Զինվոր տղես ցավերի մեջ տանջվում է, ՊՆ-ն տեր չի լինում, դուպլեքս անելու տեղը հեռախոսով են նկարում. զինվորի մայր

Լոռու մարզի Սպիտակ քաղաքի բնակիչ Արմեն Թադեւոսյանը, ով բանակ է զորակոչվել 2018 թ-ի հուլիսի 15-ին, առողջական խնդիրներ ունի, պետք է համալիր հետազոտություն իրականացվի, այնուհետ նաեւ՝ շտապ վիրահատվի, սակայն ինչպես ծնողներն են նշում, ՀՀ ՊՆ-ն ոչինչ չի ձեռնարկում, փոխարենը Վանաձորի զինհոսպիտալում տղային դուպլեքս անելու փոխարեն ոտքը հեռախոսով են նկարել, ինչի հիման վրա էլ Երեւանում եզրակացություն են տվել:

Արմեն Թադեւոսյանի մայրը՝ Գոհար Ոսկանյանը, «Հայկական Ժամանակ»-ի հետ զրույցում պատմեց, որ տղան ծառայում է Մարտակերտում. «Մինչեւ բանակ գնալն էլ մոտը ախտորոշվել էր վարիկոցելե հիվանդություն, մինչ բանակ գնալը Գրիգոր Լուսավորիչ հիվանդանոցում գրել էին, որ վիրահատություն է պետք, սակայն չարին ու տարան բանակ, զորավարժությունների ժամանակ երեխու վարիկոզը բացվեց, այնտեղի հրամանատարությունը երեխուն ազատեց շարային ծառայությունից, հետո տեղափոխեցին Ստեփանակերտի հոսպիտալ, դուպլեքս են արել, որտեղ նշված է՝ ձախ սրունքի հետին մակերեսային երակի լայնացում՝ փականային անբավարարությամբ»,- պատմեց մայրը՝ նշելով, որ տղային նախորդ շաբաթ բերել են Վանաձոր՝ մինչ բանակ զորակոչվելը եղած ինչ-որ հարցերի հետ կապված, ճանապարհին վիճակն ավելի է վատացել. «Բերել են Վանաձորի զորամասի միանգամից բուժկետ, դիմել եմ նախարարության բուժծառայության վարչություն, պետի տեղակալ Արմեն Նազարյանին, մի կերպ, կռվով դավով երեխուն տեղափոխեցին Վանաձորի հոսպիտալ, որտեղ դուպլեքս սարք չունեն, Նազարյանը զանգել, ասում ա՝ երեխու ոտքը հեռախոսով նկարեք, ուղարկեք Երևան: Ես չեմ հասկանում՝ էս ո՞ր թիվն ա, որ զինվորի ոտքը նկարելով են դուպլեքս անում, կարող ա վաղն էլ հեռախոսով կատե անեն»,- պատմեց մայրը:

Զինվորի ծնողները պահանջում են, որ տղային տեղափոխեն Մուրացանի զինվորական հոսպիտալ ու նորմալ հետազոտեն. «Թող նորմալ ստուգեն, եթե կարիք կա վիրահատության, թող վիրահատեն ու էլի տանեն ծառայության: Իմ տղեն հիմա Վանաձորի զորամասի բուժկետում ցավերի մեջ պառկած է, ոչ մի օգնություն չեն ցույց տալիս, մենակ հեռախոսով նկարին ոտքը, ուղարկին Նազարյանին ու վերջ»,- ասաց նա՝ հավելելով, որ եթե դուպլեքս չեն արել, ինչի՞ հիման վրա են եզրակացություն տվել, թե պլանային վիրահատության անհրաժեշտություն կա:

Մայրը շեշտում է՝ Գրիգոր Լուսավորիչ հիվանդանոցում տղային ախտորոշել են վարիկոցելե 2-րդ աստիճան, այսօր արդեն այն դարձել է 3-րդ աստիճան:

«2 անգամ դիմել եմ ՊՆ, պատասխան չեմ ստացել, դիմել եմ վարչապետին, մակագրել են նախարարին, էլի պատասխան չկա, 1.5 ամիս ա՝ տառապում ենք, երեխես ցավերի մեջ տանջվում ա, Ղարաբաղում լրիվ լավ էր, իսկ Հայաստանում ոչինչ չեն անում: Արմեն Նազարյանն ասում է՝ ինքը Ղարաբաղի զինվոր է, մենք չենք կարա, թող գնա Մարտակերտ, կտեղափոխենք Ստեփանակերտի հոսպիտալ, ընդեղ էլ թող որոշենք»:

Զինվորի մայրն ասում է, որ քանի դեռ Հայաստանի ՊՆ-ն ոչինչ չի անում, տղայի վիճակն ավելի է վատանում. «Արդեն երակների մեջ արյունը լերդակալել, սրվել ա, վիրաբույժներն ասում են՝ ամեն վայրկյան կարա տրոմբ դառնա: Ես խնդրում եմ, թող տանեն երեխուս վիրահատեն ու տանեն ծառայության»:

Մայրը նշեց, որ թե՛ իրենք ու թե՛ իրենց զինվոր որդին որեւէ բողոք չունեն ԼՂՀ հրամանատարական կազմից ու ծառայությունից, այնտեղ ուշադիր են եղել, բայց Հայաստանում, որտեղ մի քանի օր է՝ տղան զորամասում ու բուժկետում է, քար անտարբերություն է ցուցաբերվում. «Ես չգիտեմ՝ ում դիմեմ, 18 տարի պահել եմ, էսօր երեխուս կյանքի հետ են խաղում, բանակին զինվոր եմ տվել, որ էսպես տեր լինե՞ն»:

Զինվորի մայրը ՊՆ-ից, վարչապետ Նիկոլ Փաշինյանից խնդրում է ուշադրություն դարձնել ու քայլեր ձեռնարկել՝ առողջական խնդիրներ ունեցող զինվորի բուժումը կազմակերպելու համար:

«Հայկական Ժամանակ»-ի հետ հեռախոսազրույցում ՀՀ զինված ուժերի ռազմաբժշկական վարչության պետի տեղակալ Արմեն Նազարյանը, նախ նշեց, որ հանդիպել է զինվորի ծնողներին, իրենց պարզաբանվել է ընթացակարգը: Վարչության պետն առաջարկեց բոլոր հարցերը ձեւակերպել գրավոր ու դիմել սահմանված կարգով. «Ինքը Վանաձորում հետազոտվել է, բուժումը պլանավորված է, իր ծնողը գիտի, եղել է կառավարությունում ու նախարարությունում, ամեն ինչ պարզաբանվել է»,- ասաց նա՝ առաջարկելով մյուս բոլոր հարցերն ուղարկել գրավոր:

Հ.Գ. Նյութը պատրաստ էր հրապարակման, երբ մեզ զանգահարեց զինվորի հայրն ու հայտնեց, որ տղան բացի վերը նշված հիվանդությունից, ունի նաեւ այլ առողջական խնդիրներ՝ ձախ երիկամի կիստա, ատամների անբավարար վիճակ, սրտի տախիկարդիա, քթի միջնապատի կոտրվածք, ճնշման տատանում: Հոր խոսքով՝ բոլոր փաստաթղթերն առկա են: