմերուկում