ԼՂ ՄԱԿ-ի խաղաղապահներ ուղարկելու գաղափարը իրատեսական չէ, անվտանգության խնդիրները լուծում է ռուսական զորախումբը. ՌԴ ԱԳՆ

ՄԱԿ-ի խաղաղապահներ Ղարաբաղ ուղարկելու գաղափարն այնքան էլ իրատեսական չէ, տարածաշրջանում խաղաղության և անվտանգության վերականգնման խնդիրները արդյունավետորեն լուծում է ռուսական խաղաղապահ կոնտինգենտը։

Այս մասին «ՌԻԱ Նովոստի»-ի հետ հարցազրույցի ժամանակ հայտարարել է Ռուսաստանի Դաշնության արտաքին գործերի նախարարության միջազգային կազմակերպությունների վարչության տնօրեն Պյոտր Իլյիչևը:

Նա նշել է, որ միջազգային և օտարերկրյա կազմակերպություններից Ղարաբաղում դեռ աշխատում է միայն Կարմիր խաչի միջազգային կոմիտեն, և «ՄԱԿ-ի մարդասիրական գործակալությունները ադրբեջանցիներից և հայերից թույլտվություն չեն ստացել մուտք գործելու այնտեղ՝ նույնիսկ կարիքների գնահատման առաջնային առաքելություն իրականացնելու համար»:

Իլյիչևի խոսքով՝ «դժվարություններն առաջանում են կողմերի հետ հավասար հեռավորություն պահպանելու անկարողության պատճառով, ներառյալ՝ տարածաշրջան մուտքի և ելքի եղանակները, հաշվետվությունները, վերահսկողությունը և մարդասիրական գործունեության կառուցման իրավական հիմքերը»:

Այս պայմաններում Լեռնային Ղարաբաղին նույնիսկ միջազգային մարդասիրական օգնություն տրամադրելու հարցում առաջընթաց չկա, դժվար թե միջազգային խաղաղապահ կոնտինգենտի գործուղման գաղափարի գործնական իրականացումը, որն առավել ևս կպահանջի ՄԱԿ-ի Անվտանգության խորհրդի սանկցիաները, լինի իրատեսական»,- նկատել է Իլյիչովը՝ շարունակելով.

«Մենք ելնում ենք նրանից, որ ռուսական խաղաղապահ զորախումբը արդյունավետորեն հաղթահարում է Լեռնային Ղարաբաղում խաղաղության և անվտանգության վերականգնման բոլոր խնդիրները»։

Բացի այդ, հավելել է ռուս դիվանագետը, ՄԱԿ-ի Անվտանգության խորհրդի մանդատի ներքո տեղակայված խաղաղապահ առաքելությունները ոչ միշտ են վայելում ընդունող պետությունների վստահությունը։

«Որոշ դեպքերում վերջիններս ունեն ցածր արդյունավետություն: Հետևաբար հարցը ոչ այնքան այն է, թե ով է թույլ տվել խաղաղապահ գործողությունը, որքան հակամարտության երկու կողմերի բարի կամքի առկայությունը դրա դադարեցման կամ խնդիրների վերացման հարցում»,- ասել է Իլյիչևը։

Հայաստանի վարչապետ Նիկոլ Փաշինյանը հունվարի սկզբին ասել էր, որ Ղարաբաղում ռուս խաղաղապահների մանդատի ավարտից հետո կարող է հետևել խնդրանքը ՄԱԿ-ի Անվտանգության խորհրդին՝ տարածաշրջան միջազգային խաղաղապահ զորախումբ ուղարկելու վերաբերյալ։ Մեկնաբանելով Հայաստանի վարչապետի խոսքերը՝ ՌԴ նախագահի մամուլի քարտուղար Դմիտրի Պեսկովն ասել էր, որ միջազգային խաղաղապահները կարող են ներգրավվել Ղարաբաղում աշխատանքի միայն հակամարտության բոլոր կողմերի համաձայնությամբ։

Ռուսաստանի Դաշնության խաղաղապահ զորախումբը տեղակայվել է Ղարաբաղում 2020 թվականի նոյեմբերին՝ Ռուսաստանի Դաշնության, Հայաստանի և Ադրբեջանի ղեկավարների միջև եռակողմ պայմանավորվածությունների արդյունքում։ Փաստաթղթի համաձայն՝ ռուս խաղաղապահների գտնվելու ժամկետը հինգ տարի է՝ ավտոմատ երկարաձգմամբ հաջորդ հինգ տարի ժամկետով, եթե կողմերից ոչ մեկը դեմ չլինի դրան։

2020 թվականի սեպտեմբերի վերջին Լեռնային Ղարաբաղում վերսկսվեցին ռազմական գործողությունները, որոնք դարձան երկարաժամկետ հակամարտության շարունակություն և հանգեցրին քաղաքացիական զոհերի։

Կողմերը մի քանի փորձ արեցին զինադադար կնքելու համար, սակայն նոյեմբերի 9-ի գիշերը ձեռք բերված եռակողմ համաձայնությունը վերջապես հաջողությամբ պսակվեց։

Մոսկվայի միջնորդությամբ Ադրբեջանն ու Հայաստանը պայմանավորվել են ամբողջությամբ դադարեցնել կրակը և փոխանակել գերիների ու մահացածների մարմինները։ Ադրբեջանը, սակայն, մինչ օրս լիարժեք չի իրականացնում հայտարարությամբ ստանձնած պարտավորությունները: