Պեպելյանի ամուսինը ծեծե՞լ է տվել

«Ջոս» համալիրում, ըստ նույն տեղեկությունների, քառյակը փորձել է աննկատ մնալ` նստելով մութ անկյունում: Նրանք սկսել են ինչ-որ բաներ պատվիրել, եւ երբ Քրիստինե Պեպելյանի մականունավոր ամուսնու` «Վստրեչի Ապերի» պատվերը, իր կարծիքով, ուշացել է, նա հրահանգել է «տղերքին»` ծեծել մենեջեր Գեւորգ Ավետիսյանին, իսկ դրանից հետո Գեւորգին ավտոմեքենայով տարել են: Ի դեպ, նշվում է, որ մենեջերը «Ջոս»-ի  նախկին սեփականատիրոջ` Մհեր Ավետիսյանի եղբայրն է:

Դեպքի հետ կապված մանրամասներ ճշտելու ակնկալիքով այցելեցի «Ջոս» ժամանցի համալիր: Տնօրեն Գեորգի Հարությունյանը վստահեցրեց, որ այդ տեղեկությունները չեն համապատասխանում իրականությանը: Ասաց, որ այդ օրը իրենց մոտ նշվել է «Լեւոն Թրեվըլ» ճամփորդական գրասենյակի սեփականատեր Կարպիս Թիթիզյանի ծննդյան տարեդարձը, եւ այդ արարողությանը ներկա են եղել շոու բիզնեսի բազմաթիվ ներկայացուցիչներ: Քրիստինե Պեպելյանն ու նրա ամուսինը, ըստ համալիրի տնօրենի, ներկա չեն եղել: Գեորգի Հարությունյանը նաեւ նշեց, որ խնդրո առարկա ակումբի մենեջերը ոչ թե Գեւորգ Ավետիսյանն է, այլ Վահագն Հարությունյանը, ում տեսնելով` արդեն պարզ կդառնա, որ այդ հաղթանդամ տղամարդուն հնարավոր չէ ծեծել (մենեջերն այդ պահին այնտեղ չէր, նրա աշխատանքային օրը սկսվում է երեկոյան): Իմ հարցին, թե իր հետ մեր զրույցից առաջ համալիրի որոշ աշխատակիցներ հաստատել են, որ ակումբում իսկապես միջադեպ է տեղի ունեցել, Հարությունյանը պատասխանեց. «Ակումբում շատ վաղուց ինչ-որ մի կռիվ եղել է, մինչեւ իմ տնօրեն լինելը, մոտավորապես մի վեց ամիս առաջ: Բայց թե ինչ կռիվ է եղել, ինչքան մարդ է խառնված եղել, չգիտեմ: Որքան ես գիտեմ, նույնիսկ ներսի աշխատողների հետ կապված չի եղել»: Նա հայտնեց, որ «Ջոս»-ի նախկին սեփականատիրոջ` Մհեր Ավետիսյանի եղբայրը` Գեւորգ Ավետիսյանը, փետրվարի 1-ից այդ համալիրում չի աշխատում: Ավետիսյաններից ոչ ոք, ըստ նրա, ընդհանրապես այլեւս կապ չունի «Ջոս»-ի հետ: Գուրգեն Հարությունյանն, ի դեպ, նաեւ հայտարարեց, որ «Ջոս» ժամանցի համալիրի նոր սեփականատերը ԱԺ պատգամավոր Հարություն Փամբուկյանն է: Նշենք, որ մամուլում ավելի վաղ տեղեկություններ էին հայտնվել, թե ԱԺ պատգամավորն այս համալիրը ձեռք է բերել 12 միլիոն դոլարով: Իսկ ահա «Ջոս»-ի նախկին սեփականատերը` Մհեր Ավետիսյանը, Արարատյան հայրապետական թեմի առաջնորդական փոխանորդ Նավասարդ արքեպիսկոպոս Կճոյանի սանիկն է: Հենց նրա անվան հետ է կապվում Նավասարդ արքեպիսոկոպոս Կճոյանի հայտնի «Բենթլին», որն, ինչպես հայտարարել էր արքեպիսկոպոսը, նվեր է ստացել իր սանիկից: Ինչեւէ: Վերադառնալով երգչուհի Քրիստինե Պեպելյանի ամուսնու հետ կապված միջադեպի մասին տեղեկություններին, նշեմ, որ երեկ այդ առնչությամբ փորձեցի մեկնաբանություն ստանալ ՀՀ ոստիկանության հասարակայնության հետ կապի եւ լրատվության վարչությունից: Վարչության պետ Աշոտ Ահարոնյանը փոխանցեց, որ այդ միջադեպի վերաբերյալ որեւէ հաղորդում չի ստացվել: Սակայն, ըստ նրա, արձագանքելով լրատվամիջոցների հրապարակած տեղեկություններին, ոստիկանության կենտրոնական բաժնի աշխատակիցները այցելել են «Ջոս», զրուցել նաեւ այն մարդկանց հետ, որոնց անունները նշված են եղել լրատվական կայքերի հրապարակումներում: Արդյունքում պարզվել է, որ տարածված տեղեկությունները չեն համապատասխանում իրականությանը:

Հ.Գ. Նշենք, որ այս տարվա սկզբին հայտնի դարձավ, որ երգչուհի Քրիստինե Պեպելյանն Ամանորից առաջ ամուսնացել է: Ամուսնացել է գաղտնի եւ ընտրյալի անունը խնամքով թաքցնում է` դա համարելով իր անձնական եւ ոչ` լրատվամիջոցների գործը: Մամուլը, սակայն, այնուամենայնիվ գրեց, որ երգչուհին ամուսնացել է «Վստրեչի Ապեր» մականունով հայտնի 40-ամյա Արամ Վարդանյանի հետ: Ու չնայած Քրիստինե Պեպելյանը, փաստորեն, ցանկանում է, որպեսզի իր ամուսնու անունը հնարավորինս քիչ հոլովվի, ամուսնությունից կարճ ժամանակ անց նրան ինչ-որ տուրուդմփոցներ են վերագրվում, եւ վերջինս դառնում է մամուլի այդ օրվա հերոսներից մեկը: