«Պետք է քայլենք միասին». ՀԱԿ պատգամավորը՝ ԲՀԿ-ի հետ տարաձայնությունները հարթելու մասին

Ազգային ժողովի ոչ իշխանական եռյակը երեկ ՀԱԿ խմբակցությունում անցկացրեց իր հերթական խորհրդակցությունը: Դրան ԲՀԿ-ից մասնակցում էին Նաիրա Զոհրաբյանը, Ստեփան Մարգարյանն ու Վարդան Օսկանյանը, ՀԱԿ-ից՝ Արամ Մանուկյանն ու Լեւոն Զուրաբյանը, եւ «Ժառանգությունից»՝ Արմեն Մարտիրոսյանն ու Ռուբեն Հակոբյանը: Նիստը սկսվեց ԱԺ լիագումար նիստի քվեարկության ավարտից հաշված րոպեներ անց:

Հանդիպման ավարտին քննարկված հարցերն ու որոշումները ներկայացնելով՝ ՀԱԿ խմբակցության ղեկավար Լեւոն Զուրաբյանը խոսեց իշխանության հետ 12 կետերի շուրջ բանակցությունների առաջարկների մասին ու եռյակի անունից հայտարարություն հնչեցրեց. «1. Եռյակը 12 կետերի շուրջ իշխանությունների հետ բանակցությունների իմաստ չի տեսնում: 2. 12 կետերի շուրջ բանակցությունների առաջարկները ոչ այլ ինչ են, քան ընդդիմությանը երկարաժամկետ ու անպտուղ իմիտացիոն քննարկումների մեջ ներքաշելու փորձեր՝ ժամանակ շահելու եւ համաժողովրդական շարժման թափը կոտրելու նպատակով: 3. Անհրաժեշտ քաղաքական կամք ունենալու դեպքում իշխանությունները, առանց որեւէ բանակցությունների, կարող են կատարել բոլոր կետերը»: Առաջ անցնելով՝ Զուրաբյանն ընդգծեց, որ քննարկել են զանգվածային հրապարակային միջոցառումներ անցկացնելու հարցը ու որոշել դեկտեմբերի 10-ին՝ մարդու իրավունքների պաշտպանության օրը, եռյակով անցկացնել հանրահավաք-երթ. «Մենք եռյակով որոշել ենք, որ այս անգամ սա կլինի համաժողովրդական շարժման միջոցառում: Դեկտեմբերի 10-ին, ժամը 13:00-ին մենք հրավիրում ենք Ազատության հրապարակ, որտեղ կներկայացվի մարդու իրավունքների վիճակը ու մեր անելիքները, որոնք կապված են ոչ միայն մարդու իրավունքների հետ, այլ ընդհանրապես՝ համաժողովրդական շարժման հետ, ու պատրաստվում ենք հզորագույն երթ իրականացնել»,- ասաց ՀԱԿ փոխնախագահը: Հանրահավաք-երթին առաջնորդների մասնակցության մասին հարցին պատասխանելով՝ Զուրաբյանն ասաց, որ այդ մասին դեռ տեղեկություն չունի: Եռյակը քննարկել էր նաեւ շարժման կառույցների ստեղծման գործընթացը: Ըստ այդմ, որոշվել է ստեղծել շարժման քաղաքական խորհուրդ, բացի այդ՝ կառուցվածքային այլ ստորաբաժանումներ եւս կլինեն, մասնավորապես՝ տեղեկատվական կենտրոն, տարածքային գրասենյակները համակարգող մարմին եւ այլ աշխատանքային խմբեր:

Քննարկված հարցերն ու որոշումները ներկայացնելուց հետո Զուրաբյանը պատասխանեց լրագրողների հարցերին: Խոսելով 12 կետերի կատարման մասին՝ ասաց, որ իրենք առաջիկայում մտադիր են Ընտրական օրենսգիրքը փոփոխելու հարցով արտահերթ նիստ հրավիրել ու օրենքի նախագիծ ներկայացնել, որի առանցքը կլինի մեծամասնական ընտրակարգը վերացնելն ու համամասնական ընտրակարգի անցնելը, եւ այդպիսով կստուգեն՝ իշխանությունը արժեք տալի՞ս է իր խոսքին, թե՝ ոչ. «Եթե իշխանությունները հայտնում են 12 կետերի կատարման իրենց պատրաստակամության մասին, ապա մենք այդ հնարավորությունը անմիջապես տալիս եք։ Մենք այդ քայլը անում ենք, եւ այդ քայլով կստուգվի. Արդյո՞ք իշխանություններն իրենք իրենց խոստումներին որևէ արժեք տալի՞ս են, թե՝ ոչ, արդյո՞ք Սերժ Սարգսյանն ինքն իր խոսքին որեւէ արժեք տալի՞ս է, թե՝ ոչ։ Դա արդեն իր ապացուցելու խնդիրն է»,- ասաց նա՝ հավելելով, որ դրա կատարման դեպքում եւս բանակցություններ չեն սկսվի: Ի դեպ, ԱԺ նախագահ Գալուստ Սահակյանը երեկ news.am կայքի հետ զրույցում ասել էր, որ բանակցությունները ընդդիմության հետ կշարունակվեն. անդրադառնալով ԱԺ նախագահի այս հայտարարությանը՝ Զուրաբյանը պատասխանեց. «Կարող է ինքը բանակցելու ինչ-որ օբյեկտներ ու սուբյեկտներ գտե՞լ է: Դա իր գործն է, ում հետ ուզում է թող բանակցի, մեզ հետ դա չի լինի»: Հարցին, թե արդյո՞ք դեկտեմբերի 10-ի հանրահավաքով այս տարվա զանգվածային միջոցառումները կավարտվեն, ՀԱԿ խմբակցության ղեկավարը պատասխանեց, որ «ամեն ինչ էլ հնարավոր է ե՛ւ դեկտեմբերի 10-ից առաջ, ե՛ւ հետո»: Անդրադառնալով անհապաղ իշխանափոխության ժամկետներին՝ Զուրաբյանը ասաց. «Շատ արագ իշխանափոխության գործընթացի կողմնակից ենք բոլորս ու այդ գործընթացը կառուցում ենք: Լուրջ չի լինի, եթե մենք հայտարարենք իշխանափոխության օր, ժամկետներ: Երկրում կան իշխանափոխության նախադրյալներ, այն հասունացած է, ժողովրդի համբերությունը սպառված է, ու մենք ընթանում ենք այդ ճանապարհով»: Զուրաբյանից հետաքրքրվեցինք, թե արդյո՞ք ԲՀԿ-ի հետ մարտավարական տարակարծությունները հարթվեցին, ինչին ի պատասխան՝ նա նշեց. «Մարտավարական հարցերի տարաձայնությունները ինչ-որ պրոբլեմներ ստեղծում են, բայց մենք հաղթահարում ենք ու զբաղված ենք մեր դիրքորոշումները մերձեցնելով, պետք է քայլենք միասին»: Լրագրողները Զուրաբյանից նաեւ հետաքրքրվեցին, թե ի՞նչ կարծիք ունի Ժողովրդական կուսակցության առաջնորդ Տիգրան Կարապետյանի՝ եռյակին ձեռք մեկնելու պատրաստակամության մասին ու սեղմո՞ւմ են Կարապետիչի ձեռքը: Պատգամավորն ասաց, որ չի ուզում պոետիկ ձեւով խոսել, սակայն «շարժմանը աջակցելը յուրաքանչյուրի սահմանադրական իրավունքն է»: Եռյակի հաջորդ նիստի օրը, ինչպես տեղեկացրեց Զուրաբյանը, դեռեւս որոշված չէ, սպասվում է, որ հաջորդ նիստի ժամանակ արդեն պարզ կդառնա ԸՕ փոփոխությունների հարցով արտահերթ նիստ հրավիրելու օրը: