Ծեծի է ենթարկվել լրագրողը. հարձակում «Չորրորդ իշխանության» խմբագրության վրա

Երեկ «Չորրորդ իշխանություն» թերթի խմբագրությունում դաժան ծեծի է ենթարկվել թերթի լրագրող Մհեր Ղալեչյանը։ Իսկ ծեծի պատճառը թերթի ապրիլի 25-ի համարում տպագրված  լուրն է եղել՝ «Կառլոս Պետրոսյանն «աշխատավարձով» կառուցում է հերթական առանձնատունը» վերնագրով։

Ինչպես թերթին հայտնած են եղել Ներքին Զեյթունի Փափազյանի փողոցի բնակիչները, իրենց բակի բնակչուհի Մարգո Դալլաքյանին պատկանող տնամերձում, առանց տանտիրոջ համաձայնության, Ազգային անվտանգության ծառայության պետ  Կառլոս Պետրոսյանն իր համար առանձնատուն է կառուցում։ Հրապարակման հաջորդ օրը «ՉԻ» խմբագրություն է ներկայացել Գեղամ Պետրոսյան ներկայացած մի քաղաքացի եւ հայտարարել, որ այդ հողակտորն արդեն մեկ տարի է իր սեփականությունն է եւ երդվել, որ ո՛չ տնամերձը Կառլոս Պետրոսյանի հետ կապ ունի, ոչ էլ ինքը։ Սույն հավաստիացումներից հետո, «Չորրորդ իշխանությունն» իր երեկվա համարում տպագրել է Գեղամ Պետրոսյան ներկայացած մարդու պնդումը, բայց եւ ավելացրել, որ քանզի իրենք Գեղամ Պետրոսյանի անձը հաստատող որեւէ փաստաթուղթ չեն տեսել՝ առայժմ ձեռնպահ են մնում որեւէ մեկնաբանությունից։

Երեկ, ժամը 17-ի սահմաններում, «ՉԻ» խմբագրություն է այցելել Գեղամ Պետրոսյան ներկայացած անձը՝ իր հետ բերելով «շկաֆի» գաբարիտներով մեկին, եւ երկուսով, առանց ավելորդ նախաբանի, հենց խմբագրության շենքում, հարձակվել են լրագրող Մհեր Ղալեչյանի վրա՝ ասելով, թե տպագրած հերքումն իրենց սրտով չի։ «Ու երբ ես նրանց ասացի, որ այդ դեպքում եւս կա հարցի լուծում, եւ իրենք կարող են դիմել դատարան, նրանք ինձ պատասխանեցին, որ իրենք ոչ թե դատի կտան, այլ կտան՝ ինձ կսպանեն»,- երեկ դեպքի մանրամասները մեզ պատմեց Մհեր Ղալեչյանը։ Սպանելու խիստ պատասխանատու նախաբանից հետո, խմբագրություն ներխուժած անձինք սկսել են դաժանաբար ծեծել լրագրողին՝ նրա գլխին խփելով ձեռքի տակ եղած հնարավոր ամեն ինչով։ Մենք «ՉԻ» խմբագրություն հասանք այն պահին, երբ շտապօգնության բժիշկներն առաջին օգնությունն էին ցույց տալիս ամբողջովին արյան մեջ գտնվող լրագրողին։ Մեզ հետ զրույցում բժիշկներից մեկն ասաց, որ Մհերը ստացել է միջին ծանրության վնասվածք (բավականին խորը բացվածք կար գլխի վրա)։ Իսկ հետագա բարդությունների հնարավորության մասին,  ըստ բժիշկների, կարելի կլինի եզրակացություններ անել միայն ստացիոնար ստուգում անցկացնելուց հետո։ Առաջին բուժօգնությունը ցույց տալուց հետո,  երեկ Մհեր Ղալեչյանին տեղափոխեցին «Արմենիա» հանրապետական հիվանդանոց։ Իսկ արդեն ժամը 19-ին (դեպքի մասին ոստիկանություն է ահազանգվել անմիջապես) «ՉԻ» խմբագրություն եկավ ՀՀ ոստիկանության Երեւանի վարչության Կենտրոնի քրեական հետախուզության բաժանմունքի պետ Դավիթ Զաքարյանը՝ օպերատիվ խմբով։ Վերջինս մեզ հետ զրույցում ասաց, որ լրագրողական աշխարհը կարող է հանգիստ լինել՝ իրենք իրենց գործը լավ գիտեն։ 

Ինչեւէ, դեպքի կապակցությամբ մենք ստացանք նաեւ «ՉԻ» գլխավոր խմբագիր Շողեր Մաթեւոսյանի մեկնաբանությունը¬ «Գեղամ Պետրոսյան ներկայացած անձը երկու օր է՝ գալիս  է խմբագրություն եւ ասում, որ ԿԳԲ-ն ահա արդեն քանի օր է՝ իրեն տեռորի է ենթարկում։ Նախ, ի՞նչ իրավունք ունի Կառլոս Պետրոսյանը տեռորի ենթարկել անկապ մարդկանց, որ նրանք էլ ահաբեկված գան խմբագրություն։ Եթե թերթում տպագրված լուրը Կառլոս Պետրոսյանի հետ որեւէ կապ չուներ, ապա ընդունված քաղաքակիրթ ձեւ կա՝ զանգահարում, կամ գալիս են խմբագրություն եւ, ներկայացնելով անհրաժեշտ փաստարկները, հերքում են պահանջում։ Չնայած, ԿԳԲ-ի մեթոդները, 100 տարի է, հայտնի են. չի բացառվում, որ հենց իրենք են այդ Գեղամ Պետրոսյան ներկայացածին ասել՝ դու գնա, վերցրու քեզ վրա, մենք տեր ենք»։

Նաիրա Զոհրաբյան

Տպագրվել է «Հայկական Ժամանակ» օրաթերթի՝ 2003 թվականի ապրիլի 30-ի համարում