Ինչ է անում Կառավարությունը, և ինչ է ասում ընդդիմությունը. վարչապետի ամփոփիչ ելույթը

«Վերջին չորս օրերին ես առավելագույն ժամանակ եմ անցկացրել Ազգային ժողովում, որովհետև կարևոր եմ համարել բոլոր պատգամավորների հարցերը լսել, այդ թվում՝ ընդդիմության ելույթները»:

Այս մասին այսօր Ազգային ժողովում հայտարարեց վարչապետ Նիկոլ Փաշինյանը:

Վերջինս նկատեց, որ սա ոչ միայն ինստիտուցիոնալ մոտեցում է, ինստիտուտի նկատմամբ հարգանք, այլ որովհետև խորհրդարանական երկիր ենք, և խորհրդարանական դեբատներում է, որ պետք է գեներացվի քաղաքական միտքը:

«Ընդհանուր առմամբ, ընդդիմության մեր գործընկերների միտումն այն էր՝ ցույց տալ, որ Կառավարության ներկայացրած զեկույցը մի փաստաթուղթ է, որի մեջ ընդգծված ձեռքբերումները ՀՀ քաղաքացիները չեն զգում»,- ասաց Փաշինյանը՝ հավելելով, որ բացարձակապես համաձայն չէ, որովհետև, ընդհակառակը, սա այն դեպքն է, որ նշված ցանկացած տող ՀՀ կոնկրետ քաղաքացին չի կարող պարզապես չզգալ.

«Որովհետև վերջին 5 տարում կառուցված, հիմնանորոգված և նորոգված 2500 կմ ճանապարհներով չի կարող չերթևեկել և չի կարող դա չնկատել:

Չեն կարող ՀՀ քաղաքացիները չնկատել 437 հազար 568 դեպք առողջապահական լրացուցիչ ծառայությունը, որ ստացել են առողջապահական հիմնարկներից:

Չի կարող ատեստավորված ուսուցիչը չնկատել, որ իր աշխատավարձը կրկնապատկվել է, և մենք՝ բոլորս, չենք կարող չնկատել, որ ՀՀ-ում կա ուսուցիչ, որ ստանում է 400-450 հազար դրամ աշխատավարձ: Սա մի իրողություն է, որ երբեմնի ֆանտաստիկայի ժանրից էր:

Չեն նկարող ՀՀ 29 հազար քաղաքացիները չնկատել, որ 2022 թվականի ընթացքում Կառավարությունից ստացել են 35 միլիարդ դրամ՝ բնակարան ձեռք բերելու համար:

Չեն կարող գիտնականները չնկատել, որ իրենց աշխատավարձը բարձրացել է 66-166 տոկոսով, չեն կարող չնկատել այն մարզիկները, ովքեր ստանում են Կառավարության աջակցությունը»:

Կառավարության ղեկավարը նաև բերեց օրինակներ՝ առանց անուններ նշելու.

«Ասեմ, որ վերջին օրերին մամուլի վերնագրերում հայտնված մեր մարզիկները, օրինակ, նրանցից մեկը Կառավարությունից ամեն ամիս ստացել է 1 միլիոն 400 հազար դրամ, 2 հոգի՝ 760 հազար դրամ, 1 հոգի՝ 400 հազար դրամ, 1 հոգի՝ 350 հազար դրամ, և Կառավարությունը նրանց առաջին հաջողություններից ուղեկցում է: Ուրիշ բան, որ մենք ամեն անգամ այդ գումարը տալիս ռեպորտաժ չենք անում, մեծ միջոցառումներ կամ այդ մարզիկների ֆոնին չենք նկարվում»:

Փաշինյանը նաև նշեց՝ արձանագրելով Սամբո ըմբշամարտի մեր թիմի հաջողությունները՝ հանձնարարական է տվել, որ Սամբոն նույնպես ընդգրկվի այդ մարզաձևերի ցանկում, մանավանդ, որ այս տարվա նոյեմբերին ՀՀ-ն պատրաստվում է հյուրընկալել Սամբոյի աշխարհի առաջնությունը:

«Չեն կարող ավելի քան 700 հազար աշխատողները չնկատել, որ իրենց աշխատավարձը 2022 թվականին ավելացել է 31,528 դրամով:

Ընդդիմության ներկայացուցիչներն ասում են որ հազարավոր մարդիկ սոված են քնում, դա կարող է լինել, և կա այդպիսի բան, բայց մենք ասում ենք, որ աշխատաշուկայում հազարավոր թափուր աշխատատեղեր կան: Աշխատատեղերի վերաբերյալ նոր ցուցանիշ է հրապարակվել, և մենք ունենք նոր պատմական ռեկորդ՝ 706 հազար, նախորդը 704 հազար էր: Նախորդ տարվա մարտի նկատմամբ ունենք 51 հազարով ավելի աշխատավարձ ստացող, իսկ 2019 թվականի մարտի նկատմամբ աշխատավարձի համախառն ֆոնդը կրկնապատկվել է: Չեն կարող մեր մարզերի բնակիչները չնկատել, որ վերջին 5 տարիներին մարզերում ներդրվել է 1,2 միլիարդ դոլար, երբեք այս չափի ներդրում մարզերում որևէ հնգամյակում չի եղել»,- նկատեց վարչապետը: