ՀՀ ՊՆ նախկին տեղակալ Վահան Շիրխանյանը զարմացել է իր ձերբակալությունից

Ազգային անվտանգության ծառայության կողմից Նորքում վնասազերծված «զինված հանցախմբի» գործի շրջանակներում ձերբակալված ՀՀ պաշտպանության նախարարի նախկին տեղակալ Վահան Շիրխանյանին երեկ մեղադրանք է առաջադրվել. նա մեղադրվում է ՀՀ քրեական օրենսգրքի 223 հոդվածի 2-րդ մասով (Հանցավոր համագործակցություն ստեղծելը կամ հանցավոր համագործակցությանը մասնակցելը՝ պատժվում է ազատազրկմամբ՝ վեցից տասը տարի ժամկետով):

Նախաքննական մարմինը երեկ միջնորդություն է ներկայացրել Կենտրոն եւ Նորք-Մարաշ վարչական շրջանների ընդհանուր իրավասության դատարան՝ Շիրխանյանի նկատմամբ որպես խափանման միջոց երկամսյա կալանքն ընտրելու վերաբերյալ, ինչը դատավոր Արմեն Բեկթաշյանը բավարարել է:

Դեկտեմբերի 19-ին, ՀՀ ԱԱ ծառայության հաղորդագրություն տարածեց, նշելով, որ ՀՀ ՊՆ նախկին տեղակալ Վահան Շիրխանյանը ձերբակալվել է՝ Արթուր Վարդանյանի կողմից ստեղծված հանցավոր համագործակցությանը մասնակցելու, դրա օգտին գործելու, կոնկրետ հանձնառություն եւ դերակատարություն ունենալու կասկածանքով:

Վահան Շիրխանյանի պաշտպան Տիգրան Տեր-Եսայանը երեկ մեր զրույցում ասաց, որ իր պաշտպանյալը առաջադրված մեղադրանքում իրեն մեղավոր չի ճանաչում եւ հրաժարվել է ցուցմունք տալ: «Վահան Շիրխանյանը հրաժարվել է ցուցմունք տալուց մինչեւ գործի նյութերին ամբողջական չծանոթանա: Նա որպես կասկածյալ հարցաքննվելիս ցուցմունք է տվել, դա եղել է ճանաչողական ցուցմունք, որի ժամանակ իմ պաշտպանյալը հայտնել է, թե հանցավոր խմբի անդամներից ում է ճանաչել: Ում ճանաչել է՝ ասել է, թե երբ եւ ինչպես է ճանաչել: Երկու-երեք մարդու է ճանաչում»,-ասաց պաշտպանը: Հարցին, թե կոնկրետ ո՞ւմ է ճանաչում Շիրխանյանը, Տիգրան Տեր-Եսայանը պատասխանեց, որ խմբի անդամներից մեկի՝ Արթուր Վարդանյանի հետ ծանոթացել է Ցեղասպանության 100-ամյա տարելիցի միջոցառումների ժամանակ, ինչպես նաեւ ճանաչում է կաթոլիկ եկեղեցու կալանավորված աշխատակցին (խոսքը սույն գործով կալանավորված «Ռադիո Մարիամ Հայաստան» ռադիոկայանի տնօրեն հայր Անտոնիո ծայրագույն վարդապետ Թոթոնջյանի մասին է,-հեղ.) «Էս գործի մեջ մի քանի տասնյակ մարդ է, քննչական խումբը նպատակահարմար է գտնում, որ Վահան Շիրխանյանի նկատմամբ որպես խափանման միջոց կալանք լինի, որոշ հարցեր կան պարզելու: Մենք պատրաստվում ենք մանրամասն ուսումնասիրել փաստաթղթերը եւ բոլոր հարցերին պատասխանել»,-ասաց Տեր-Եսայանը:

Մեր հարցին, թե Շիրխանյանի բնակարանի խուզարկությամբ ի՞նչ է  առգրավել նախաքննական մարմինը, պաշտպանը պատասխանեց, որ Շիրխանյանի բնակարանից առգրավվել են համակարգիչներ (հին եւ նոր), նոթատետր, երկու որսորդական հրացան եւ 1 ատրճանակ, որը նրան նվիրել էր Վազգեն Սարգսյանը եւ բոլոր անհրաժեշտ փաստաթղթերը, ըստ փաստաբանի, առկա են եղել։  Տիգրան Տեր-Եսայանը փոխանցեց, որ բնակարանից որեւէ անօրինական բան չի հայտնաբերվել:

Վերջինիս ներկայացմամբ՝ Շիրխանյանի համար անսպասելի է եղել իր ձերբակալությունը. խմբին նոյեմբերին են ձերբակալել,  իսկ նրան՝ դեկտեմբեր ամսին, եւ հիմա էլ մեղադրանք է առաջադրվել, ու նա կալանավորել է։

ՀՀ պաշտպանության նախկին փոխնախարարը երեկ դատարան բերվեց ժանը 18:00-ին, նրան ուղեկցում էին քաղաքացիական համազգեստով անձինք: Դատարանում էր նաեւ ՀՀ ազգային անվտանգության ծառայության քննչական վարչության պետի տեղակալ Միքայել Համբարձումյանը, որը, ինչպես պարզեցինք, սույն գործով քննչական խմբի ղեկավարն է: Նրա միջնորդությունը՝ Շիրխանյանին կալանավորելու վերաբերյալ, դատարանը քննեց մոտ մեկ ժամ:

Նախկին բարձրաստիճան պաշտոնյայի երկրորդ պաշտպան Ստեփան Ոսկանյանը կալանավորման որոշումից հետո մեր զրույցում ասաց, որ հնգօրյա ժամկետում բողոքարկելու են դատարանի որոշումը Վերաքննիչ դատարանում. «Մենք հիմնականում շեշտը դրեցինք նրա վրա, որ միջնորդությանը կից որեւէ փաստական տվյալ չկա ներկայացված նյութերում, որ իմ պաշտպանյալը կթաքնվի վարույթն իրականացնող մարմնից, կամ կխոչընդոտի գործի քննությանը»,-ասաց պաշտպանը: Մեր հարցին, թե գրավի միջնորդություն ներկայացրե՞լ է պաշտպանական կողմը, Ոսկանյանը նշեց. «Ես, ճիշտն ասած, չէի ցանկանա գրավով ազատ արձակելու միջնորդություն ներկայացնել՝ հաշվի առնելով նաեւ պարոն Շիրխանյանի կենսագրությունը, նրա հեղինակությունը, անցած ուղին, բայց ամեն դեպքում որոշեցինք նաեւ գրավի միջնորդություն ներկայացնել մեկ միլիոն դրամ եւ ավելի չափով, որը, սակայն, դատարանը մերժեց»: Մեր զրույցում պաշտպանը նշեց, որ  Շիրխանյանին ամենայն հավանականությամբ կտեղափոխեն «Երեւան-Կենտրոն» ՔԿ հիմնարկ (ԿԳԲ-ի պադվալ):

Երեկ զրուցեցինք նաեւ Շիրխանյանի որդու՝ Գեորգիի հետ: Վերջինս նշեց, որ չեն հավատում հոր՝ հանցավոր խմբի անդամ լինելուն: Նա նաեւ փոխանցեց, որ հայրը առողջական խնդիրներ ունի, երկու անգամ վիրահատվել է: Գեորգի Շիրխանյանը հրաժարվեց այլ հարցերի պատասխանել:

Հիշեցնենք, որ զինված հանցախումբը վնասազերծվել է նոյեմբերի 24-ի լույս 25-ի գիշերը: Մեր տեղեկություններով, սույն քրեական գործի շրջանակներում կալանավորված անձանց թիվը 29 է: Նախաքննական մարմինը, սակայն, առայժմ պաշտոնապես հաղորդել է միայն 22-ի մասին: «Հանցախմբի» ղեկավարը, ըստ ԱԱԾ-ի, Արթուր Վարդանյանն է. պաշտոնական հաղորդագրության համաձայն՝վնասազերծված խումբը նպատակ է հետապնդել ՀՀ տարածքում կազմակերպել մի շարք ծանր հանցագործություններ: