Խոստացել են ֆինանսավորել

Որոշների ֆինանսավորումն էլ նախատեսվում էր դադարեցնել ավելի ուշ։ Այդ սպառնալիքին ենթակա էին 80-85 տարվա պատմություն ունեցող «Կանչ», «Ծիծեռնակ» եւ «Աղբյուր» պարբերականները։ Վերջիններիս խմբագիրները հրավիրվել էին ՀՀ կառավարություն ու «աչքալուսանք» ստացել` 2010 թվականից իրենց պարբերականներն այլեւս չեն ֆինանսավորվելու։ Լավագույն դեպքում` խոստացել էին ֆինանսավորում տրամադրել համաֆինանսավորման սկզբունքով։ Այսինքն` գումարի մի մասը պետք է հայթայթեր պարբերականի ղեկավարությունը, մյուսը` պետությունը։ «Շատ ծանր տարիներ են եղել, երբ որ ֆինանսավորումը դադարեցնելու պես բան է եղել։ Պարզապես գումար չի եղել, չեն տրամադրել, բայց չեն ասել` չենք ֆինանսավորելու, ինչո՞ւ պետք է պետությունը ձեզ ֆինանսավորի։ Նման հարց չի դրվել... Մեզ ասում են` դուք ՍՊԸ-ներ եք, ինչո՞ւ պետք է պետությունը ձեզ պահի։ Այս կտրվածքով խոսակցությունը մենք չենք հասկանում »,- այն ժամանակ մեզ հետ զրույցում ասել էր «Աղբյուրի»` նախկին «Պիոների» երկարամյա գլխավոր խմբագիր Թադեւոս Տոնոյանը։ Իսկ օրինակ` «Լուսապսակ» մանկապատանեկան պարբերականի դեպքում կառավարությունը գործնական քայլերի էր դիմել։ Ու թեեւ 2009-ի պետական բյուջեով «Լուսապսակի» համար ֆինանսավորում նախատեսված է եղել, սակայն հենց տարեսկզբից այն դադարեցվել էր։ ՀՀ կրթության եւ գիտության նախարարությունից էլ տեղեկացել էինք, որ դադարեցվել է պետբյուջեից ֆինանսավորվող մանկապատանեկան 9 պարբերականներից 4-ի ֆինանսավորումը` «Խատուտիկ», «Փերի», «Մանկանց երկիր» եւ, ինչպես արդեն նշեցինք, «Լուսապսակ»։ Ու քանի որ նախօրեին արդեն Ազգային ժողովը հաստատել է ՀՀ-ի` 2010 թվականի բյուջեն, երեկ նույն կրթության եւ գիտության նախարարությունից տեղեկացանք, որ դրանով ֆինանսավորում նախատեսվում է նաեւ մանկապատանեկան պարբերականների համար. եւ նրանց, ում ֆինանսավորումը արդեն դադարեցվել էր, եւ նրանց, ումը խոստանում էին դադարեցնել։ Թե ինչն է մեր իշխանություններին ստիպել փոխել այս պարբերականների նկատմամբ նախկինում ունեցած վերաբերմունքը, ԿԳՆ-ից դժվարացան պատասխանել։ Կառավարությունից եւս մեկնաբանություն ստանալ մեզ չհաջողվեց։ Իսկ արդյոք հնարավոր է` փորձը կրկնվի, ու չնայած պետբյուջեով գումար նախատեսվել է, այնուամենայնիվ` այն չտրամադրվի, ինչպես, ասենք, վերը նշված «Լուսապսակի» դեպքում եղավ։ ԿԳՆ-ից այս կապակցությամբ նկատում են` «Բյուջեն օրենք է, եւ եթե գումարը նախատեսվել է, ուրեմն կտրամադրվի»։ Ճիշտ նույնկերպ, սակայն, օրենք էր նաեւ 2009 թվականի բյուջեն, բայց դրա փոփոխությունների արդյունքում մի շարք մանկապատանեկան պարբերականների ֆինանսավորումը դադարեցվեց։ Երեկ դարձյալ դիմեցինք նաեւ «Աղբյուրի» եւ «Լուսապսակի» գլխավոր խմբագիրներին` պարզելու, թե արդյոք իրենք մտավախություն ունե՞ն, որ 2010-ի բյուջեով նախատեսված լինելով հանդերձ` ֆինանսավորումը կարող է չտրամադրվել։ «Չեմ կարծում, որովհետեւ երեւի դա առիթ էր, որպեսզի ճշտվեր, ասենք, այդ մամուլը, ի վերջո, ի՞նչ երեւույթ է։ Մեր ղեկավարության որոշ մասի համար երեւի կարիք կար, որ ճշտվեր դա։ Իրենք չէին իմանում, թե ինչ են անում։ Կարծում եմ` հիմա ինչ-որ չափով իրենք գիտեն` մանկապատանեկան մամուլը ինչ բան է, ինչ տրադիցիաներ կան այնտեղ, մանավանդ որ` այս տնտեսական ճգնաժամը արդեն կարծես հաղթահարվում է»,- հույս հայտնեց «Աղբյուրի» գլխավոր խմբագիր Թադեւոս Տոնոյանը։ Ինչ վերաբերում է ճգնաժամի հաղթահարմանը, նկատենք, որ կառավարությունը գալիք 2010-ի համար 1.2 տոկոս տնտեսական աճ է կանխատեսում։ Բայց դա` միայն այս տարվա ավելի քան 17 տոկոսի հասնող անկման համեմատությամբ։ Ասել է թե` 2008-ի մակարդակին վերադառնալու եւ հետեւաբար` ճգնաժամը հաղթահարված համարելու համար դեռ շատ ջրեր պետք է հոսեն։ Իսկ իր խոսքում «առիթ» ասելով` Տոնոյանը նկատի ունի, որ իրենց հրավիրել էին կառավարություն` տեղեկացնելու, թե պետությունն այլեւս չի ցանկանում մանկապատանեկան մամուլ պահել։ «Դա չնայած վատ առիթ էր, բայց նաեւ իր դրական հետեւանքները, կարծում եմ, ունեցավ։ Իրենք, ի վերջո, շփվելով մեզ հետ` երեւի հասկացան` այս մամուլը ինչ է, ինչ գործ է անում, պե՞տք է իրենց, թե՞ պետք չէ։ Իրենց մեջ կային մարդիկ, որոնք այդ մամուլի տրադիցիոն ներկայացուցիչներին նոր ստեղծվածներից չէին զանազանում։ Զրույցը շատ խիստ էր, եւ բավականին տհաճ ու լարված հանդիպումներ են եղել։ Այդ հանդիպումների ընթացքում երեւի հաջողվեց ապացուցել կամ համոզել, որ դեռեւս ժամանակը չէ, երկիրը չի հասել այն վիճակին, որ ասենք` մանկապատանեկան մամուլը ինքնուրույն կարողանա գոյատեւել»,- հավելեց «Աղբյուրի» գլխավոր խմբագիրը։ «Լուսապսակի» գլխավոր խմբագիր Ծովինար Տիրատուրյանը նույնպես լավատեսորեն է տրամադրված եւ հույս ունի, որ իր ղեկավարած պարբերականի հետ այս տարի պատահածը չի կրկնվի։ «Չեմ կարծում, որովհետեւ կրթության նախարարը խոստացել է, եւ ամեն դեպքում` մենք նախահաշիվ ենք պատրաստվում ներկայացնել»,- ասաց նա։ Իսկ ի՞նչն է ստիպում, փորձն ունենալով հանդերձ, լավատես լինել։ «Մենք այս պահին լավատես ենք եւ ընդհանրապես` ավելի շատ հակված ենք մտածել, որ անպայման գումարը կտան»,- հայտարարեց Ծովինար Տիրատուրյանը։