Կառավարությունը քննարկում է առանց մեղադրական դատավճռի գույքի նկատմամբ բռնագանձում տարածելու մեխանիզմը. վարչապետ

Եթե մարդը չի կարողանում ապացուցել, որ գույքը ձեռք է բերել օրինական ճանապարհով, այդ գույքը համարվում է ապօրինի: Այս մասին այսօր ԱԺ-ում ՀՀ կառավարության ծրագրի քննարկման ժամանակ ասաց վարչապետ Նիկոլ Փաշինյանը՝ պատասխանելով ԱԺ «Իմ քայլը» խմբակցության պատգամավոր Սոֆյա Հովսեփյանի հարցին: «Արդյո՞ք կառավարությունը չի ցանկանում նախկին իշխանության օրոք ապօրինի հարստացման ճանապարհով ձեռք բերված ռեսուրսները պետականացնել եւ օգտագործել որպես բաժնետիրական ընկերություն, որտեղ բաժնետերը կլինի պետությունը եւ բաժնետոմսերից ստացված եկամուտները կուղղվեն դեպի բանակաշինություն»,- հարցրեց պատգամավորը:

«Այդ պրոցեսը այսօր արդեն տեղի է ունենում եւ մենք բանակի կարիքների համար շատ դեպքերում մեխանիզմներ ենք գտնում, որ նախկինում կոռուպցիոն ճանապարհով ձեռք բերված գումարները վերադարձվեն եւ ծառայեցվեն այդ նպատակներին: Որոշ դեպքերում դրանք կարող են արտահայտված չլինել մեր բյուջեի մուտքերում, որովհետեւ ինչ-ինչ նկատառումներով դրանք կարող են օգտագործվել այլ եղանակներով: Այսինքն, ոչ թե ուղղակի մուտք արվել բյուջե, այլ ենթադրենք ինչ-որ տեղից գնում պետք է իրականացվի բանակի կարիքների համար, կարող է այդ փոխանցումը ուղիղ գնա այնտեղ կամ այլ մեխանիզմով»,- ասաց վարչապետը:

Փաշինյանը նշեց, որ այդ պրոցեսի ծավալներով անձամբ ինքը բավարարված չէ. «Կարծում եմ, որ մեր իրավապահ մարմինները՝ ԱԱԾ-ն եւ ոստիկանությունը, այս թեմայով պետք է առավել ակտիվ աշխատեն եւ առավել մեծ արդյունքներ ցույց տա: Որովհետեւ ձեզ հասկանալի պատճառներով հոկտեմբերից սկսված քաղաքական պրոցեսների արդյունքում անձամբ ես մի փոքր այդ թեմայից շեղվեցի եւ ես զգում եմ, որ դա որոշակի լճացման տեղիք է տվել:

Այստեղ կա հարց նաեւ ընդհանրապես երկրից եւ ժողովրդից գողացված գումարների վերադարձի գործընթացի հետ կապված եւ հիմա ուզում եմ ասել, որ կառավարությունը քննարկում է առանց մեղադրական դատավճռի գույքի նկատմամբ բռնագանձում տարածելու մեխանիզմը: Ես հասկանում եմ, որ այս անվանումը կարող է տարօրինակ թվալ, բայց ուզում եմ ասել, որ մենք ունենք հիմնավորում, որ Մարդու իրավունքների եվրոպական դատարանի դիրքորոշումներում սա համարվում է նորմալ պրակտիկա: Սա չի համարվում մարդու իրավունքների սահմանափակում: Այն, ըստ էության, անցումային արդարադատության էլեմենտ է: Եթե մարդը չի կարողանում ապացուցել, որ գույքը ձեռք է բերել օրինական ճանապարհով, այդ գույքը համարվում է ապօրինի»,- ասաց վարչապետը:

Հովսեփյանը նաեւ հետաքրքրվեց, թե ի՞նչ մեխանիզմներ են մշակվում միգրացիայի ապահովման եւ խթանման համար եւ արդյո՞ք այդ մշակման մեջ առողջապահության պաշտպանման խնդիրը ներառված է, թե ոչ:

«Միգրացիայի հետ կապված գլխում ասվում է, որ մեր քաղաքականության հիմնական նպատակը անձանց ազատ եւ անվտանգ տեղաշարժի ապահովումն է՝ հավասարակշռելով այն երկրի` ազգային անվտանգության ապահովման մեջ: Այսինքն, այս նախաբանում ձեր հարցի պատասխանը տրվում է, առողջապահության պաշտպանվածությունը երկրի ազգային անվտանգության անբաժանելի մասն է եւ շատ կարեւոր է»,- պատասխանեց վարչապետը::

Նա նշեց, որ այս ոլորտում մենք ունեինք բավականին լուրջ խնդիրներ` այդ թվում օտարերկրացիներին աշխատանքի տեղավորելու հետ կապված:

«Դուք գիտե՞ք, որ Հայաստանում կա պրակտիկա՝ օտարերկրացիներին աշխատանքի ընդունելու: Օրինակ, մարզերից մեկում օտարերկրացիներին ընդունել են աշխատանքի բավականին մեծ թվով` շինարարության ոլորտում` գյուղական համայնքի կողքը: Եւ ես հետաքրքրվել եմ, թե ինչքան աշխատավարձ են տալիս, 300 դոլար աշխատավարձ են տալիս այդ օտարերկրացիներին: Եւ հիմա ես ուզում եմ պարզել՝ ինչո՞ւ այդ կողքի գյուղում 300 դոլարով այդ շինարարության վրա աշխատող մարդ չի գտնվում»,- ասաց Նիկոլ Փաշինյանը: