Աշտարակի քաղաքապետ Թովմաս Շահվերդյանը ճանաչվել է տարվա լավագույն քաղաքապետ

2018 թվականի նոյեմբերի 29-ին «Եռամիասնություն հանուն զարգացման» ՀԿ-ի նախաձեռնությամբ անցկացվող AAD.am (Аrmenia, Artsakh, Diaspora) 9-րդ ամենամյա մրցանակաբաշխության «Տարվա լավագույն քաղաքապետ» անվանակարգին արժանացել է Աշտարակ քաղաքի համայնքի ղեկավար Թովմաս Շահվերդյանը:

«Եռամիասնություն հանուն զարգացման» ՀԿ-ի նախագահ Մամիկոն Խուրշուդյանը, շնորհավորելով Աշտարակի քաղաքապետին, ընդգծել է. «Աշտարակը վերջին տարիներին իսկապես բոլոր համայնքներից տարբերվում է իր կազմակերպվածությամբ՝ շնորհիվ երիտասարդ և գործունյա համայնքի ղեկավարի: Ունեցել ենք բազում դրական արձագանքներ քաղաքի բնակիչներից, քաղաքի հյուրերից, ովքեր իրենց գոհունակությունն են արտահայտել քաղաքի փոփոխությունների վերաբերյալ: Աշտարակի վերջին ժամանակների բարեփոխումները չեն վրիպել նաև լրագրողական համայնքի աչքից: Հենց այդ պատճառով AAD.am-ի խմբագրակազմը կարծում է, որ Աշտարակի քաղաքապետ Թովմաս Շահվերդյանը՝ որպես օրինակելի համայնքի ղեկվար արժանի է տարվա լավագույն քաղաքապետի կոչմանը: Իսկապես գործ է արվում. անգամ քաղաք մտնելիս դա ակնհայտ է: Մենք կարևորում ենք նման միջոցառումները, քանի որ պետք է անել ամեն ինչ, որպեսզի Երևանից դուրս զարգանան նաև այլ համայնքները»: 

Շնորհակալություն հայտնելով բարձր գնահատանքի համար` Աշտարակի քաղաքապետ Թովմաս Շահվերդյանը նշեց. «Ինձ համար մեծ պատիվ է, բայց նաև չափազանց պարտավորեցնող ձեր գնահատականը: Շնորհակալ եմ վստահության համար: Իմ և իմ թիմի պարտքն է շենացնել և զարգացնել մեր Աշտարակը: Շարունակելու ենք մեր հին ու իմաստուն, բայց նաև երիտասարդ և եռանդով լի քաղաքում կառուցել բարեկեցիկ քաղաքային միջավայր, հաղորդել եվրոպական շունչ և ակտիվություն ՝հայկական հյուրընկալությամբ և ջերմությամբ»:

Լինելով Աշտարակի քաղաքապետերից ամենաերիտասարդը` Թովմաս Շահվերդյանն իր պաշտոնավարման կարճ ժամանակահատվածում գործով ապացուցել է իր նվիրվածությունը Աշտարակին և աշտարակցիներին՝ երիտասարդ տարիների ներուժն ու եռանդը ներդնելով ի շահ իր ծննդավայրի բարօրության:

Աշտարակ քաղաքի բարեկարգմանն ու զարգացմանն ուղղված արդյունավետ գործունեության հիմքում Թովմաս Շահվերդյանի՝ քաղաքի հանդեպ անմնացորդ սերն է, ինչի համար էլ համայնքի ղեկավարը վայելում է բնակչության հարգանքն ու վստահությունը:

Այդ առիթով զրուցել ենք նաև Աշտարակ քաղաքի բնակիչների հետ, ովքեր իրենց համայնքի ղեկավարի մասին շատ ջերմությամբ և խանդավառությամբ են արտահայտվում: Նրանց կարծիքով երիտասարդ քաղաքապետի աշխատանքնը գնահատվել է ըստ արժանվույն:

«Հսկայական տարածք իր հոր հետ անձամբ է մաքրել քարերից, բանվորների հետ հավասար աշխատել է:Նրանց ընտանիքի հաջողության գաղտնիքն այն է, որ շատ աշխատասեր են: Մեր բոլոր քաղաքապետերից ամենաերիետասարդն է, բայց ամենաարդյունավետը: Նման փոփոխություններ մեր քաղաքում երբեք չեն եղել»,- գոհունակությամբ ասում է Աշտարակ քաղաքի բնակիչը:

Գործունյա, բարեխիղճ, աշխատասեր, նպատակասլաց, հետևողական, գնահատող, իր լիազորությունների տիրույթում լավ ղեկավար. հենց այսպես են բնութագրում աշտարակցիները իրենց համայնքի ղեկավարին և նշում, որ իրենց քաղաքապետի ջանքերի շնորհիվ Աշտարակը վերդառնում է իր՝ «Աշտարակը դարձնենք օրինակելի քաղաք» կարգախոսին:

Թովմաս Շահվերդյանի պաշտոնավարման ընթացքում Աշտարակ քաղաքում կատարված առավել կարևոր բարեփոխումներից են՝ «Թումանյանի» և «Կոմիտասի» այգիների բարեկարգումը, աղբահանության և սանմաքրման աշխատանքների կանոնավոր իրականացումը, քաղաքի ընդհանուր կանաչապատումն ու քաղաքի մուտքի բարեկարգումը, տրանսպորտային ենթակառուցվածքի զարգացումը, ինչպես փողոցների, այնպես էլ մայթերի ձնամաքրման աշխատանքների արդյունավետ կազմակերպումը, ներքին լուսավորության ցանցի ընդլայնումը:

***

Թովմաս Սարգսի Շահվերդյանը ծնվել է 1989թ.-ի դեկտեմբերի 27-ին, ՀՀ Արագածոտնի մարզի Աշտարակ քաղաքում: 1996-2006թթ.- ընդունվել և ավարտել է Աշտարակ քաղաքի Ներսես Աշտարակեցու անվան միջնակարգ դպրոցը: 2006-2010թթ. ընդունվել և ավարտել է ՀՀ պետական տնտեսագիտական համալսարանը: 2012-2016թթ. եղել է Աշտարակ համայնքի ավագանու անդամ: 2012-2016թ. աշխատել է «Ավգոռ» ՍՊԸ-ում, որպես գործադիր տնօրեն: 2016թ. Հոկտեմբերի 24-ից ստանձնել է Աշտարակի քաղաքապետի լիազորությունները: Անկուսակցական է: Ամուսնացած է, ունի մեկ դուստր և մեկ որդի: